Aoaoina Atu o le Ola Mama ma le Amiomama

Ua faamanuiaina lava au ou te feiloai atu i le autalavou ma talavou matutua mai soo se vaega o le lalolagi. Sa i ai se taimi sa ou lauga atu ai i se vaega faapitoa naunautai o le autalavou e uiga i le amiomama, legavia, ma le ola mama. Ina ua uma ona tau atu ia i latou lou fiafia tele i manatu sa latou faaalia, tautinoga, foliga, ma amio, sa ou fesili atu, “Na faapefea ona outou malamalama, ma lagona le to’a ia outou tali, ma maua le toafilemu i se autu maaleale faapenei?” Sa fai mai se tasi o tamaitai talavou e aunoa ma se faatali, “Na aoao mai e ou matua.” Sa lue mai ulu o isi e ioeina. Sa tau mai e lena aafiaga faigofie ae loloto le uunaiga o i ai a matua i olaga o a latou fanau—aemaise lava i la latou matafaioi o le aoaoina atu o le amiomama, legavia, feusuaiga, ma mafutaga talafeagai.

O le mea e faanoanoa ai, atonu o le toatele o matua e le o lelei le aoaoina o a latou fanau e uiga i faafitauli tau feusuaiga. Mo se faataitaiga, i se suesuega o le silia ma le 200 ia autalavou nofofua o toaaga a le Au Paia o Aso e Gata Ai, sa ou iloa ai e na o le 15 pasene sa aoaoina atu patino e o latou matua i ai ni faamatalaga e faatatau i faafitauli tau feusuaiga. Na fai mai nei talavou sa aoaoina patino lava i latou e uiga i lenei mataupu taua e uo po o nisi foi tupulaga, le Initoneti, ala o faasalalauga, faafiafiaga, tusi, aiga lautele, po o o latou taitai faale-Ekalesia.

Ioe, e le o se mataupu faigofie e aoao atu. Peitai ou te talitonu o matua lava o ni faiaoga sili lea e faamatalaina atu nei mataupu faavae paia. O le a fesoasoani metotia nei ia te oe i le atinaeina o ni mataupu faavae ma faataitaiga faigofie, aoga, ma le tumau e uunaia ai le aoaoina mai ma le aoaoina atu lelei—aemaise lava i le aoaoina atu o lau fanau i le auala e ola ai i ni olaga mama ma le legavia.

E tatau ona vave amata le aoaoina atu ma le aoaoina mai. Ua malamalama ia matua o loo aoaoina faalelei a latou fanau e uiga i mataupu tau feusuaiga faapea o le toatele o tamaiti ua leva ona feagai ma nei mataupu talu mai lo latou laiti ma e lei faamoemoeina pe fiafia i ai o latou matua faapea ma i latou. O le toatele o tamaiti e amata ona iloa ia faamatalaga i feusuaiga i luga o le Initoneti mai le 11 tausaga ma o nisi e laiti ifo. O nofoaga o faafiafiaga, taaloga, faasalalauga, ma e oo lava i ala o faasalalauga faamasani ua matuai faatumulia i ata o feusuaiga ma mea le talafeagai.

O nisi o matua e fesili sao mai, “O afea e tatau ai ona ou talanoa atu e uiga i mataupu e fesootai ma feusuaiga?” E fuafua lava i tausaga ma le matua o le tamaitiiti ma le tulaga e patino i ai. O le a oo mai le taitaiga faaleagaga pe a tatalo ma matauina ma le faaeteete e matua ia amioga a a latou fanau, faalogo i a latou fanau, ma ia faaavanoa se taimi e mafaufau ai ma fuafua po o afea ae po o a foi mea e aoao atu. Mo se faataitaiga, ou te manatua sa fesili mai lau tama ia te au e uiga i le tino ae faatoa atoa lona lima tausaga. E ui sa i ai sina lagona tau faaletonu, ae sa manino mai lava o se taimi sao lea e talanoa ai. Ae peitai, ao ou mafaufau i le auala e tali atu ai, sa foliga manino mai e le o se taimi sao lea ou te talanoa ai i lau tama e uiga i mataupu uma e faatatau i feusuaiga.

O le aoaoina atu ma le aoaoina mai e tatau ona tupu soo. O le aoaoina o se mea faasolo ae le o se mea e tupu i le taimi e tasi. A oo i le taimi e aoao atu ai i le fanau ia fesootaiga faalefeusuaiga po o nisi mea e faatatau i ai, e masani lava ona faapea tagata o se “talanoaga”. Po o le a lava le tulaga, ae o le uiga o lenei faaupuga e tatau i matua ona aoao atu lenei mataupu i se talanoaga taitoatasi. O se auala sili lea ona anoa e aoao ai se tamaitiiti. Sa aoao mai le Faaola tatou te aoao “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). O le a sili atu ona manuia a tatou aoaoga pe a tatou toe asia faatasi ma a tatou fanau le mataupu ao latou tuputupu ae ma matutua. O matua ua malamalama i lenei mataupu faavae ua saunia i latou lava faalemafaufau, faalelagona, ma faaleagaga e aoao atu ia latou fanau ia mataupu e faatatau i feusuaiga i le taimi o laiti pe ua talavou foi a latou fanau.

O le aoaoina mai ma le aoaoina atu ma le lelei e taulai atu lea i le fesootaiga i le va o le faiaoga ma le tagata o loo aoaoina. Pe a oo i le aoaoina o le fanau e uiga i mataupu tau feusuaiga, o le toatele lava o matua e toeitiiti lava o taimi uma e popole ai e uiga i mea e tatau ona latou talanoa ai. E ui e taua lenei mea, ae e sili atu le loloto o le faia o ni aoaoga anoa nai lo le talanoa e uiga i le mataupu. O le mea moni, o le auala o loo uia e matua e aoao atu ai a latou fanau atonu e sili atu le taua nai lo mea semanu latou te ta’u moni atu lava. E lagolagoina e suesuega ia le faaiuga faapea, o matua o loo sili atu a latou uunaiga i a latou fanau pe afai e faatatau lea i mataupu tau feusuaiga o i latou ia o loo faasamasamanoa a latou talanoaga, faaalia le alofa ma le popole, ma o loo gauai atu ma le naunautai i olaga o a latou fanau.¹

O ni manatu faaalia mai la’u sailiiliga faasamasamaona o le autalavou a le Au Paia o Aso e Gata Ai lea o loo taulai atu pea faapea maimau pe ana talanoa saoloto atili mai o latou matua e uiga i mataupu tau i feusuaiga. Sa faaalia mai e nei talavou matutua faapea e le gata i lo latou mananao ina ia faaaofia o latou matua i le polokalama, ae sa latou moomoo foi ina ia mafai ona “latou talanoa faatasi [ma o latou matua] nai lo le latou talanoa mai ia i latou.” Latou te moomoo mo ni talanoaga “faamaoni,” “masani,” “toafilemu,” ae le “faapopole tagata.” E tatau ona faaosofia ai matua e lenei mea ina ia galulue malosi i le avea ma e e faigofie ona talanoa atu i ai, ia avanoa, faamaoni, ma e le popole i se mataupu, tulaga, pe oo foi lava i le taimi. Afai ae i ai se tau e totogi ina ia mafai ai e matua ona aoao atu ma le lelei a latou fanau e uiga i mea e sili ona taua, e tatau la i matua ona galulue i ni auala o le a mafai ai ona fesoasoani ia latou fanau ina ia lagona le toafilemu ma le saogalemu pe a talanoa i mataupu uma—aemaise lava ia mataupu e sili ona patino.

O le a sili ona aoga le aoaoina atu ma le aoaoina mai pe afai e talafeagai ma moni le mataupu. E fuafua lava i la tatou auala, ae o le aoao atu e uiga i le fesootaiga tau feusuaiga e mafai ona lagona ai le matamuli, le mautonu, leai se faamoemoe, pe ua matele i le lauga atu. O se ki i le manuia o le iloa lea faapea o le tele o fesili ma popolega o i ai a le fanau, o ni tali lea i mea o tutupu ma mea o vaai i ai i le olaga moni. A o tatou nofouta, faalogo, mataituina a tatou fanau, o le a tatou iloa ai mea tatou te manaomia e aoao atu.

Mo se faataitaiga, o ata tifaga, sitaili, manatu o nei ona po, polokalama a le televise, faasalalauga, po o upu o pese ua tuuina atu ai le tele o avanoa e talanoa ai e uiga i tulaga faatonuina lelei. O le a oo mai nisi avanoa a o tatou mataituina ia fesootaiga ma fegalegaleaiga a a tatou fanau ma isi, o le auala o fai ai a latou ofu faapea ma tagata o a latou tupulaga, o le gagana o loo latou faaaogaina, o le auala o loo latou faalagolago atu ai i le isi itupa, faapea foi ma le fesuisuiai o le faauigaina o tulaga faatonuina o le legavia ma le ola mama i totonu o le nuu. E anoanoai ia avanoa moni o le olaga e talatalanoa ai ma le fanau e uiga i le ola mama ma le amiomama.

Atonu o le vaega e sili lava ona taua e faatatau i le tuuina atu o se aoaoga mai mea moni o le olaga pe a avea matua ma faataitaiga o le legavia, tauagafau, ma le amiomama i o latou lava olaga. O le a vave ona faalogo ma mulimuli le fanau i fautuaga a o latou matua pe afai e faatatau ia ituaiga fautuaga i faataitaiga lelei a o latou matua.

O le faafeagai e moni foi. Faapei ona saunoa mai Elder Robert D. Hales o le Korama a Aposetolo e Toasefululua: “I le tele o itu, e leotetele atu a tatou amioga nai lo a tatou upu. Na aoao mai Peresitene Polika Iaga (1801–77): ‘E tatau ona tatou faia [mo a tatou fanau] se faataitaiga tatou te mananao latou te faataitai ai. Pe o tatou iloaina lenei mea? E masani ona tatou vaai i matua o poloaiina le usiusitai, amio lelei, upu alofa, foliga tausaafia, se leo malie ma se foliga fiafia mai se tamaitiiti po o tamaiti, ae o i latou lava ia e tumu i le ita ma le ote! E matuai le fetaui lava ma lē sao lenei mea!’ O le a matauina e a tatou fanau nei faiga faalefetaui ia i tatou ma atonu o le a latou tauamiotonuina ai lo latou faia o ia foi ituaiga uiga.”²

E sili atu ona aoaoina ia tagata suesue pe a latou malamalama i mea o loo aoao atu e faiaoga. E toatele naua le autalavou ma talavou matutua ua faaalia le le fiafia i le faaaogaina e o latou matua e oo lava i taitai o le Ekalesia o “upu faailo” ma savali e le o manino lea ua tupu mai ai le tele o fesili nai lo tali ma le popole nai lo le toafilemu. E matua moni lava lenei mea pe a oo i mataupu tau feusuaiga.

A o avea au o se epikopo i se uarota a le autalavou matutua nofofua, e masani lava ona fesiligia au po o le a le uiga o le “militino”. Sa aoaoina tagata faamaoni o la’u uarota e le tatau ona latou militino, peitai e lei aoaoina lava i latou po o le a tonu lava le uiga o le militino. Sa faigata ia i latou le tausia o se faatonuga latou te lei malamalama i ai.

Sa faamalamalama atu e Peresitene Marion G. Romney (1897–1988), Fesoasoani Muamua i le Au Peresitene Sili e faapea, e le lava le aoao atu i se auala ina ia malamalama ai isi, peitai e tatau ona tatou aoao atu foi i se ituaiga auala ina ia leai se tasi e le malamalama.³ Nai lo le talanoa atu i upu faailo po o ni vaogagana faavaivao, ae o le a sili ona faamanuiaina i tatou pe afai tatou te faaaogaina ia faaupuga sao ma talafeagai. O lenei mea e uunaia ai le malamalama ma atiina ae ai le faaaloalo.

Mafaufau i le auala na aoao atu ai ma le faamanuiaina e Elder Richard G. Scott o le Korama a Aposetolo e Toasefululua ia mataupu faavae ma tulaga faatonuina o le ola mama. Na saunoa o ia: “Soo se uiga feusuai lava i fafo atu o noataga o le faaipoipoga—o le uiga o la’u tala, soo se taumafaiga lava e fesootai atu i itutino sa o le tino, tusa pe o fai ni lavalava pe leai foi—o se agasala ma e faasaina e le Atua. O se agasala foi lou taumafai e faaosofia nei lagona i lou lava tino.”⁴

Ina ia aoao atu ma le anoa, e tatau ona tatou mautinoa o loo malamalama i latou o tatou aoao atua i le savali. O fesili faigofie e pei “O le tali lea o lau fesili?” po o le “Na lelei lou faamatalaina atu?” po o le “E i ai nisi au fesili?” e aoga tele.

E liua le au suesue pe a fesootai e faiaoga ia savali ma mataupu faavae ma tulaga faatonuina o le faavavau. Nai lo le taulai atu i na o mea e patino i “mea moni o le olaga,” o le a tulai ae ni aoaoga taua o le talalelei pe a tatou faafesootaia na mea moni ma “mea moni o le ola e faavavau.” Mo se faataitaiga, pe a talanoa e uiga i o tatou tino, e mafai ona tatou talanoa e uiga i le auala na foafoa ai e se Tama Faalelagi alofa o tatou tino ma le auala e tatau ona tatou taulimaina ai ma le faaaloalo Ana foafoaga e tusa ai ma Ona faamoemoega.

Ao gotouga ifo le lalolagi i le ola le mama, o loo i ai lava le faamoemoe mo le tupulaga o le lumanai. E taulai atu lenei faamoemoe i le tuuto atu o taumafaiga sili a matua i le aoaoina o le tupulaga faiae ina ia amiomama ma ola mama. O matua o loo aoao atu a latou fanau ina ia amiomama ma ola mama o loo taumafai e faatele lo latou malamalama ma faalelei o latou tomai faafaiaoga. O le faia o lenei mea, ua latou iloa ai “o le a faalauteleina e le Alii [i latou] e aoao atu ai i le ala ua Ia poloaiina.” O le mea moni lava, “o le galuega [lenei] o le alofa—o se avanoa e fesoasoani ai i isi e faatino lo latou saolotoga amiotonu, ia o mai ia Keriso, ma mauaina faamanuiaga o le ola faavavau.”⁵