Amiga ae ko tangiraki

Mauri mai i Mexico! I rangi ni kukurei ni karekea am reta ao n ongora taekan am koronririki ae nang roko. E taraa n ae e nako nanom ngkai ko nang kitana te Moanrinan. I kona n tuangko ngke I nakon te Ataeinaine?

I raraoma ngke n nang kitana naba te Moanrinan. I nanokaawaki bwa rimwi a aki kona n reke raoraou. E nako nanou ngkai ti ngai te kabanea ni uarereke n ataeinaine irarikin are temanna te kabanea n ikawai.

Ma a bane n nakoraoi bwaai ni kabane. E intawiunai te bitiobi imwain au koronririki ao e tuangai bwa te bitaki bon te bwai ae tamaroa. N te Tabati, I namakina naba te maama ao n tiku inanon ruun te Moanrinan. I tekeraoi, bwa temanna te tia kairiiri irouia Ataeinaine e kuneai ikekei. E taku, “N au iango n na kuneko ikai! E uara, e a boo tain te nako n te kiraati.”

Titita Diaz e butimwaeai n tain te kaukuki, ao e anganai teniua booki ake I a moanna n tangiri: Ibukin Kakorakoraia Kairake, Oin Rikirakeia Ataeinaine, ao te tieno. Ngke I tarataranako inanon te ruu, I kunea bwa I ataia tabeman ataeinaine ikekei man te Moanrinan. Tabeman ataeinaine aika iaki kinaia a kamauri ni kangai hi nakoiu. N te tai ae aki maan I namakina te rau n onea mwiin te maaku.

A teimatoa n rikirake n nakoraoi bwaai imwiin anne. Waaki ni kakukurei ibukiia bootaki ni kairake a rangin n onoti nakoiu bukina bwa a tia n reireinai bwa n na kanga ni maiuakina te euangkerio ao n na kanga ni buokiia au utu ao raoraou. Ao te nakon te kaembwa ni katoa ririki bon te bwai ae kakukurei! Ngkai I a riki bwa kaain te Raurere, I kantaningaia bwa n na kabanea Oin Rikirakeia n te tai ae waekoa. I aki kona n tataninga te tai are n na bwaina iai te meetera n Ataeinaine n te aro are e na kauringai bwa e kanga rikirakeu ni kaan riki nakon Tamau are i Karawa inanon ririki aikanne.

Ngaia ae tai bwaina te maaku, raoraou. Bwaina te ungannano ao naako nakoia Ataeinaine. I berita nakoim bwa ko na bon aki nanokawaki.

Te Tangira

Maribel