Ang Gikinahanglang Edad para Mag-Misyon Gipaubsan

Sa pagbukas sa ika-182 nga Tunga sa Tuig nga Kinatibuk-ang Komperensya, si Presidente Thomas S. Monson mipahibalo nga, epektibo dayon, ang mga lalaki makasugod na sa pagmisyon sa edad nga 18 ug ang mga babaye sa edad nga 19.

Pagkataud-taud, diha sa press conference, si Elder Russell M. Nelson sa Korum sa Napulog Duha ka mga Apostoles mihatag og gibug-aton nga ang kausaban usa ka opsyon: “Ang mga batan-ong lalaki ug babaye dili magsugod sa pagserbisyo kon dili sila andam sa espiritwal ug temporal nga paagi,” siya miingon. Ang mga butang sama sa pag-ekswela, kahimtang sa pamilya, ug panglawas importante gihapon nga ikonsider alang sa timing sa pag-misyon.

Si Elder Jeffrey R. Holland sa Korum sa Napulog Duha ka mga Apostoles mipasabut nga ang mga prospective missionary mahimong irekomendar sa ilang bishop ug presidente sa stake alang sa full-time nga pagserbisyo sa 120 ka adlaw sa dili pa ilang ika-18 nga adlawng natawhan o sa petsa nga mahimo [available] na silang magmisyon. Ang mga batan-ong lalaki mahimong mosulod sa missionary training center (MTC) human makagradwar sa high school o ang tugbang niini ug 18 anyos na. Ang mga babaye mahimong mosulod human sa ilang ika-19 nga adlawng natawhan.

Ang mga prospective missionary gihangyo nga mas palamboon pa ang ilang pagpangandam sa dili pa mosulod sa MTC.

“Gipaspasan sa Dios ang Iyang buhat,” miingon si Elder Holland. “Ug Siya nagkinahanglan og dugang pa ug mas andam ug takus nga mga misyonaryo sa pagpakatap sa kahayag ug kamatuoran ug paglaum ug kaluwasan sa ebanghelyo ni Jesukristo ngadto sa kanunayng ngitngit ug makahadlok nga kalibutan.”

Si Elder Holland miingon nga posibleng magtukod og dugang mga misyon.

Aron mapaigo ang gipaabut nga dugang gidaghanon sa mga misyonaryo diha sa mga misyon sa tibuok kalibutan, ang panahon nga gigahin diha sa MTC maubsan og mga 33 porsyento sa tanang misyonaryo. Ang bag-ohay lang nga giimplementar nga 12-ka semanang pagbansay nga gihimo sa mission field makatabang nga mas maandam ang mga misyonaryo.