Te Kiritimati ae Kororaoi

Ngke I a ikawai rake, teuana te mwakoro ae rangi n tamaroa ni katoa ririki bon Tairikin te Kiritimati. Au utu ao ngai ti karaoa te (pizza) bitia, nako n anene, ao imwiina ti ikotaki ibukin te taromauri n te Kiritimati. Ti anenei kuuna n taromauri ni mwakoro aika aua aika tangiraoi ma n anenei kuuna n takarua iaon ara bwai ni katangitang aika kamimi n aekaia nako. Tamara e kainiin n tainako n te tairiki ma reirei n te Kiritimati are e katikuira ma rannimata ni kukurei. Te maiu e aki tamaroa riki nakon Tairikin te Kiritimati.

Ngke I a ikawai riki, tinau e a moanna n tabeakina te kairake ae kaain rarikira, Kelly. Kelly e roko n ara auti ni katoabong imwiin te reirei ngkai tinana, Patty, e mwakuri. Kelly e ririmwiiu n ai aron te bwabii—ni kaberoro ao ni bubuti. I rangi n au ngkana e roko Patty n anaa natina te aine ao ni katuka mweengara ao au utu inanon te rau.

Teuana te Ritembwa, I rangi ni maaku ngke tinau e kaoa Patty ao Kelly bwa a na raoniira n Tairikin te Kiritimati. Au Tairiki ni Kiritimati. Tinau e moangare ao e karaua nanou, “E aki bita te bwai teuana.” Ma I ataibwai riki. A na kang ni kabane ara biitia. Kelly e na bwainingarea ara anene. I kantaningaia ao I butimwaea anne bwa e na riki te kabanea ni buakaka n Tairikin te Kiritimati.

Ngke e a bong, Patty ao Kelly a raoniira, ao ti maroroo ao ti ngare ao n anene. Tinau e bon eti. E bon roko raoi. N te nuukanibong a kaitauai ao a kiitana mweengara. I nakon au kainiwene ma te nano ae kukurei. I kunea bwa bwaintangira aika rangi ni kakaawaki n te Kiritimati a bon aki maunanako ngkana a tibwauaaki. Onean mwiina a karewe ao a kamwaitaki ngkana a tibwauaki nako.