Tuangiira taekan Am Ekaretia

Iaon kawaiu ni kawara mwaaneu, I bon tekateka ibukin te wanikiba n te tabo are e tekateka iai te atentanti n te kiba. Karinan ni kaintekateka ake uoua n te tabo anne a kaaitara.

I a kabwarabwaraai nakoia aomata ake a tekateka ni katobibiai ao imwiina I atonga are N na nako Brigham Young University. Te mwaane are e tekateka ni kaaitaraai e taku bwa natina te aine iai raoraona ae tamaroa ae e a tibwa mwananga nakon ana mwakuri ni mitinare ae bwanin ana tai iai. Natina te aine e ata ae uarereke ibukin te Ekaretia, ma ngaia bon akea ae e ataia. Te atentanti n te kiba e waekoa ni katanoata bwa e aki tangiria ni kaaina “te ekaretia anne” ibukina bwa a kaaitaraia aine. Te mwaane e taku e a tia n ongo ae titebo—bwa aine aika Itiaki ni Boong aika Kaitira a iangoaki bwa a aki kakaawaki nakoia mwaane, bwa a aki kona n taua te nakoanibonga ke ni kairi bootaki, ao bwa te Ekaretia e tauaki taekana irouia mwaane.

Ngkanne, e rairaki nakoiu, e titiraki, “E kangaara ngkoe am namakin ibukin anne?” Ni kabane itiman te aomata a rairaki nakoiu ao n tataninga.

E a moanna ni bukibuki manawau. Ngke te ataei ngai I a tia ni kamatenanoa raoi Taekan te Onimaki ibukin tii te aekaki aio, ao ngke tebwi tabun au ririki ao te kairake n ikawai ngai I a tia ni kataneiaai ni kaoti au kakoaua ibukin miin ni burabeti Iotebwa Timiti ao ana Boki Moomon. Ma bon akea au iango ae e rangi ni uarereke bwa N na kangaa ni kaeka ana titiraki te mwaane arei. I tataro n akea bwanaau ibukin te Tama are i Karawa bwa e na kairai.

Ngkanne I a taekina te moan taeka are e roko nakon au iango: “Kam bon aki ata taekan aia Bootaki Aine.” Taraan moaia a kaotia bwa a aki ataia.

“Te nakoanibonga e mwakuri n reitaki ma taian aine, ngaia ni kabane bon kaain te Bootaki n Aine,” I kabwarabwaraa. “Iai te aine ae te beretitenti n aia Bootaki Aine are e kaira aia mwakuri aine n te Ekaretia ni kabuta te aonaaba. Tabeia aine bwa a na karokoa te akoi ao te tangira ae itiaki nakon maiuia membwa ao ai moarara riki nakon maiuia aia utu.”

Aomata ake a katobibiai a kakauongo raoi.

“Ti maiu inanon te tai ae kamimii ngke tabeman aine a tangiriia aine ni mwakuri ao n iango n aroia mwaane. Ma ti kakoaua bwa te Atua e tibwatibwai mwakuri. Ti kantaningaia aine n riki bwa taan kairiiri ibuakoia aine ao ni uaia ni kairiiri inanon mweengaia. Mwaane a rangi n onimakiniira ibukin taeka n reirei n taabo aikai. Bon te baeranti ae tamaaroa. E karika ara bootaki n te Ekaretia ao mweengara n nakoraoi. Ao ti kakoaua raoi bwa te mwaane akea ngkana akea te aine, ma akea naba te aine ngkana akea te mwaane, inanon te Uea (taraa 1 I Korinto 11:11). Ti kakoaua bwa tiaki bwanin n akea ngaira. Ti aki kakoaua ae ti karikaki bwa ti na kabo imarenara ma ti na ibuobuoki imarenara.”

I namakina kakabwaiakiu ngke I a tia. I ataia bwa taeka ake I a tia n taekin bon mai iroun te Tamnei. Ni kabaneia aomata a taraa n rauaki ma au kabwarabwara. Imwiina te mwaane e taku, “Taekinna nakoira riki rongorongon am ekaretia.”

Imwiina, ibukin uoua te aoa are imwiina, I a tia ni karekea te tai ae kakukurei n taekina taekan Kaokan bwaai, kaekai titiraki, ao ni kaota au kakoaua n te euangkerio are I tangiria.