Naan in Katak an Kōrā, Juļae 2012
Kōmeļeļeik Ad Rikaloor jen Iakwe im Jerbal in Jipan̄
Lukkuun jar im ekkatak kōn kein katak in im, n̄e ekkar, ekōnono kake ippān jejtōr ro kom̧ij loļo̧k. Kōjerbal kajjitōk ko n̄an jipan̄ eok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā ro en m̧ōttan eo emourur tata ilo mour eo am̧ make.
Tōmak, Baam̧le, Deeor
Ilo aolepen mour eo An, Jisōs Kraist eaar kwaļo̧k An iakwe n̄an ro jet ilo an kwaļo̧k n̄an er. Eaar ba, “Ilo men in armej otemjej renaaj jeļā bwe kom̧ij rū kaļora, eļan̄n̄e kom̧ij yokwe doon” (Jon 13:35). Ej kōm̧m̧ane juon waanjon̄ak im kōņaan bwe jān “jakiļo̧k men ko m̧weiemi n̄an eo ej pād ilo aikuj” (Mosaia 4:16). Eaar kūr rūkaļoor ro An n̄an jerbal Ippān ilo kwaļo̧k eo An, leļo̧k n̄an er iien em̧m̧an n̄an jipan̄ ro jet im erom āinwōt E.1
Ad jerbal in jipan̄ āinwōt rūkaki in loļo̧k ro an kōrā enaaj āinļo̧k wōt kwaļo̧k eo an Ad Rilo̧mo̧o̧r n̄e jej kwaļo̧k ad iakwe n̄an ro jej loļo̧k im katakin er kōn kōm̧m̧ane menin:2
-
Kememej etaer im etan ro uwaan baam̧le eo aer im kōba kajeer.
-
Iakwe er ilo am̧ jab ekajete er.
-
Lale er im kōkajoorļok tōmak eo aer ‟juon ilo̧k juon,” āinwōt an kar Rilo̧mo̧o̧r eo kōm̧m̧ane (3 Nipai 11:15).
-
Ejaake jemjerā ko rem̧ool ippāer im loļo̧k er ilo kapijuknen ko aer im jikin ko jet.
-
Kea kōn kajjojo jejtōr. Kememej raan in kemem ko, kadiwōjļo̧k ko, m̧are ko, peptaij ko, ak iien ko jet me eļap tokjāer n̄an e.
-
Pukōtļo̧k membōr ro rekāāl im rejeniknik.
-
Pukōtļo̧k ro raajimakeke ak ro rej aikuj in kaenōm̧m̧an.
Jān Jeje ko Rekwojarjar
Jān Bwebwenato eo Ad
‟Kalim̧m̧ur Ekāāl ekoba bwebwenato ko an kōrā ro, āt im ejjeļo̧k āt, ro raar kōjerbal tōmak ilo Jisōs Kraist. … Kōrā rein raar erom waanjon̄ak in rikaļoor. … [Raar] itoitak ippān Jisōs im Rijilōk ro Jon̄oulruo An. Raar leļo̧k aaer n̄an jipan̄ ilo kwaļo̧k eo An. Ālkin An mej im Jerkakpeje, [rar] wōnm̧aanļo̧k n̄an erom̧ rūkaļoor ro retiljek.”3
Paul eaar je kōn juon kōrā etan Pibe eo ekar ‟ri karijer ilo eklejia” (Rom 16:1). Eaar kajjitōkin armej ro n̄an‟jipan̄ e ilo jabdewōt eo ej aikuj jān kom̧: bwe eaar ri jipan̄ elōn̄” (Rom 16:2). ‟Kain jerbal in jipan̄ in kar kōm̧m̧ane jen Pibe im kōrā ro jet rem̧m̧an ilo Kaļļim̧ur Ekāāl ej wōnm̧aanļo̧k wōt rainin ippān ro uwaan Doulul an Kōrā—ritōl ro, rūkaki in loļo̧k ro an kōrā, m̧am̧a ro im ro jet—ro rej jerbal āinwōt rileļo̧k jipan̄, ak rijipan̄ ro, an elōn̄.”4
© 2012 jen Intellectual Reserve, Inc. Aolep jim̧we rej pād ippān. Kar jeje ilo Amedka. Kōmālim ilo kajin Pālle: 6/11. Kōmālim Ukook eo: 6/11. Ukook eo an Visiting Teaching Message, July 2012. Marshallese. 10367 874
Ta Eo Imaron̄ Kōm̧m̧ane?
-
Ekōjkan Aō kōļapļo̧k maron̄ eo aō n̄an jipan̄ ro jet?
-
Ta eo Ij kōm̧m̧ane n̄an kanooj lale bwe sister ro Ij mije er ren jeļā bwe Ij iakwe er?