Mahimo Ba nga Inyo Kong Mapanalanginan?

Daghang mga tuig ang milabay, giubanan nako ang usa ka brother nga ako ang nag-home teach, si Brother Schaaf, ngadto sa ospital aron sa paghatag og panalangin sa priesthood ngadto sa iyang asawa sa dili pa siya operahan. Si Sister Schaaf may kauban nga usa ka babaye diha sa kwarto sa ospital nga ginganlan og Annie Leddar, usa ka dugay na nga pasyente nga may kanser nga dili na maayo nga hapit nang mamatay.

Gibira nako ang kurtina nga giali sa duha ka higdaanan sa ospital sa wala pa sugdi ang pagpanalangin, apan mihunong ko. Dili ko gusto nga malain si Annie, gipasabut nako kon unsa ang among buhaton ug nangutana kaniya kon ganahan ba siya nga mosaksi sa pagpanalangin. Siya miingon nga ganahan siyang motan-aw. Ang iyang bana, nga namatay na, usa ka ministro sa laing tinuohan, ug siya interesado sa atong gituohan. Si Brother Schaaf ug ako mipadayon sa pagpanalangin samtang naminaw si Annie.

Mga pipila ka adlaw ang milabay, sa wala pa makagawas si Sister Schaaf sa ospital, si Annie mihangyo kon siya makadawat usab sa panalangin sa priesthood. Si Brother Schaaf ug ako malipayong mibalik sa ospital aron sa pagpanalangin kaniya. Si Annie wala maayo sa iyang kanser, apan miarang-arang ang iyang panglawas.

Siya interesado nga makat-on pa og dugang kabahin sa ebanghelyo, busa gihangyo nako ang mga misyonaryo sa pag-adto sa ospital aron tudloan siya. Siya kinasingkasing nga naminaw sa mensahe sa ebanghelyo ug mipili nga magpabunyag. Kada semana human siya mabunyagi moadto mi sa ospital aron kuhaon si Annie para dalhon sa simbahan gamit ang iyang wheelchair.

Tungod masakiton si Annie, lisud alang kaniya sa paglihok-lihok, apan siya nakakaplag og iyang paagi sa pagserbisyo sa Ginoo. Gidad-an namo siya og typewriter, ug siya mogahin og daghang oras kada adlaw sa ospital naghimo og buhat sa family history. Si Annie nabuhi og tulo pa ka tuig kaysa gidahuman ug nakaandam og gatusan ka mga ngalan para sa templo sa wala pa siya mamatay.

Human sa kamatayon ni Annie, si Sister Schaaf mi-proxy sa buhat sa templo alang sa daghang babaye nga mga katigulangan ni Annie.

Kutob sa akong nahibaloan, si Annie lang ang miyembro sa Simbahan sa iyang pamilya. Ang mga buhi pa sa iyang pamilya dili gayud mainteresado sa iyang pag-apil sa Simbahan, apan sigurado ko nga daghan sa iyang namatay nga mga sakop sa pamilya mapasalamaton sa vicarious nga buhat para kanila.

Wala kita masayud kon ang mga tawo nga atong ikahimamat andam sa pagdawat sa ebanghelyo. Mapasalamaton ko nga nakakita sa paglambo sa pagpamatuod—nga natisok sa kasingkasing ni Annie human siya makasaksi sa panalangin sa priesthod—naglambo ug nagpanalangin sa gatusan nga mga anak sa Langitnong Amahan.