Na iVola i Alama: Lesoni Nikua

Mai na nodra bolebole taucoko, era a vakaukauwataki rawa na Nifai yalododonu ena vuku ga ni ra a cakacaka tiko ena inakinaki dodonu. Sa nodra inaki vakatabakidua o ya mera “taqomaki ira, taqomaka kina na nodra vuvale, na nodra qele, na nodra vanua, na nodra galala, kei na nodra lotu” (Alma 43:47). Era sa gadreva kina mera taqomaka na nodra galala—na dodonu me cakava na ka dodonu ka mera dui sauma ga na nodra ivalavala—ka kakua ga ni vakatulewa na tui ki na nodra ivalavala. Sa nodra inaki me taqomaki na nodra sa tautauvata ga ena ruku ni lawa, vakabibi na galala mera sokalou vua na Kalou ka maroroi na nodra lotu (raica na Alama 43:9, 45).

Era tiko ka ra dau tiko ga na ito kaukauwa eso ena kedra maliwa na tamata era saga mera moica na nodra vakasama na lewenivanua mera tu kaukauwa kina ka rawa-ka vakai ira. E veitemaki toka na kena vakamuri na nodra inaki oqo ka vukici na veisaqasaqa oqo me laki dua na sasaga ni veiliutaki. Sa tudei tu ga na sala ni Turaga o ya na vakayaco-ka e vakayavutaki ena gagadre kei na inaki savasava, me vakataki ira na Nifai. Ni ra vakayacora oqo era sa ciluma vei ira na kaukauwa kei lomalagi me ra vorata rawa na nodra ibolebole “ena yaca ni Turaga” (Alama 46:20; raica talega na Alama 60:16; 61:18).

Sa vakakina, ni da bolea yani na ibolebole eda sotava nikua, sa gadrevi ena veigauna meda ilova mada na yaloda meda vakadeitaka ni sa savasava na noda gagadre kei na noda inaki ka sa vakayavutaki tu ena ivakavuvuli ni kosipeli i Jisu Karisito. Kevaka meda vakayaco-ka (se moici ira eso mera vakayaco-ka) ena yalo kocokoco, me baleti keda ga, se vakatorosobutaki ira eso, ena sega ni tiko vei keda na veivuke vakalomalagi meda vorata rawa kina na noda ibolebole.

Ena gauna era sa vakarerei kina, mera vakarusai, o ira na kedra meca, na Anitai-Nifai-Liai, era sa vakadonuya na Nifai me soli vei ira e dua na vanua mera tiko kina ka tara cake vou na nodra bula ka vakarautaka vei ira na veitaqomaki (raica na Alama 27:21–22; 43:11–12). Ena vuku ga ni ra sa bubuluitaka na Anitai-Nifai-Liai ni ra sa sega tale ni cola iyaragi ni valu, era sa qai “veivuke ena nodra vakani” (Alama 43:13) na mataivalu ni Nifai ena gauna voravora oqo. Ia, e sega ni tiko e dua na ivakadinadina ni a vakatani na nodra veimaroroi na Nifai vei ira na vulagi oqo ia ena veidokai kei na loloma ga, e dina ga ni sa rawa mera vakayagataki vakarawarawa ena inaki vakapolitiki mai vei ira era saga na tiko veisei.

Na caka vinaka era a vakayacora na Nifai vei ira na Amoni, e a qai yacadra e muri, a laki vakavurea ka yaco sara me tauyavutaki kina e dua vei ira na mataivalu veivakaukauwataki duadua ena itukutuku ni veigauna— o ira na 2,000 na sotia cauravou. Sa rawa ni tukuni, ni nodra veiqaravi na cauravou oqo e a vakavurea mera taqomaki na lewe i Nifai mai na kena vakarusai vakatotolo.

Ena gauna ni veisei vakai keda ga, na veiravuravuti mai tuba, kei na ibolebole ni bula vakailavo, e dau yaco meda yalo ca vei ira “era sega ni vakataki keda.” E rawarawa sara meda vakacacani ira ka vakalewai ira. Ena taroga beka e dua na nona dina kei na nona yaga ki na itikotiko raraba kei na nodra cau ki na noda bula raraba vakailavo. Na itovo vakatani vakaoqo e bocini kina na veivakaduiduitaki, veisei, kei na veivakatikitikitaki, ka ra sega ni salavata kei na ilesilesi mai vua na Vakabula o ya meda lomani ira na wekada me vakataki keda. Ke a sega beka ni ra ciqomi na Amoni ki na nodra itikotiko na Nifai, e a rairai rawa beka ni vakavurea na veicacati ka sega ni yaco na nodra vakavinavinaka na kawatamata sa tubu cake tiko mai. Ke a sega ni tauyavutaki na 2,000 na sotia qaqa, a rawa sara ga me qeavu yani vakadua na itabatamata vou oqo ka ra lesu vei ira na Leimani.

Na gagadre me caka vinaka ka lomasoli vei ira vakaleqai a dua na tiki bibi ki na kena taqomaki na matanitu i Nifai ka rawa kina vei ira na Nifai mera vakalougatataki mai lomalagi ena nodra gauna dredre duadua. Era gadreva tu nikua na tamata ni Kalou na veivakalougatataki vakaoqo.

Sa kila tu na Turaga na ibolebole era na sotava na Nifai, a qai vakatubura eso na iliuliu vakauqeti vakayalo mera vukea na kena vorati rawa na bolebole oqo. E dua na liganiwau o Kavetani Moronai ia a vakauqeti vakayalo me vakarautaka na isasabai ni seredra, isasabai e ligadra, isala kaukamea, kei na isulu vavaku me taqomaki ira kina na nona tamata. (raica na Alama 43:19). Ena vuku ni ka oqo, era a gugumatua cake kina ena ivalu o ira na Nifai mai vei ira na Leimani (raica na Alama 43:37–38). Ni oti o ya, a vakasalataki ira na tamata o Moronai mera buluta cake wavoki ena qele na nodra koro lelevu ka mera qai taqa ena qele oqo na vatavata kau kei na duru momoto. (raica na Alama 50:1–3). Na vakavakarau vakauqeti vakayalo oqo a vukea na nodra sega ni vakarusai na Nifai.

Ena gauna sa vakavakarau tiko kina ena ivalu o Moronai, e ratou a vunautaka tiko kina na vosa ni Kalou o Ilamani kei ira na tacina ena gauna oqo mera ivalavala dodonu na tamata me rawa ki na Yalo ni Turaga me veidusimaki ka taqomaki ira. Ena nodra vakarorogo ki na nodra veidusimaki vakayago ka vakayalo na iliuliu veivakauqeti, era a taqomaki kina na Nifai. Ena gauna ga era dau veicacati kina vakai ira era sa bese kina ni vakarorogo na tamata ki na ivakaro veivakauqeti vakayalo ka yaco kina na veivakataotaki kei na rarawa.

Eda sa kalougata ni da mai bula voli ena dua na gauna sa mai kacivi ira na parofita bula, daurairai, ka daunivakatakila na Turaga mera vakaroti keda meda vakavakarau ki na bolebole ni gauna oqo. Ena 1998, a veivakasalataki ka veivakaroti kina ena veivakauqeti vakayalo o Peresitedi Gordon B. Hinckley (1910–2008) vei ira na lewe ni Lotu:

“Sa yaco mai na kena gauna meda sa tuvanaka kina vakadodonu na noda vuvale.

“E vuqa vei ira na noda era sa bula sara tikoga ena ivovo ni kedra isau ni cakacaka. Na ka dina, ni so era dinau tiko mera bula kina. …

“Na bula vakailavo a kakavorovoro rawarawa. … Sa tiko oqo e dua na ivakatakilakila ni dua na draki voravora meda na qaqarauni kina.”²

Dua na gauna sa oti keirau a veivosaki kei na dua na turaga ka a rogoca na vosa nei Peresitedi Hinckley kei na veivakauqeti ni Yalotabu. Rau a lewa vakaveiwatini me rau sa volitaka na nodrau kabani, ka sauma vakaoti na nodrau vale, ka vagalalataki rau mai na dinau.

Nikua sa bula rawati koya sara tu ga na turaga o ya. Na leqa ni bula vakailavo a tarava mai a sega sara ni vakaleqai kina na nona matavuvale. Na ka dina, ni nona bularawati koya a rawa kina vua kei watina me rau laki kaulotu.

A vakatuburi cake mai o Peresitedi Thomas S. Monson ena vuku ni noda gauna oqo. Na nona bula kei na nona ivakavuvuli sa itukutuku mai vua na Kalou me taqomaka ka vakalougatataki keda nikua. Ena gauna era dau lomaleqataka kina e vuqa na veika e sega vei ira, e vakavulica vei keda o Peresitedi Monson meda vakavinavinakataka tikoga na vuqa na veivakalougatataki sa solia tu vei keda na Turaga. Kei na gauna era dau solegi kina e vuqa ena nodra dui leqa, e vakamasuti keda kina o Peresitedi Monson meda gole yani ka laki veivueti, guilecavi keda ka vakalougatataki ira tale eso. Ni da vakamuria na ivakasala nei Peresitedi Monson ena vakarautaki na noda matavuvale ena veitaqomaki vakayalo kei na veivakalougatataki e gadreva ena noda gauna oqo.

Au vakavinavinaka meu mai bula voli ena gauna vakaoqo sa vakalesuimai kina na kosipeli. Au vakavinavinaka ni sa mai vakarautaka na Turaga na iVola i Momani me baleta na noda gauna oqo. Era a vosota ena yalodina na Nifai na veivakatovolei ni nodra gauna ka ra sa ivakadinadina bula ni na vakarautaka na Turaga na veivakalougatataki kei na veitaqomaki eda sa gadreva meda bolea yani na ibolebole ni noda gauna oqo.