Iango ni Bootakin te Utu n te Tairiki
Te bwai ae taekinaki aio kanoana bwaai ao mwakuri ake a na kona ni kamanenaaki ibukin bootakin utu n te tairiki.
“Taran Taai Aika ana Roko e Katauraoira ibukin Taai aika Imwaira,” iteraniba 12: Wareka onoua itera ake a kaotaki n te wareware are ti ko na n riki iai n toronibwai. Tera bwaai ibukin taai aika a karina ke kangaanga ake a kona n taobaraki man karikirakean te toronibwai n tabo aikai? Kaoia membwa n te utu ni karaua n tataro man iangoi tabo aika a kainanoa te rikirake ao ni katei kouru ake ana karikirakea te maiu n toronibwai n tabo akanne.
“Te Itiaki n te Aonaaba ae aki Itiaki,” iteraniba 42: Kabwarabwara ma kain te utu te titiraki are taekinaki n te koroboki. Iangoa tibwan reirei ao bwai ake a rinanoi are a kateimatoai ao ni kakorakora te koaua iaon kawakinan te itiaki. Maroroakin anga ake ana karaoi nanon reirei man te koroboki.
“Riki ni Wanawana ao Riki bwa te Rao,” iteraniba 48: Waaki ma warekan ana ukenano Unimwaane Hales ibukin kakaean raao aika a tamaroa. Iangoa te maroro iaon kakawakin te riki bwa rao ae tamaroa. Kaoia kain te utu bwa ana iangoa teniua kawai ae na kona iai n riki teuanne ke neienne bwa te rao ae tamaroa riki.
“Nakon Amiga,” iteraniba 60, ao “Butimwaean te Maeu ae Boou,” iteraniba 61: Wareka rongorongoia ataein te Moanrinan ao a kanga ni katauraoia nakon te bootaki n ataeinaine ao te bootaki n ataeinimwaane. Ngkai utu ngaira, iangoia ni maroroakinna bwa tera ae a tia ni karaoia ataei aikai ibukin katauraoaia. Kaoia membwa n te utu bwa ana wareka Rikirakem Bon I iroum ke Beku Nakon te Atua booki aika uarereke ao kakaeai waki ni kakukurei are e anai nanoia ni kabanea n tai aika imwaia.
Teuana Te Bootaki n Utu n te Tairiki, Uoua Reirei
N te tairiki teuana au utu ao tibu aika a tangira a kawara ara bootaki n utu n te tairiki. Teniman mai irouia natiu a tatangiria ni kan ira te waaki, ao n te tairiki aei iai natiu ae itua ana ririki are e anga te reirei. Ti katauraoa te reirei ae uarereke, ti katekei tamnei ibukin te karikibwai, ao ni kamatebwaia ao n rinaon te bwai are reirei iaona. Natiu te mwaane e tauraoi man ingainga nanona.
N tain te reirei, ti bane ni kakauongo nakon te baere e kabwarabwara natiu te mwaane. Ngke e bane, Samuel, are ai bon teniua ana ririki, e iangoia bwa e na anga reirei. Ngaia are e anai tamnei ao ni kaoti ao ni manga bairei iaon te taibora.
Ni banana ae marara ao atongan taeka ae aki oota raoi, Samuel e anganira te reirei n ara botaki n utu. E ngae ngke e aki katauraoi, ma e kakauongo. E kabwarabwara nakoira bwa e kanga ni karaoaki te aonaaba ao n tuangira ana tangira Iesu Kristo nakoira n tatabemanira nako.
Ti mimi n nora aron beebeten te anga reirei irouna—ni karaoan are e karaoia tarina. Au utu ma tibuia a mimi ao man kukurei. Ti kona n nora aia tangira ataei aikai nakon te euangkerio—ao ana tangira Iesu Kristo nakoia.
Lizbeth Sánchez Fajardo, Mexico