Ko ʻEku Fakaʻamu ʻi Hoku ʻAho Fāʻeleʻí

ʻI heʻeku tali e ongoongoleleí ʻi hoku taʻu 18, ne u ʻiloʻi kuó u aʻusia ʻa e fiefia lahi taha ʻi he fiefia kotoa pē. Ne u ongoʻi ha fiefia lahi, ka naʻá ku fakakaukau ki he kau mēmipa hoku fāmilí kuo nau hē pea moʻui taʻe kau ai e fakahinohino ʻa e ongoongoleleí. Ne u ongoʻi mamahi lahi ʻi heʻeku hoko ko e toko taha pē ʻi hoku fāmilí ke kau ki he Siasí, ka naʻe ʻikai ke u ʻiloʻi e founga ke tokoniʻi ʻaki e niʻihi kehé ke nau fanongo pea tali ʻa e moʻoní.

Ne u feinga ʻi ha ngaahi founga lahi ke fakalotoʻi hoku fāmilí ke nau fanongo ki he kau faifekaú. Ka ko e lahi ange ʻeku feingá, ko e lahi ange ia ʻenau momou ke fanongó.

Ne fakaʻau ke u loto-foʻi, peá u fakakaukau ke ʻoua te u toe maʻu lotu. Ka ʻi heʻeku lotú, naʻe haʻu ki hoku ʻatamaí ha potufolofola: “Pea hili ʻeni kapau te [ke] fakaʻikaiʻi au, ʻe lelei ange kiate kimoutolu ʻo kapau naʻe ʻikai te mou ʻiloʻi au” (2 Nīfai 31:14). Ne toe mālohi ange ʻeku lotú, lau folofolá, ʻalu ki heʻeku ngaahi fakataha faka-Siasí, peá u tokanga taha ki he ngaahi tāpuaki ʻi heʻeku moʻuí. Ko e meʻa naʻe hokó ko e kamata ke mole atu ʻa e mamahí.

ʻI he ofi ke hoko hoku ʻaho fāʻeleʻí, naʻe ueʻi au ke fai haʻaku paati faiʻaho ʻi hoku ʻapí pea fakaafeʻi mai kotoa ki ai hoku ngaahi kaumeʻa he Siasí, kau ai e ongo faifekau taimi kakató. Ne u fie maʻu ke fengāueʻaki vāofi ange hoku fāmilí mo e kāingalotu ʻo e Siasí, ʻa ia ne hangē kiate au ko e kakai fiefia taha ia ʻi he māmaní. Ne u ongoʻi ʻe au naʻe hangē pē e pātí ko ha efiafi fakafāmili ʻi ʻapí.

ʻI he ʻosi pē ʻaho ko iá, kuo liliu e ngaahi meʻá. Naʻe talitali lelei e ongo faifekaú ʻi homau ʻapí pea nau kaungāmeʻa lelei mo hoku fāmilí. ʻI he ʻaho ʻe taha naʻe fakahā ai ʻe heʻeku tamaí ʻene loto ke fanongo kotoa homau fāmilí ki he ongo faifekaú pea mau ō ki he lotú. Ne u ʻohovale.

Hili ha taʻu ʻe tolu mei hono papitaiso aú, naʻe papitaiso kotoa hoku fāmilí. Naʻe fai ʻe heʻeku faʻeé ʻene fakamoʻoní ʻi he ouau ʻo e papitaisó, pea fakamālō ange ʻeku tamaí ki he ongo faifekaú. Naʻe ofo e kāingalotu ʻo e uōtí ʻi hona fakauluí.

Naʻe anga fēfē ʻene hokó? Naʻe ʻi ai pē kaunga ki ai hoku ngaahi loʻimata naʻe toó mo e ngaahi taumuʻa ne u fokotuʻú. Ka ko e meʻa lahi tahá ʻa hono fakamolū ʻe he ʻofa mo e anga fakakaumeʻa ʻa e ongo faifekaú mo e kāingalotu ʻo e uōtí ʻa e loto ʻeku tamaí. Naʻe hoko e kāingalotú kotoa ko e kau faifekau ʻi heʻenau ngaahi faʻifaʻitakiʻanga ʻo hono moʻui ʻaki e ongoongolelei ʻo Sīsū Kalaisí. ʻOku ou fakamālō kiate kinaua pea mo e palani ʻa e Tamai Hēvaní, ʻo lava ai ke fakataha e ngaahi fāmilí ʻo taʻengata.