Ena Sega Beka ni Rawa Meu Papitaiso Talega?

Nuno kei Miriam, e rawa mo drau muria na ivakaraitaki i Jisu Karisito ka papitaiso ena Vakarauwai mai oqo?” Taroga o Sisita Silva.

Sega ni vakabauta o Paulo na ka e rogoca. O irau na sisita daukaulotu e rau se qai sureti tacina tagane yabaki 10 kei na tacina yalewa me rau papitaiso!

“Io! Io!” rau kaya na drua ena mamarau.

E sega ni tarova rawa o Miriam nona matadredredre. A sabica o Nuno na ligai Sisita Lopes. A dredre toka mai nodrau Bubu ena nona idabedabe damudamu ena tutu ni vale.

Sa vica na macawa na nodrau vakavulici Paulo tiko kei ira na tacina ena vale nei Bubu o irau na sisita daukaulotu ena yanuyanu drokadroka, cagicagi e São Miguel—1,000 na maile (1,600km) na kena yawa mai na vanua levu o Portugal. E dau taleitaka o Paulo me dolava na veimama e cake ni imatai ni katuba nei Bubu ka vakila na cagi ni wasaliwa ena nona vakaraici Sisita Lopes kei Sisita Silva ena nodrau taubaletaka mai na gaunisala ka mai vakavulici koya ena kosipeli.

E rau kaya na sisita daukaulotu ni na dua na lesoni kilai tani nikua. Sa qai kila oqo o Paulo na vuna. E rau sa na papitaiso o Nuno kei Miriam, me vaka a vakavulica o Jisu! A vinakata tale ga o Paulo me muria na ivakaraitaki ni i Vakabula.

“Kemudrau na sisita, e rawa tale ga meu papitaiso ena Vakarauwai mai oqo?” a taroga yani ena vakanuinui, ni roqota matua tu nona i Vola i Momani vakaiyaloyalo.

A matadredredre o Sisita Silva ka kurea na uluna. “Vosoti au, Paulo. E tukuna vei keirau na Turaga ni gadrevi vei keda kece meda qai papitaiso ia me yacova sara ni da sa yabaki walu oti. Baleta ni o se qai yabaki ono wale ga, e se bera ni rawa mo vakayacora nomu digidigi.”

“Ia, kemudrau na sisita,” a saqata yani o Paulo, “Au masulaka ka wilika tiko na i Vola i Momani vata kei na noqu matavuvale, me vaka o drau vakavulici au kina. Ena veimacawa au lako ki na Lalai vata kei Bubu kei Momo Mário. Au kila ni dina na Lotu! E sega ni rawa meu papitaiso vata kei Nuno kei Miriam?”

“O sa cakava e dua na cakacaka vinaka nomu bulataka na ivakaro ka vulica na kosipeli,” kaya o Sisita Lopes. “Ia e se gadrevi tiko ga mo se tei wawa tale mada me rua tale na yabaki ni bera ni o qai papitaiso.”

Sa tekivu kama na itilotilo nei Paulo, ka luvuci ena wainimata katakata na matana. A lade cake ka cici ki nona rumu ena doka ni vale, ka lai moce vata kei ira na tacina lalai.

Ni oti e vica na miniti nona tagi ena nona ilokoloko, a rogoca o Paulo ni dua e kabata tiko mai na ikabakaba ni doka ni vale. A dabe o Momo Mário ena idavodavo nei Paulo.

“Na cava sa yaco, Paulo?” Taroga o Momo Mário.

“E rau kaya o Sisita Silva kei Sisita Lopes ni sega ni rawa meu papitaiso, ia o Nuno kei Miriam e rawa,” kaya o Paulo. “Au vinakata meu lewe ni Lotu! Au taleitaka na lagata na serenilotu ena soqoni ni sakaramede ka vulica na ivolanikalou ena Lalai. Au sega ni via biu laivi tu mai.”

“Paulo, e se rawa tiko ga mo dua na tiki ni Lotu, kevaka mada ga o se bera ni matua sara mo papitaiso,” a kaya vakamalua o Momo Mário.

“E Caka Vakacava? A mamakeukeu yani ena nona ilokoloko o Paulo.

“Ia, o sa kila ni Lalai e sa vakarautaka tiko e dua na parokaraumu ena soqoni ni sakaramede,” kaya o Momo Mário. “E kaya vei au nomu qasenivuli ni Lalai ni vakasaqarai ira tiko na voladia me ra wasea nodra ivakadinadina ena parokaramu. E dua na sala oqori e rawa mo vakaitavi kina ena lotu,” a vakamacalataka o Momo Mário.

“E dina?” A duri cake o Paulo ka qaravi nona momo. A vakasama ena dua na miniti. “De rairai rawa meu wasea tale ga noqu ivakadinadina ena nodrau lotu ni papitaiso o Nuno kei Miriam!”

“Sa dua sara na vakasama totoka oqori!” Kaya yani o Momo Mário. “E dina ga ni o se rui gone mo papitaiso, e se rawa tiko ga ni dua nomu ivakadinadina.”

A lade mai nona idavodavo o Paulo ka vakatotolo sobu sara ki na ikabakaba.

“O lako kivei, Paulo?” Kaci mai o Momo Mário.

“Au lako meu lai vakatovotovotaka noqu ivakadinadina kivei rau na daukaulotu!” A kacivaka lesu mai o Paulo ena mamarau. “Au sa na laki wasea ena noqu waraka tiko meu papitaiso!”