Tau Mai Ia i Matou e Uiga i Lau Ekalesia

I se malaga e asi lou tuagane, na ou nofo i tua o le vaalele e nonofo ai le aufaigaluega. O laina nofoa e lua i lena vaega e faafesagai.

Na ou ta’u atu lo’u igoa i tagata na siomia au ma ta’ua ai o le a ou alu i le Iunivesite o Polika Iaga. Na fai mai se tamā ma te faafesagai e i ai le uo a lona afafine faatoa alu lava i le misiona. E laitiiti lava se mea ua iloa e lona afafine e uiga i le Ekalesia, ae o ia toeitiiti lava leai se mea na te iloa. Na vave ona faailoa mai e le teine faigaluega e le manao o ia e auai i “lena lotu” ona e tetee i tamaitai. Fai mai le tamaloa na ia faalogo i se mea faapena—o fafine o le Au Paia o Aso e Gata ai e faapea e maualalo nai lo tamaloloa, ma e le mafai ona latou maua le perisitua pe pulefaamalumalu i fonotaga, ma e pulea le Ekalesia e tamatane.

Ona, faliu mai lea ia te au, ma fesili mai, “O le a sou lagona i lena mea?” Na faliu mai uma le toafitu ia te au ma faatalitali.

Na amata ona tatavale lo’u fatu. Ao ou laitiiti na ou taulotoina Mataupu Faavae o le Faatuatua faapitoa lava mo nei ituaiga tulaga, ma ina ua ou talavou ma oo ina matua, na ou faataitaia le faia o le molimau i le faaaliga a Iosefa Samita ma le Tusi a Mamona. Ae sa leai ma sina o’u iloa pe faapefea ona tali le fesili a le tamaloa. Na ou tatalo le leoa i le Tama Faalelagi e taiala au.

Ona ou faia lea o upu muamua lava na oo mai i lou mafaufau. “Tou te le iloa ma se mea e uiga i le Aualofa.” Na ta’u mai i o latou foliga latou te le iloa.

“E galulue soosoo tauau le perisitua ma tamaitai, o i latou uma na o tagata o le Aualofa,” sa ou faamatala atu ai. “E i ai so matou peresitene o le Aualofa, o se tamaitai e taitaia gaoioiga a tina ma tamaitai i le Ekalesia i le lalolagi atoa. O le tiutetauave o tamaitai o le aumaia o le agalelei ma le agaalofa i olaga o tagata ae maise lava i olaga o latou aiga.”

Na faalologo ma le naunautai tagata na siomia au.

“O loo tatou ola i se taimi uigaese ua mananao nisi fafine e amio ma mafaufau ma avea pei ni tamaloloa. Ae matou te talitonu na vaevae e le Atua tiutetauave. Matou te faamoemoe i tamaitai ia avea ma taitai i tamaitai ae o ni taitai soofaatasi ma tamā i o latou aiga. E matua faalagolago mai lava tamaloloa ia i tatou mo fautuaga i nei vaega. O se paleni amiotonu lenei mea. E faamanuiaina ai faalapotopotoga a le Ekalesia ma o matou aiga. Ma matou te talitonu moni lava e leai se tane pe a le o i ai le fafine, e leai foi se fafine pe a le o i ai le tane i le Alii (tagai i le 1 Korinito11:11). Matou te talitonu matou te le atoatoa e aunoa ma le isi. Matou te le talitonu na foafoaina i tatou e tauva ma le isi ae ia galulue faatasi ma le isi.”

Na ou lagonaina le faamanuiaina ina ua uma. Na ou iloa o upu na ou tautala ai na mai le Agaga. Na foliga faamalieina tagata uma i lau faamalamalamaga. Na fai mai le tamaloa, “Tau mai nisi mea e uiga i lau lotu.”

O le isi la lua itula, na ou maua ai le avanoa fiafia e talanoa ai e uiga i le Toefuataiga, tali fesili, ma tuuina atu le molimau o le talalelei ou te fiafia i ai.