Kalohki Rongamwahuo sang Mohngiong ong Mohngiong

Koht pahn ketikihdi aramas me onopadahr mwohn Sapwellime soun papah kan me onopadahr oh men kalohki rongamwahuo. Met wiawihieng kumwailehr nan amwail mour. Uwen dod en soahng wet eh kin wiawi kin pahsan ma amwail madamadau oh mohngiong kaunopehr.

Mie kompoakapahi men me kin kapakapki rahn koaros pwehn tuhwong aramas emen me onopadahr en alehdi rongamwahuo. E kin weuwa ehu Pwuken Mormon. Ehu soutiko mwohn en pahn seiloak, e koasoanehdi me e sohte pahn wahda ehu Pwuken Mormon ahpw e uhd wahda ehu kisin likoun kalohk. Ahpw ni eh onohnop en mwesel, kapehm en ngehno kodohng ih: “Wahda ehu Pwuken Mormon.” Ih eri kihieng ehu pwuhk nan ah ehdo.

Ni ansou me lih emen me e kin ese mwohndi limwah nan ah seiloako, e medewe, “Ih aramaso me?” Liho pwurehng iang ih nan weren-nansapwohte ni eh pwurodohu. E medewe, “Ia mwomwen ei pahn koasoaiahieng rongamwahuo?”

Ahpw, liho me uhd peidek, “Komw kin pwain meiroang en eisek kis ehu nan omwi mwomwohdisoh, soh?” Ohlo sapengki me ei. Liho nda me e koasoandi ong pwain meiroang en eisek kis ehu nan ah mwomwohdiso ahpw e sohte kin kapwaiada. Ih eri idek, “Dahme ke kak ndahiengie duwen Pwuken Mormon?”

Ohlo eri kawehwe me pwuhko iei pwuhk sarawi, pil ehu kadehdepen Sises Krais, me kawehwehdi sang Soukohp Joseph Smith. Liho mwomwen men esehla, ohlo eri doahklong nan ah ehdo oh nda, “I alehdi kapehm en wahda pwuhk wet. I lamalam me komwi me e dokdoke.”

Liho tepida wadek pwuhko. Ni ara mweselpeseng, liho nda, “Kita pahn pwurehng koasoaia duwen met.”

Dahme kompoakapahio sohte kak ese—ahpw me Koht ketin mwahngiher—iei me liho raparapahki ehu mwomwohdiso. Koht mwahngihier me liho kin tetehk kompoakapahio oh kin medemedewe dahme ah mwomwohdisohu kin nohn kaperenihki. Koht mwahngih me liho pahn idek duwen Pwuken Mormon oh me e pahn pwungki ale padahk sang misineri kan. Liho onopadahr. Kompoakapahio pil. Komwi oh ngehi kak pil onopadahr.

Kaunop me kitail anahne iei nan atail madamadau oh atail mohngiong. Liho rongehr oh tamatamann mahsen me pid Pwuken Mormon, Sapwellimen Kauno Mwomwohdiso kopwurupwurdohu, oh kosonned en pwain meiroang en eisek kis ehu kan ong Koht. Oh e pehmehr tepidahn kadehdepen mehlelo nan ah mohngiong.

Kauno mahsanih me E pahn ketin kapwarehda me mehlelo ong nan atail madamadau oh mohngiong sang Ngehn Sarawi (tehk D&C 8:2). Pali laud en aramas me komw pahn tuhwong alehdier tepidahn kaunop wo. Irail rongehr de wadekehr duwen Koht oh Sapwellime mahsen. Ma mohngiongirail kan me mwuterek, irail kehnehr, menda ma tikitik, kamehlelpen me mehlelo.

Liho onopadahr. Pil kompoakapahio, Souleng en Imwin Rahno me onopikiehr Pwuken Mormon. E kehn me kadehdeo me mehlel, oh kasawiada kaweid sang Ngehno en wahda ehu pwuhko nindoken eh mwesemwesel. E kaunopadahr ah madamadau oh ah mohngiong.

Koht ketin kaukaunop aramas en alehdi omwi kadehde en kopwurupwurdohn me mehlelo. E ketin kupwurki omwi pwoson oh omwi mwekid en kasalehda ni soupeikasal dahme wiahlahr mehkot me inenen kesempwal ong komwi oh irail akan me komw poakohng.

Onopada komwi en kalohk ni omwi kin audaudki rahn koaros mehlel kan en rongamwahuo. Ni omw pahn kapwaiada kosonned akan oh wauniki omw inou kan, komw pahn kehn kadehde en Ngehno oh laudlahn limpoak en Sounkomouro ong komwi oh irail akan me komw pahn tuhwong.

Ma komw pahn wia omwi pwais, e pahn laudla omwi ahnsou mwahu en kin tuhwong aramas me kaunopehr en rong omwi kadehde pen me mehlelo—me kohsang omwi mohngiong kolahng arail mohngiong.