Iren Mahsen en Presidensi Keieu, Oaktohpe 2012
Ehu Ire Kesempwal ong Peneinei me Peren
Sounnting ndand sang Russia Leo Tolstoy tapihkihda nah pwuhk Anna Karenina lepin mahsen pwukat: “Peneinei peren koaros duwepenehte; peneinei nsensuwed koaros kin wekpeseng ni arail nsensuwed kan.”1 Ni ahi sohte dehdehki mwahu duwehte Tolstoy me peneinei peren koaros duwepenehte, I diarada me mie mehkot irail koaros ahniki me duwepenehte: irail kin ahniki mahk oh kin manokehla souitar en mehteikan oh kin rapahki me mwahu.
Peneinei nsensuwed kan, kin uhd, kalapw rapahki sapwung, kin sohte kak mahk, oh sohte kin kak manokehla sapwung kan en mahs.
“Ei, ahpw …” irail akan me nsensuwed kin nda. “Ei, ahpw ke sohte ese ia uwen eh kamedekeiehla,” emen kin nda. “Ei, ahpw ke sohte ese ia uwen eh sakanakan,” emen tohrohr kin nda.
Mwein koaros pwung; mwein sohte rehra me pwung.
Mie dake tohto en dihp. Mie dake tohto en medekla. Ahpw me I diarada iei me kitail kin kalapw pitihki pein kitail me atail lingeringero pwung pwehki mwekid peirin en mehteikan sohte me kak mahkehng, ni ansouohte, kitail kin nda me kitail me pwung oh mwakelekel.
Sapwellimen Sohpeidio Kidio
Mie soai pwoat sang Wales nan sounpar 1200 kan me pid ohl sohpeidi men me pwurodo nihmweo oh diarada nah kidio nta kerekerdihsang pohn meseo. Ohlo tangolong nan ihmwo oh, ni eh salohda, kilang me nah kisin pwutako sohte mie oh ah pehto wekidekidi. Sohpeidio lingeringerda ih ale nah kedilahso oh kemehla nah kidio. Sohte pwand, e rongada ngilen nah pwutako—nahn serio momour! Limwahn seri pwelelo wonohn kidienwel men me melahr. Nein ohlo kidio, ni mehlelo, doarehla seri pwelelo sang kidienwelo.
Soai pwoatet mwein ekis doar, ahpw e kasalehda ehu iren karasaras mwahu. E kasalehda me soai me kitail kin pein ndahieng pein kitail me pid duwen mwekid en mehteikan kin ekei pak sapahrek ong dah me mehlel—ekei pak kitail sohte kin men ese dah me mehlel. Kitail kin men medewe me e pwung kitail en wie mwemwehl oh kolokol atail nsensuwed oh lingeringer. Ekei pak kitail kin kolokol atail lingeringer lel sounpwong de sounpar. Ekei pak erein mour.
Peneinei Nanpwungsuwed
Emen pahpa sohte kak mahkehng nah pwutako pwehki e wetsang nan ahl me e padahkihong. Pahpao sohte pwungki kompoakapah kan en pwutako, oh pwutako kin wia soahng tohto me weksang dahme ah pahpao leme me e konehng wia. Met kahrehiong pahpao oh naho ara sohla ehupene, oh ansou me pwutako koahiekla, e kohkohla oh sohla pwurala nihmweo. Ira sohla kin koasoaipene.
Pahpao leme me e pwung? Mwein.
Pwutako leme me e pwung? Mwein.
Ihte me I ese me peneinei wet nanpwungsuwed oh nsensuwed pwehki pahpao oh naho sohte kak mahkpene. Ira sohte kak manokehla iren ketemen kansensuwed kan me ira ahniki me pid emenemen. Ira audehkihla mohngiongira lingeringer ah kaidehn limpoak oh mahk. Ira koaros pein soikala ara ansou mwahu en kaweidmwahuih ara mour. Uwen laud en ara nanpwunsuwed me emenemen ira pein saliedi pali ngene oh kelekelehpw pohn sapwe kisin deke en nsensuwed.
Paiamwahu, pwe Samatail Nanleng Soutuk me limpoak oh eripit ketkihdahr ansou mwahu pwehn powehdi nanpwungsuwed wet. Tomw lap oh soutuko me wia mwekid keieu laud ni mahk oh kamwahu. Menen tomwo dauliala uwen me I kak wehwehki, ahpw I kadehde sang ni mohngiongi oh ngeni unsek duwen eh mehlel oh manaman unsek. Sounkomour ketkihda pein Ih pwehn pwainla dipatail kan. Sang Ih kitail kin alehdi mahk.
Sohte Peneinei me Unsek
Sohte rehtail me sohte dipe. Kitail koaruhsiehn kin wiahda sapwung, iangahki kowe oh ngehi. Kitail koaros medekilahr. Kitail koaros kamedekehlahr mehteikan.
Iei sang ni meiroang en atail Soukomouro me kitail kak kesepwilda oh alehdi mour soutuk. Ni atail kin alehda Sapwellime ahl oh powehdi atail pohnmwahso sang ni mwuterekla en mohngiongitail kan, kitail kak wahdo pwung oh mahk nan atail peneinei kan oh nan pein atail mour. Koht kak ketin sewese kitail en kalaudehla atail mahk, en inengieng aluhki keriau en mwailo, en tepin pekimahk mehnda ma kaidehn atail sapwung, en pwilikihdi oh kesehla nsensuwed kan. Kalahngan ong Koht, me ketkihda Sapwellime Iehros, oh ong Iehroso, me ketkihda Sapwellime mour pwehki kitail.
Kitail kak pehm sapwellimen Koht limpoak ong kitail rahn koaros. Kitail sou konehng tohnmeteiki pein kitail ong iengatail aramas akan duwehte me koul en sarawio kosoia “Because I Have Been Given Much” [Pwehki Ahi Alehdier Soahng Tohto]?2 Kauno ketin langahdahr wenihmw pwe kitail en kak alehdi mahk. E sou pahn pwung kitail en pwilikihdi pein atail pohnmwahso oh tepida ritingada wenihmw kapai en mahk ong irail akan me kitail kin uhweng—ahpw ni mehlelo ong pein atail peneinei?
Ni imwilao, peren sohte kin kohda sang ni mehkot me unsek ahpw sang ni doadoahngki tepin padahk sarawi kan, mehnda ma ni ekis ekis. Presidensi Keieu oh Pwihn en Wahnpoaron Ehk-riemeno mahsanihier: “Peren nan mour en peneinei kin keieu kak pweida ni eh pahn poahsoankihda padahk kan en Kaun Sises Krais. Pwopwoud kan oh peneinei kan me kin pweida kin kokouda oh kin wie epwehpwel sang ni padahk kan en pwoson, kapakap, koluhla, mahk, waun, limpoak, poakehla oh tetehk mehteikan, doadoahk, oh kemweit mwahu kan.”3
Mahk mih nan werengen me mehlel koaros, me poahsoankihda sapwellimen Samatail Nanleng pilahn en peren. Pwehki mahk eh kin kadokehpene padahk kan, e kin kadokehpene aramas. E wia kih, E kin ritingada wenihmw me loak, E wia tepidahn ahl en mour mehlel, oh E wia koapwoaroapwoar keieu mwahu ong peneinei peren.
Koht en ketin seweseikitail en kalaudehla mahk nan atail peneinei kan, ahpwete mahk ong emenemen, oh mwein pil ahpwete mahk ong pein kitail. I kapakapki kitail en ahniki irair en mahk me wia wiepe kaselel ehu me pali laud en peneinei peren kan kin ahniki.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, October 2012. Pohnpeian. 10370 885
Padapadahk sang Iren Mahsen Wet
“Ni omw pahn kaunop ehuehu padahk, pein peidek rehmw ma ia duwen padahko eh pahn rasehng irair me peneineio pein lelohngehr nan arail mour.” (Teaching, No Greater Call [1999], 171). Medewe en luke tohn peneineio en ehukihpene irair mwahu kan me re ahnikihier de me re kilangehr me pid mahk. Koasoaia irair pwukat, oh nsenohki kasalehda mwahu kapai kan en mahk. Keimwsengkihla omw kihda kadehde duwen kesempwalpen mahkehng emenemen.