Pagpaminaw sa mga Aghat

Usa ka gabii ang akong batan-ong ig-agaw milayas sa balay, busa nagdali-dali ko sa pagpangita niya. Samtang nagmaniho ko, nag-ampo ko nga ang Espiritu motabang nako. Nasayud ko nga ang Ginoo motubag ug mogiya kanako, ug naningkamot ko sa pagpaminaw sa aghat sa Espiritu. Apan sa dihang wala koy nadunggan, misugod ko sa pagbati og tumang kaguol ug mibati nga ang Espiritu wala moaghat nako.

Bisan tuod ganahan kong moadto sa layo aron sa pagpangita, mibati ko nga magpabilin lang sa duol sa balay sa akong ig-agaw. Busa mihukom ko nga molibut og kausa nalang sa maong dapit. Samtang mihunong ko sa usa ka interseksyon, nakakita ko og porma sa usa ka batan-ong babaye nga naglakaw. Akong nakit-an ang akong ig-agaw!

Sa akong paggawas sa sakyanan ug pagdagan paingon niya, nakaamgo ko nga ang Espiritu naggiya kanako kanunay pinaagi sa pagpabati nako nga magpabilin sa sama nga dapit. Tungod kay nagpaminaw ko sa hinay nga tingog, hapit wala nako mamatikdi ang mga aghat sa Espiritu. Dayon nasabtan nako nga kasagaran kita dili makadungog og tingog, apan kita mobati og impresyon sa atong mga kasingkasing.

Mapasalamaton kaayo ko sa giya sa Espiritu. Sa tinuoray anaa Siya sa kanunay! Sama sa giingon diha sa kasulatan, “Ang Espiritu Santo mao ang inyong kauban sa kanunay” (D&P 121:46).

Kon kita angay sa paggiya sa Espiritu ug mamati, kita mahimong mga instrumento diha sa kamot sa Dios sa pagbuhat og kaayohan sa daghang tawo. Sa kanunay nga panag-uban sa Espiritu, kita masayud sa dalan nga angay natong padulngan.