I Riai n Rinea te Mwakuri ke te Ekaretia?

I mareaki ma kainnabau te aine n 1981 n te Tokyo Tiabaan Tembora. E aki rangin bebete aron maiura n taanga n te moantai. I kakaitau n reken au mwakuri, ma iai ara kangaanga ni kaitaraakin ara kabanemwane. Ti bubutia te Tama are i Karawa ibukin Ana buoka ao ni karaoa ara kabanea ni konaa ni kaaitarai kainnanora ao ni kabwaka ara kabwianibwai. Ti ataia bwa ngkana ti onimakina te Uea, E na katauraoi bwaai ibukira.

Teuana te wiiki kainnabau te aine ma raoraou a uota nakoiu te rongorongo ae titebo man te nutibeeba. Bon te katanoata ibukin te tia reirei n te Ingiriti ae bwanin ana tai.

I kanakoa au retiumee nakon te kabwana ao mani butiaki n roko ibukin te intawiu. N tokin te intawiu, e taku te tia karaoa te intawiu, “Inanon am retiumee ko koreia bwa ko a tia n ira buakon te mwakuri n anganano n aron te mwakuri ni mitinare ibukin Ana Ekaetia Iesu Kristo ibukiia aika Itiaki ni Boong aika Kaitira. Are nanona bwa ko nanako n taromauri n te Taabati, ko aki? Ngkana ko baireia bwa ngkana ko na nako n taromauri ke ni mwakuri n te Taabati, e a ngaara ae kona rineia?”

Bon te titiraki ae matoatoa ibukina bwa I kainnanoa te mwakuri ae tamaroa. Ma imwiin iangoakina raoi, I kaeka, “N na nako n taromauri.”

Ma te moangare ae aki mataataraoi, e taku te tia karaoa te intawiu, “O, I nooria” Imwiina ea kainaomataai ma te berita bwa te kambwana e na karaoa ana babaire n te tairiki anne ao bwa I riai n tareboon n ongongora mwiin te bwii. Ngke I kitana te ruu, I taku bwa I aki bwaati.

Imwiina n te tairiki anne ngke e a roko au tai n tareboon, I a orea nambwan te kambwana ma te maaku ae korakora.

“E uara mwiin te intawiu?” I titirakina te tia koroboki. “I aki bwaati, I aki?”

I tounako ma I kukurei n ana kaeka.

“Ti kani butiiko bwa ko na mwakuri ibukira,” e taku neierei.

Tao teuana te namwakaina imwiina I reiakinaki bwa e aera ngkai e a reke au mwakuri. E kamataata te tia koroboki bwa te tia karaoa te intawiu e maeka irarikiia mitinare aika a bwanin aia tai aika kaain te LDS. Angin te tai e mamatakuakiniia mitinare ni buti n aia bwatika n nako ni mwakuri n te moaningabong koraki.

“E kakoaua bwa ngkoe, kaain te aro ae ti te arona, ko kona ni mwakur korakora ibukira n aroia mitinare ni mwakuri ibukin aia aro,” e taku. “Ko tekeraoi!”

Mai mwiin te tai anne ara utu e a bon rereke naba te bwai are ti kainnanoia.

Ngkana I iangoa te bwai are I rinanona ae rine aei, I kaungaaki ao ni karauaki nanou. I ataia bwa n angin te tai te Atua e kabonganaia aomata ni kakabwaiaia natina. I aki kona ni kamataata bwa kakaitaura Ngai n are I namakinna ibukin kainnabau te aine ao raoraou ibukin kairakiia iroun te Tamnei n uota nakoiu te nutibeeba ni katanoata iaon mwaawa n te mwakuri, ibukin aia mwakuri korakora mitinare ao aia katotoo ae moan te korakora, ao ibukin Tamara are i Karawa, ae nanoanga, n tatangira, ao ni mwamwannano, are iai mwaakana ae kamimii ni katabui baika ti rinanona ibukin kabwaiara.