Ko e Fakafanongo ki he Ngaahi Ueʻí

ʻI he pō ʻe taha ne hola ai e finemui ne u tokoua ʻaki mei ʻapi, ko ia ne u fakavavevave atu ke kumi. ʻI heʻeku lele atu he meʻalelé, ne u lotu ke tokoni mai e Laumālié. Naʻá ku ʻiloʻi ʻe tali mo tataki au ʻe he ʻOtuá, pea ne u feinga ke fakafanongo ki he ngaahi ueʻi ʻa e Laumālié. Ka ʻi he ʻikai ke u fanongo ki ha meʻá, naʻe kamata ke u ongoʻi hohaʻa peá u ongoʻi naʻe ʻikai ke ueʻi au ʻe he Laumālié.

Neongo ne u fie maʻu ke u toe ʻalu mamaʻo atu ʻo kumi ai, ka ne u ongoʻi naʻe totonu ke u nofo pē he feituʻu naʻe ʻi ai e ʻapi ʻo e taʻahine ne u tokoua ʻakí. Ko ia ne u fakakaukau ke u toe takai tuʻo taha he feituʻu ko iá. ʻI heʻeku tuʻu ʻi ha afe ʻe taha, ne u sio ki ha finemui ʻoku luelue atu ai. Kuó u maʻu e taʻahine ‘oku ou tokoua ʻakí!

ʻI heʻeku hū ki tuʻa mei he kaá ʻo lele ki aí, ne u ʻiloʻi ta naʻe fakahinohino pē au ʻe he Laumālié ʻaki hono tokoniʻi au ke u ongoʻi naʻe totonu ke u nofo ʻi he feituʻu tatau pē. Ne u meimei taʻe tokangaʻi e ngaahi ueʻi ʻa e Laumālié he ne u fakafanongo au ki ha kiʻi leʻo siʻi. Naʻe mahino leva kiate au ko e taimi lahi he ʻikai ke tau fanongo ai ki ha leʻo, ka te tau ongoʻi e ngaahi ongo ʻi hotau lotó.

ʻOku ou fakamālō ʻi he fakahinohino ʻa e Laumālié. Ko e moʻoni ʻokú Ne ʻi ai maʻu pē! Hangē ko e lau ʻa e folofolá, “ʻE hoko ʻa e Laumālie Māʻoniʻoní ko ho takaua maʻu ai pē” (T&F 121:46).

Kapau ʻoku tau moʻui taau ke maʻu e fakahinohino ʻa e Laumālié pea tau tokanga ki ai, te tau lava ʻo hoko ko ha ngaahi meʻangāue ʻi he toʻukupu ʻo e ʻOtuá ke fai ha lelei maʻá ha kakai tokolahi. Te tau ʻiloʻi ʻa e hala ke tau fou aí ʻi heʻetau maʻu maʻu ai pē e takaua ʻo e Laumālié.