Meu Digia Beka na Cakacaka se Lotu?

Au a vakamau kei watiqu ena 1981 ena Valetabu mai Tokyo Japani. A sega ni rawarawa na itekitekivu ni neirau bula vakamau. Au sa vakavinavinaka vakalevu ni sa dua na noqu cakacaka, ia se leqa na ilavo ni veika me saumi. Keirau sa qai kerea na Nona veivuke na Tamada Vakalomalagi ka cakava na veika kece keirau rawata me saumi ka sauma na neirau ikatini. Keirau kila ni kevaka me keirau vakararavi vua na Turaga, ena veivakarautaki vei keirau o Koya.

Ena dua na macawa rau a kauta vata mai o watiqu kei noqu itokani e dua na tiki ni itukutuku vata ga mai na niusipepa. Oqo e dua na itutu ni qasenivuli ni Vosa Vakavalagi e lala tiko.

Au a vakauta sara na noqu itukutuku ni kila vakacakacaka kau sa kerei meu gole yani ki na initaviu. Ni vakarau oti na initaviu, a kaya sara mai dauinitaviu tiko, “O vola tiko ena nomu itukutuku ni kila vakacakacaka ni ko a cakacaka vakavolodia mo daukaulotu ni Lotu i Jisu Karisito ni Yalododonu Edaidai. Sa kena ibalebale o ya ni ko dau laki lotu ena Siga Tabu, se vavei? Kevaka mo na digitaka mo gole ki lotu se mo cakacaka ena Siga Tabu, o cei o na digitaka?”

Sa dua dina na taro dredre baleta niu sa gadreva dina e dua na cakacaka vinaka. Ia niu vakasamataka oti, au a sauma, “Au na gole ki lotu.”

Ena matadredredre veilecayaki, a kaya mai o dauinitaviu, “Oi, sa dina.” Sa qai vagalalataki au ka yalataka ni na qai vakatulewa na kabani ena yakavi o ya ka meu na qai qiri me baleta na kena macala. Niu sa curu i tuba, au sa vakasamataka niu sa na sega ni digitaki.

Ni roro mai na yakavi ka sa gauna meu qiri kina, au sa qirita sara na naba ni kabani o ya ena rere levu ni yaloqu.

“Sa vakacava beka na macala ni initaviu?” Au a taroga vei sekeriteri. “Au sa sega beka ni digitaki, se vavei?”

Au a kurabui ka marau ena isau ni taro o ya.

“Keitou gadreva mo ni mai cakacaka vei keitou,” a kaya mai o sekeriteri.

Ni qai oti e dua na vula au sa qai kila tu kina na vuna au a taura kina na cakacaka o ya. A vakamacalataka o sekeriteri ni o dauinitaviu e tiko veitikivi kei rau na daukaulotu ni Lotu i Jisu Karisito ni Yalododonu Edaidai. E dau raici rau tiko na daukulotu ni rau vodo basikeli ki na nodrau cakacaka ena mataka lailai.

“E vakabauta o koya, ni ko lewena talega na Lotu o ya, ko na cakacaka vagumatua talega vei keitou vakataki rau na daukaulotu me baleta na nodrau lotu,” a kaya o koya. “O sa kalougata!”

Mai na siga o ya sa dau tiko ena neitou matavuvale na veika keitou gadreva.

Ena gauna au dau vakasamataka kina na noqu digidigi o ya, au dau vakayaloqaqataki ka vakacegui. Au kila ni Kalou sa dau vakayagataki ira vakalevu na tamata mera vakalougatataki ira na Luvena. Au na sega ni vakamacalataka rawa na noqu vakavinavinaka vakalevu ki na nodrau veivakauqeti o watiqu kei noqu itokani ena nodrau kauta mai vei au na itukutuku mai na niusipepa, na nodrau cakacaka vagumatua na daukaulotu kei na nodrau ivakaraitaki cecere, kei na loloma veivueti, dauloloma, ka dauveikauwaitaki nei Tamada Vakalomalagi, o koya sa tu Vua na kaukauwa ni cakamana me vakatabuya na veika eda sotava meda vinaka kina.