Buokakiia Kairake n Rinanon te Maiu n Tamnei

Te Granja Viana Uoote n te São Paulo Brazil Cotia Titeiki a karekea aia reite n waaki ni kakukurei ae rietata irouia ana kairake n ataeinimwaane. Ma aia tia kairiiri e nooria bwa tabeman mai ibuakoia a kaitarai kanganga ni maiuia ao iai aia kanganga ni karaoan nakoaia n te nakoanibonga.

Imwiin ana reirei ma ngaiia te bitioburiki ao taan kairiiri irouia Kairake n Ataeinimwaane, a baireia bwa a na kabanea riki aia tai iaon aia waaki ni kakukurei iaon te mwakuri n ibuobuoki ao n aki kamwaitia iaon te kamataku ke te kaungaunga. Aio e ikotaki ma kawarakiia membwa n te kooram ake aki bati ni kakaonimaki, irakin te mwamwananga ma mitinare aika a bwanin aia tai, ao tibwatibwaakin te toa nakon mweengaia kaain te uoote. Waaki aikai a anganiia kairake n ataeinimwaane ni mwakuri iaon reirei ake a reiakin n te tieminarii ao ni katoa Taabati (taraa 2 Nibwaai 2:26).

N tokina, “waaki ni kakukurei iaon te tamnei aikai a karika mwiina ae tamaroa ae rangin korakora,” e riibooti temanna te tia kairiiri n te nakoanibonga.

“Ti bon miimii ngke n te Taabati n aki mamatam teuana, ni kabane ara kairake n ataeinimwaane a kaoti aia koaua,” e taku. “Ngke a karaoia, a mwaiti ibuakoia ae a kauringnga ma raanimataia man uaan te tamnei ae raoiroi ake a tia n namakinna n taai akanne. Temanna te kairake e tibwa ana namakin ni kabutan te toa nakoia membwa ake a kaara n ara uoote ake a wene n aia kainiwene inanon teniua te ririki. Kainnabana, te titita ae kakaonimaki, e butimwaea te kairake n ataeinimwaane ma te kukurei ao te kantaninga. Imwiin te otenanti, e tibwaa nakoia kukureireina are e namakinna ni maiuna ibukin te euangkerio ni katinanikui kanganga aika mwaiti ao kakaewenako ake e kaitarai. A namakina te Tamnei ao n ataa te bitaki are e karekea te euangkerio inanon maiuia aomata. Te namakin aei e rangi ni korakora n te aro are a ururingnga inanon ririki aika imwaira—tao inanon bongin maiuia.”

E kabwarabwara bwa e tuai man noonoora te aekaki ni kaeka anne man te “takakaro n te butibooro ke ana tairiki te Miutuo ae kamanga.” Ma, e taekinna, te namakin e reireinna kakawakin karikirakean te aekaki n namakin are a na kona n namakina iai te Tamnei te roronrikirake.

“Waaki ni kakukurei ni bootaki a kakaawaki,” e reitia. “Ma namakin n te tamnei a rangi ni kakaawaki ni buokakiia te roronrikirake ni karikirakei oin aia kakoaua.”

Ni katoa Taabati n te Rennes Uoote, Angers France Titeiki, Titita Delphine Letort, ae te Beretitenti irouia Kairake n Ataeinnaine, e katauraoa te kaati ni katoaia kairake n ataeinnaine ake a roko ao n tuangiia bwa a na rinea aia roro ae aki roko n taromauri ao ni koroboki nakoina. Te kairake n ataeinnaine e korea taekan te reirei n te wiiki anne—tera are a reiakinna ke tera are a kaungaaki iai—ai aron naba te waaki n iraorao, n te koroboki ae e onoti. Imwiina Titita Letort ke temanna ana kauntira e kanakoa te kaati n te meeri nakoia ake a aki taromauri.

Te waaki aei e beebete ma e rangi n ibuobuoki, e taekinna neienne, tiaki tii te kawai nakoia naake a aki iri n ataia bwa a uringaki ma nakoia naba naake a koroi taekana ni kauringaki n ururingiia riki i bon imarenaia.

“Bwa a riki bwaai aika a korakora man bwaai aika a uarereke man aki kaangaanga,” e taku (taraa Aramwa 37:6). “Ti a tia n nooria ni kamatataaki. Kairake n ataeinaine a tia ni kaungaaki, ao te namakin aei e a karekea rikiraken aia koaua.”

Aramwa e reirei bwa tataekinan ana taeka te Atua iai mwiina ae korakora (taraa Aramwa 31:5). David Elmer, te tia kairiiri irouia Kairake n Ataeinimwaane i Texas, USA, e ataa aio ao e tangiria ni kairiia kairake n ataeinimwaane te atatai ae rietaata n te mwananga n Tikauti n rinanon te namakin ae nano are e na kona ni buokiia nakon taai aika a na roko.

Tari Elmer e tataromwaaka ni iangoia bwa tera are e na kona n tibwaia ao ae e namakinna ni kairaki nakon te marooro mairoun Neil L. Andersen man te Kooram n Abotoro n te Tengaun ma Uoman. N te mwananga, Tari Elmer e reirei man te maroroo anne, n ikotaki ma te karaki are e tibwaia Unimwaane Andersen iroun Sidney Going, te titaa n te urakibii mai New Zealand are e katuka nakoana n te takakaro ibukin ana mwakuri ni mitinare. “Am mition bon te tibwanga ae e tabu n uotiia tabeman nakon Kristo ao ni ibuobuoki ni katauraoi ibukin manga okin te Tia Kamaiu,” e taku Unimwaane Andersen.¹

Te namakin e bon korakora, e taku te Tari Elmer, ibukina bwa e reirei man ana taeka te burabeti ae maiu. Ni banen te bootaki n taromauri, ni kabane kairake n ataeinimwaane ao taan kairiiri a tiainai araia iaon te booro n urakibii bwa te bwai n angaanano ao n nako ni mitinare n ana kauring are a tia n reiakinna ao n namakinna. Mwaitiia kaaro ao taan kairiiri a aki mamatu n te tairiki anne n marooro ma kairake n ataeinimwaane bwa e kanga aia mition n ibitii maiuia.

“Arora bon ana bwai te Atua; E atai aroia Ana roronrikirake,” e taku te Tari Elmer. “E atai aron maiuia ao aia kangaanga n te bwai are e riki nakoia ataei akanne. Ko bon aki kona n ataia bwa e kanga ni mwakuri inanon maiuia. Ngaia are ngaira aika taan kairiiri ti na katauraoi ao ni karekea te tabo teuana ibukiia bwa a na namakina te Tamnei. Ko kona ni karaoa anne rinanon koroboki aika a tabu ao rinanon aia taeka burabeti, ma bon te Uea, tiaki ngaira, are e mwakuri inanoia.

Tari Elmer e taekinna e tangiriia kairake n ataeinimwaane bwa a na uringa te bwai riki teuana n te mwananga: aia kamatebwai n te euangkerio a karaoia n taainako.

“I namakinna bwa iteran tibwangau bwa n na anganiia te namakin n namakina te Tamnei, ao ngkana I tangira anne bwa e na riki, I riai ni karaoa au itera ni baire ibukina. E taku “Unimwaane David A. Bednar e atia n reirei taekan karekean baeten n te tamnei inanon maiua, baeten n aron kamatebwaian koroboki aika a tabu ao kainutu n te tairiki.² Ao ngke ti nako n te wiiki anne, ti kateimatoai ara baeten ni maiura n tamnei. Ti tataro n ara kurubu. Ti katabeia kairake n ataeinimwaane bwa a na tibwai namakin n te tamnei n te moaningabong ibukin 10 te miniti, aoa aia taan kairiiri ao kaaro a katauraoi ibukin te tairiki.

“Te iango aei are e ngae ngke ti raroa man mweengara ao ara waaki a kaokoro man are ti taneiai ni karaoi, ara baeten ni maiu n tamnei aki uruanaki. Te kairake n ataeinimwaane e kona ke e aki kona n uringa te reirei teuana, ma au kantaninga bwa a na uringa te baeten are ti kateimatoa ni karaoan te taromauri ao te tataro ao te kamatebwai ni booki aika a tabu.”

Myra Bocobo Garcia mai Philippines e ata naba bonganan te waaki ae reitinako, ao e ata reiakinana e waaki man te mweenga. Titita Garcia ma kainnabana, Edwin, iai teniman natiia mwaane ao onoman natiia aine aika a moa aia ririki man 8 nakon 22, n tatabemaniia a kakaraoi waaki aika tamaroa. Ngkai anne e nanonna bwa a mwaiti aomata aika a nako ni kawai aika mwaiti aika kakaokoro, te utu e mwakuri korakora ni kateimatoa te amarake ni katairiki n ikotaki.

“Ni kuuka ao ni kukurei ni katauraoi amwarake ao n ikotaki n amwarake bon teuana te kawai ae tamaroa are ti ikotiia iai natira,” e taku Titita Garcia. E kabwarabwaraa bwa te tai n amwarake bon te tai ni kakukurei, reitaki ibon imarenara, ao ni kakaitau ibukin ana kakabwaia te Uea.

Jocelyn Fielden mai Nova Scotia, Canada, e taekinna bwa te reirei ae moan te kakaawaki are e reiakinna man kaikawaakiia natina aika onoman, ake a rinan aia ririki man 20 nakon 30, e aki ti irekereke ma te reirei ae kaineti ma e rekereke naba ma “karekean te eniwaromenta are ataei a kona n reiakina te koaua ibon irouia.”

“Tai waeteta ni karaoi aia rinerine ke ni kaekai ni kabane aia titiraki,” e taku. N onean mwiina, e katuruturua bwa kairakiia ataei “nakona koroboki aika a tabu ke reirei mai irouia ara burabeti ibukin kairiiri ao kaeka.” E reitia, “Ao tauraoi ni maroroakin bwaai ake a kunei.” N reitia, ngkana e karekei titiraki mai irouia natina, n tabetai e kaekai man anganna moa titiraki ibon irouna: “Tera ae ko iangoia bwa ko riai ni karoia?”

“Kakoaua bwa a na bon karaoi rinerine aika eti,” e taku. “Ngkana ti buokiia natira n reiakinna n ata te Tamnei inanon maiuia inanon tain reirei aika a mwaiti are ti karaoi ni katoabong ma ngaia ao ngkana a ataia bwa aekakira namakinan te Tamnei, e na riki bwa kawai ibukiia n ukoukorii namakin riki n te tamnei, ao e na kakorakorai aia koaua ni koauan Tamara are i Karawa ao Natina, Iesu Kristo. E na karekea butin te bitaki: korakoran namakina te ota ao ana karaunano te Tamnei are e uotia, mwaitin are a na kan karekea ao ni kataia ni karaoi bwaai are e na karekea riki te Tamnei ae mwaiti inanon maiuia.”

E rangi ni waekoa ni kotei reirei ake a nakoraoi ni maiun te utu ibukin bon ake a toki n kaokioki taan kairiiri n te Ekaretia. Te katooto, E taekinna bwa ngkai tabeua reirei a kona n reke n tain te marooro ae kinaaki n aron ake a riki n te kainutu n te tairiki, kamatebwai n koroboki aika a tabu, ao tataro n utu, kaaro akona ni kairaki iroun te Tamnei n tarai taai ibukin te anga reirei.³

“Te nako n rianna, buti ni kaei waaki ni kakukurei, karin booro [te bwatiketibooro], aia tai n amwarake te utu, te mwakuri n ikotaki, anene, ao buokakiia tabeman bon tabeua waake ake e kona ni karaoa iai te angareirei n te euangkerio inanon ara utu,” e taku neiei. “Taekinan taobiki n te euangkerio n tainako bon te bae e ririki ngkana ti kabaeaki ni waaki ni kakukurei tabeua.”

Imwiin ana angabeebwa man te Brigham Young University–Hawaii, KaYan Danise Mok e okira mweengana i Hong Kong ao e karekea nakoana bwa te Beretitenti irouia Kairake n Ataeinnaine. Ngke e tabe ni kataneia ni mweengana, ni waakina ana mwakuri, ao n reita ana kamatebwai n reita reireina, e tataro ma nanona ae korakora ibukin te kairiiri ni buokiia kairake n ataeinnaine are e mwakuri ma ngaiia ao ni karikirakea aia koaua ni katauraoia ibukin taai aika a na roko.

N te Taabati teuana ngke e reirei taekan aro ae akea tokina, Titita Mok e namakina te wirikiriki bwa e na wareka ana Boki Moomon ma te kairake n ataeinnaine temanna, are e riki bwa tii ngaia n te taromauri n te bong anne.

“Ngai ma au kauntira ti waekoa ni kaeka ni katea te kouru ni kabanea ana Boki Moomon n te tiim ma kairake n ataeinnaine.” Titita Mok e taku. “E butimwaea te kakaewenako n aki rawa ngkai ti na katia te kouru ni bootaki.”

Man te tai anne, Titita Mok, ana kauntira, ao te kairake n ataeinnaine aei a katea aia “titem n iraorao” iaon te Beitiboki ao ni kanakoi koroboki n rongorongo ni kauringiia imarenaia n te wareware ao n tibwaia imarenaia te bwai are a reiakinna.

Titita Mok e taekinna bwa e noora te bwai ni kakoaua n te bitaki ae korakora ni maiun te kairake n ataeinnaine aei man kamatebwaian koroboki aika a tabu. Ao ngke e wareka te boki ae tabu Titita Mok ni katoabong iaon mwananga n te turein, ngaia naba e kunei kakabwaia ibukina. “I namakina naba te Tamnei ao ni karekei kaekaan au tataro ngke I waakinako inanon maiu.” E taku.

“N au namakin, tabeman kairake a raraoma ao n namakina te aki koaua n ataia bwa a kona ni karekea te kakoaua ao ni karekea te namakin n te tamnei n aroia tabeman,” e reitia. “Man te bootaki ni mwakuri ti kona ni kakoaua nakoia n ara mwakuri bwa aio e mwakuri ao ti mena ikekei ni boutokaia ni katoai mwanekan kawaia.”