Newel K. Whitney (1795–1850)

Newel Kimball Whitney e bungiaki i Vermont, USA, ni Beberuare 5, 1795. Bon te mwaane ae tarena n te bitineti ao e moan wakina ana iraorao ao toana ni bitineti Sidney Gilbert. I nanon aia moan ririki ni bitineti, a aki toki ni mwamwananga. I nanon teuana mwanangaia aikai, Newel e kaitibo ma Elizabeth Ann Smith i Kirtland, Ohio. Newel ao Ann a kakaitibo inanon teniua te ririki ao a mareaki n 1823.

A uaia Newel ao Ann ni kakaea te koaua, ao n te taina a ira ana iwawaaki te Campbellite, are a kan kaoka te aro ni Kiritian ake iai ngkoa. N te tairiki teuana Newel ao Ann a tataro “n ataia mai iroun te Uea a kanga [ngaia] ni kona ni karekea ana bwaintituaraoi te Tamnei ae Raoiroi.” Ann e kabwarabwara te mii are a karekea ni kaekaan aia tataro: “E ruo te Tamnei iaora ao te nang e rabuna te auti. … Imwiina ti ongo te bwanaa man te nang, ae kangai: ‘Katauraoi ni karekea ana taeka te Uea, bwa e a roko.’”¹

N te tai ae uarereke imwiin te kaeka nakon ara tataro, inanon Okitobwa 1830, mitinare ibukiia aika Itiaki ni Boong aika Kaitira a roko i Kirtland. N Nobembwa, Newel ao Ann a bwabetitoaki. Tabeua namwakaina imwiina, Iotebwa ao Emma Timiti a roko ni karebwerebwe iaon ana mataroa Whitney. Ngke e kamaura Newel Iotebwa n arana, Newel e aki kona n taekinna bwa e ataa aran te Burabeti, ngaia are e kaeka Iotebwa, “Ngai Iotebwa te Burabeti, ko a tia n tataro ibukiu bwa N na roko ikai, ngkai tera ae ko tangiria mai irou?”² Ana utu imwiina a kamaeka ana utu Timiti inanon tabeua te wiiki ao a katauraoa te mweenga ibukiia n Tebetembwa 1832.

N reitaki ma katauraoan aia tabo n tiku te Timiti, Newel e angan te Ekaretia kabonganaan te tabo are ieta i nanon ana titoa. N ana titoa Witney, taan kairiiri n te Ekaretia a karaoa bobootaki ao te Reirei n ana reirei te Burabeti.

N Ritembwa 1831, Newel e rineaki bwa te kauoman ni bitiobi n te Ekaretia ao imwiina e riki bwa te manatia n ana waaki te Ekaretia, ni buoka te Ekaretia ni kawakina ana mwane ao ni kamaunai taarau. N tain bwakan baanikai n 1838, te utu ae Witney a mwaing nako Maeao, ike e a manga weteaki iai Newel bwa te bitiobi, ao 10 te ririki imwiina, ngaia ma ana utu a mwananga n rinukan te aba ae aorai nako n te kaawa ae Salt Lake, ike e a riki iai bwa te Bitiobi ae Tararua n te Ekaretia.

Newel e mate n Tebetembwa 24, 1850, i Salt Lake City man aorakin mamaana.