2012
Ol Spesel Nid mo Ol Seves we Oli Givim
Septemba 2012

Visiting Tijing Mesej, Septemba 2012

Ol Spesel Nid mo Ol Seves we Oli Givim

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.

Pikja
Rilif Sosaeti sil

Fet, Famle, Help

Presiden Tomas S. Monson i bin talem: “Ol nid blong ol narafala man oli stap oltaem, mo wanwan long yumi i save mekem wan samting blong helpem wan man. … Sapos yumi no putum yumi fulwan blong givim seves long ol narafala man, bae laef blong yumi i olsem nating nomo.”1

Olsem ol visiting tija, yumi save kam, wetem tru hat, blong save mo lavem wanwan sista we yumi stap visitim. Blong givim seves long olgeta we yumi visitim, bae i kam olsem ia nomo, tru long lav blong yumi long olgeta (luk long Jon 13:34–35).

Olsem wanem nao yumi save save ol nid long saed blong spirit mo laef blong ol sista blong yumi blong yumi save givim seves long taem we i gat nid? Olsem ol visiting tija, yumi save kasem insperesen taem yumi prea from olgeta we yumi visitim.

Kipim kontak oltaem wetem ol sista blong yumi hem i impoten tu. Visit we i blong hemwan nomo, i stap, ringim hem, raetem wan not blong leftemap tingting, sendem imel long hem, sidaon wetem hem, givim wan gud toktok long hem from wan samting wetem tru hat, helpem hem long jos, helpem hem taem hem i sik o stap long nid, mo sam narafala fasin blong givim seves, evri samting ia i helpem yumi lukaot mo mekem wanwan long yumi i kam strong moa.2

Ol visiting tija oli blong ripot abaot laef, mo eni spesel nid blong ol sista, mo seves we oli givim long olgeta. Ol kaen ripot olsem mo seves long ol sista blong yumi i helpem yumi soem fasin blong yumi blong stap olsem wan disaepol.3

I Kamaot long Ol Skripja

Jon 10:14–16;3 Nifae 17:7, 9; Moronae 6:3–4

I Kamaot long Histri blong Yumi

Givim seves long wanwan i bin oltaem hat blong visiting tijing. Tru long seves we i stap gohed nomo, yumi karem i go, fasin ia blong stap kaen mo frensip we i bitim ol visit we yumi stap mekem evri manis. Fasin blong yumi blong stap kea nao, i moa impoten.

“Wanem we mi wantem, i blong askem strong long ol sista blong yumi blong stop blong wari blong mekem wan telefon kol o wan visit evri manis,” Meri Elen Smut i bin talem, we hem i namba 13 Rilif Sosaeti jeneral presiden. Hem i bin askem yumi blong “lukluk moa blong helpem ol sol we oli no strong.”4

Presiden Spensa W. Kimbol (1895–1985) i bin tijim, “Hem i impoten se yumi givim seves long yumi wanwan insaed long kingdom.” Be hem i luksave se i no evri seves we i nidim bigfala wok. “Plante taem, ol fasin blong yumi blong givim seves bae i olsem simpol wei blong leftemap tingting o blong givim wan samting … help wetem ol samting we i stap mekem oltaem,” hem i talem, “be ol gudfala risal oli kamaot … tru long ol smol wok, be ol wok we oli gat mining.”5

© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong Visiting Teaching Message, September 2012. Bislama. 10369 852

Ol Not

  1. Thomas S. Monson, “What Have I Done for Someone Today?”Liahona, Nov. 2009, 85.

  2. Luk long Handbook 2: Administering the Church (2010), 9.5.1.

  3. Luk long Handbook 2, 9.5.4.

  4. Mary Ellen Smoot, long Daughters in My Kingdom: The History and Work of Relief Society (2011), 117.

  5. Teachings of Presidents of the Church: Spencer W. Kimball (2006), 82.

Wanem Mi Save Mekem?

  1. Mi mi stap lukaotem insperesen we bae i kam long miwan blong save olsem wanem blong ansa long ol nid long saed blong spirit mo blong laef blong wanwan sista we oli givim wok long mi blong mi lukaotem?

  2. Olsem wanem ol sista we mi lukaotem oli save se mi kea long olgeta mo ol famle blong olgeta?