Rongorongo man te Moan Beretitentii, Ritembwa 2012
Manga kaokakin Tamnein te Kiritimati
Ririki aika a nako ngke I kairake ni mitinare, I weteaki ma tabeman nakon te onaoraki n te Kaawa i Salt Lake ni karaoa te kakabwaia ibukiia ataei aika aoraki. Ngke ti rin, ti nooria bwa te kai ni Kiritimati ma taurana aika a raneanea man tamaroa ao n noori batia aika a karauaki n niiraki iaan mwaanga aika ananau. Ti rinanon kawai are ataeinimwaane ma ataeinnaine aika uarereke—tabeman ake a rabunaki baia ke rangaia ma te buratita, tabeman ake a aoraki are aki kona ni waekoa ni katokaki—a butimwaira ma te moangare.
Te kairake, n ataeinimwaane ae rangi n aoraki e weteai, “Antai aram?”
I tuangnga arau, ao e titiraki, “Ko kona n anganai te kakabwaia?”
E anganaki te kakabwaia, ao ngke ti rairaki ni kiitana rarikin ana kainiwene, e taku, “Ko bati n rabwa.”
Ti rianna tabeua te rangata, ao imwiina I ongo ana wewete, “O, Tari Monson, tekeraoi n te Kiritimati.” Imwiina ao e oti te moangare ae korakora iaon moana.
Te ataeinimwaane e reke irouna tamnein te Kiritimati. Tamnein te Kiritimati bon te bwai ae n au kantaninga ti riai ni karekea inanora ao ni maiura—tiaki tii n te tai aei ma rinanon naba te ririki.
Ngkana iai iroura tamnein te Kiritimati, ti uringnga bwa antai are ti bukamarua ana koronririki n te tai aei n te ririki: “ba E bungiaki n ana kawa Tawita n te bong aei ami tia Kamaiu, are te Mesia are te Uea.” (Ruka 2:11)
Inanon ara bong tamnein te anga bwaintangira e riki bwa te tibwanga ae korakora n te kanuringa n tain te Kiritimati. I titiraki ngkana ti kona ni kakabwaia man titirakinara ibon iroura, Ana tera au bwai n tangira te Uea e tangirai bwa N na Anganna ke nakoia tabeman n te tai ae rang kakaawaki n te ririki aei?
N na kona n taekinna bwa Tamara are i Karawa e tangiriira n tatabemaniira nako bwa ti na anganna ao nakon Natina te bwaintangira n te ongotaeka. I namakinna naba bwa E na bon butiira bwa ti na anga nanora ao n aki iangoira ibon iroura ke n tinanikubeka ke te kakauntaeka, n aron are e taekinna Natina ae kakaawaki n ana Boki Moomon.
“Bwa e koaua, e koaua ae I tuangkami, bwa ane iai irouna tamnein te kakauntaeka ao bon tiaki mai irou, ma bon ma iroun te riaboro, are taman te kakauntaeka, ao e kakiriweei nanoia aomata bwa a na itabaraaraa ma te un, imarenaia.
“Nooria, bon tiaki au reirei, bwa N na kakiriwei nanoia aomata bwa a na un, imarenaia, ma bon aio au reirei bwa a na riai ni kakeaki bwaai aikai.” (3 Nibwaai 11:29‒30)
Inanon te bong ae moan te kakaawaki aei ni bwaninin taai, ara tai n tangira ao ni buokiia tabeman man kabonganaan ara bwai ke ara taarena a bon kimototo, ma a kona n tauraoi n te tai ae uarereke bwa ti na karaoi. Ni boong aikai iai nano aika a kukurei, taeka n akoi aika a na taekinaki, mwakuri aika a na karaoaki, ao tamnei aika a na kamaiuaki.
Temanna ae rangi ni korakora ana kantaninga inanon tamnein te Kiritimati e koreia:
Ngai bon Tamnein te Kiritimati—
I rin inanon te mweenga ae kainnano, ni kaurei mataia ataei aika mairake moaia, n te mimii ni kukurei.
I karikiia taan tinanikubeka bwa a na kooni baia n rau ao a na beeniia nanoia n te mainaina;.
I karikiia aika a kara bwa ana riki ni kairake ao a na ngare n aroia ngke a kairake.
I kawakina te maiu n tangira bwa e na maiu inanon uarerekeia, ao ni kanakoraoi matu ma mii aika a raraoi.
I karikii wae aika ingainga ni katauraoi ibuobuoki nakoia ake a kainnanoia, ni katikui imwiia naano aika mimii ni bwaai aika a tamaroa n te aonaaba.
I karika te tia bakatae bwa e na tei teutana iaon arona n aki tautaekanaki, ni bakatae ao ni kanakoi bwaai tabeua nakoia ake a kainnanoi ake a na karekei rannimata ni kukurei—rannimata ake a kanakoi nanokawaki aika matoatoa.
I rin inanon karabuuti aika roo, n uring arou ni maroa ni kammaraki ake I rinanoi n au bong ni mwaane ao n tarai boong aika raraoi aika a na kaoti.
I karaurau n tei inanon, mweengan te maraki ae mainaina, ao riia aika a rangi ni mamaara n taetae a tii ruru ni kainabwaabu, te kakaitau ae korakora.
N aro aika ngaa ma ngaa, I karika te aonaaba ae mamaara bwa e na tararake nakon matan te Atua, ao n te tai ae uarereke a mwaninga bwaai aika a uarereke ao a uruaki.
Ngai bon Tamnein te Kiritimati.1
Ti bia bane ni kunea tamnein te Kiritimati ae boou—ae bon Tamnein Kristo.
© 2012 man Intellectual Reserve, Inc. A bane n tauaki kariaia ni kabane. Boretiaki n te USA. Kariaiakana n te Ingiriti: 6/11. Kariaiakaki Rairana: 6/11. Rairan te First Presidency Message, February 2012. Kiribati. 10372 859
Reirei man te Rongorongo Aei
Ngkai ko tibwa ana rongorongo Beretitenti Monson ma te utu, iangoi kamatataakin te titiraki are e koteia n taekan te bwaintangira are te Uea e kantaningaia bwa ti na anganna ke n anganiia tabeman n te tai aei. Kaungaia kaain te utu bwa a na korei aia iango ao miia (ke, ibukiia ataei aika uarereke, bwa a na korei tamnei) n aron ae a kanga ni “kunea tamnein te Kiritimati ae boou—n aron Tamnein te Kristo.”