Serem Gospel long Hat I Go long Hat

God bae i mekem blong ol pipol we oli rere blong akseptem gospel blong mitim ol wokman blong Hem we oli rere inaf blong wantem serem gospel. Yu bin luk samting ia i hapen long laef blong yuwan. Samting ia i hapen hamas taem, hemia i dipen long olsem wanem yu bin rere insaed long maen mo hat blong yu.

Mi gat wan fren we i stap prea evri dei blong mitim wan man we i rere blong kasem gospel. Hem i stap karem wetem hem wan kopi blong Buk blong Momon. Long naet bifo wan sotfala trip blong hem, hem i bin plan blong no tekem wan kopi blong buk wetem hem, be blong karem wan invitesen kad. Be taem hem i rere blong go, wan filing long saed blong spirit i bin kam long hem: “Tekem wan Buk blong Momon wetem yu.” Hem i putum wan long basket blong hem.

Taem wan woman, we hem i bin save, i sidaon kolosap long hem long trip ia, hem i stap tingting, “Hem nao?” Woman ia i folem hem bakegen long nekis trip blong hem i kambak. Hem i tingting bakegen, “Olsem wanem nao bae mi stat blong tokbaot gospel?”

Be, long narasaed, woman ia i talem long hem: “Yu pem taeting long jos blong yu, i tru?” Hem i talem se yes. Woman ia i talem we hem i blong pem taeting long jos blong hem be hem i no bin mekem. Afta hem i askem, “Wanem nao yu save talem long mi abaot Buk blong Momon?”

Hem i bin eksplenem se buk ia hem i skripja, wan nara witnes blong Jisas Kraes, we Profet Josef Smit i bin transletem. I luk olsem woman ia i stat blong gat intres, mekem se hem i pusum han blong hem i go insaed long basket blong hem mo talem, “Mi bin gat filing ia blong karem buk ia wetem mi. Mi ting se hem i blong yu.”

Hem i stat blong ridim. Taem tufala i stap blong go wanwan, woman i talem: “Yu mo mi bae i storian moa abaot samting ia.”

Wanem we fren blong mi i no bin save—be wanem we God i bin save—i bin we woman ia i bin stap lukaotem wan jos. God i bin save we woman ia i bin stap lukluk fren blong mi mo stap askem hemwan from wanem jos blong hem i bin mekem hem i hapi tumas. God i bin save se bae woman ia i askem abaot Buk blong Momon mo we bae hem i glad blong kasem tijing long ol misinari. Woman ia i bin rere. Mo fren blong mi tu. Yu mo mi i save rere tu.

Fasin blong stap rere we yumi nidim hem i insaed long maen blong yumi mo long hat blong yumi. Woman ia i bin harem mo tingbaot ol toktok abaot Buk blong Momon, Jos blong Lod we i bin kambak, mo komanmen blong pem ol taeting long God. Mo hem i bin filim stat blong witnes blong trutok long hat blong hem.

Lod i bin talem se bae hem i talemaot trutok long maen blong yumi mo hat blong yumi tru long Tabu Spirit (luk long D&C 8:2). Plante long ol pipol we bae yu mitim oli bin rere olsem ia nao long stat. Oli bin harem o ridim abaot God mo toktok blong Hem. Sapos hat blong olgeta i sopsop inaf, oli bin filim, smol finis, wan konfemesen blong trutok.

Woman ia i bin rere. Mo fren blong mi ia tu, Lata dei Sent ia we i bin stadi long Buk blong Momon. Hem i bin filim wan witnes se samting ia i tru, hem i bin luksave taem Spirit i lidim hem blong tekem wan kopi wetem hem. Hem i bin rere long maen blong hem mo long hat blong hem.

God i stap rere long ol pipol blong kasem testemoni blong yu abaot trutok we i bin kambak. Hem i nidim fet blong yu afta, aksen blong yu blong no fraet blong serem wanem we i spesel tumas long yu mo long olgeta we yu lavem.

Rere blong serem gospel taem yu stap fulumap maen blong yu evri dei wetem ol trutok blong gospel. Taem yu kipim ol komanmen mo stap ona long ol kavenan blong yu, bae yu filim testemoni blong Spirit mo filim moa lav blong Sevya blong yu mo blong olgeta we yu stap mitim.

Sapos yu mekem pat blong yu, bae yu gat moa long ol swit eksperiens blong mitim pipol we oli rere blong harem testemoni blong yu abaot trutok—we yu givim wetem hat i go long hat, hat blong yu i go long hat blong olgeta.