Ko e Fakamoʻoni ʻa ʻEvelini ki he Temipalé

Naʻe saiʻia ʻa ʻEvelini ke ʻalu ki he Palaimelí. Naʻá ne hikinima maʻu pē ke ne fai e lotú. Naʻá ne saiʻia foki ke tokoni ki heʻene kau faiakó.

Ka ko e ʻahó ni ko e fuofua taimi ia ke fai ai ʻe ʻEvelini ha lea. ʻI heʻene lue atu ki muʻa he lokí, naʻe ongoʻi faikehe hono keté. Pea kamata leva ke tā vave hono mafú.

ʻI he aʻu ʻa ʻEvelini ki muʻá, naʻá ne pehē ange, “Mālō e lelei. Ko hoku hingoá ko ʻEvelini. Ne toki ʻalu homau fāmilí ki he temipalé koeʻuhí ke mau lava ʻo fakataha ʻo taʻengata.”

Naʻe fakamatala ʻe ʻEvelini ki he fānau Palaimelí ʻa e kofu hinehina naʻá ne tuí. Naʻe hinehina ʻaupito foki mo e temipalé. Naʻá ne talaange kiate kinautolu naʻe sila fakataha ia mo ʻene ongomātuʻá mo hono tokouá ki he taʻengatá.

Naʻe pehē ange ʻe ʻEvelini, “ʻOku ou ʻilo ʻoku ʻofa ʻa e Tamai Hēvaní ʻiate kitautolu. ʻOkú ne tuku ke tau ō ki he temipalé ke tau fakataha mo hotau ngaahi fāmilí ʻo taʻengata.”

Naʻe foki mai ʻa ʻEvelini ʻo tangutu ki lalo. Naʻá ne ongoʻi fiefia. Naʻá ne ongoʻi hangē naʻe ulo ha maama māfana ʻo hū atu ki hono sinó. Naʻá ne fiefia ʻi heʻene ʻalu ki he temipalé.