Kakabwaia n te Nakoanibonga A Tauraoi Nakoira Ni Kabane

Ngke e raira Ana Boki Moomon Iotebwa Timiti, ngaia ma ana tia koroboki Oliver Cowdery iai aia titiraki. A nakon te buakonikai n tataro ibukina. Ngke a tataro, te tia uarongorongo mai i karawa e ruo inanon te nang ae oota. Te tia uarongorongo aei bon Ioane te Tia Bwabetito. E katoka baina iaon atuun Iotebwa ao Oriwa ao n anganiia te Nakoanibonga ae te Aaron. Ioane te Tia Bwabetito e tuanga Iotebwa ao Oriwa bwa a na bwabetitoia bon irouia. N te tai ae aki maan imwiina, Abotoro aika Betero, Iakoba, ao Ioane a ruo nako aon te aba ao a katabua Iotebwa ao Oriwa nakon te Nakoanibonga ae te Merekitereka. Ana nakoanibonga te Atua e a manga roko riki nako aon te aba. Taraa Joseph Smith—History 1:68‒72.

Ti kona rinanon te nakoanibonga ni karekei kakabwaia ao otenanti aika tamaroa. Kakabwaia aikanne ti tebo ma ake anganaki ataei aika tibwa bungiaki, nakoia aoraki, ao nakoia ataei irouia tamaia ke tabeman kaain te nakoanibonga aika tau. Ti riai naba ni karekei otenanti n te nakoanibonga bwa ti na okira te Tama are i Karawa. Tabeua otenanti aikai a raonaki ma te bwabetito n te kateboaki, karekean ana bwaintituaraoi te Tamnei ae Raoiroi, ao otenanti n te tembora aika tabu ake a kona ni kabaeia utu nakon te maiu are akea tokina. Inanon naba te tembora, a kona otenanti ni karaoaki ibukiia aomata ake a tia ni mate n akea ana kakabwaia te euangkerio. A tauraoi kakabwaia n te nakoanibonga nakoia aomata ni kabane!