Padayon sa Pagpraktis

“Dili na ko ganahan nga magpatudlo og piano,” akong giingnan ang akong inahan. Nagpatudlo ko sulod na sa daghang mga tuig ug gikapoy na sa sigig praktis. Ganahan na kong moundang. Dili man sad gyud ko maayo ba. Tungod kay nag-antus ko sa kasarangan nga pagkawala sa pandungog ug nagsul-ob og hearing aids, wala gyud nako isipa ang akong kaugalingon nga tawo nga dunay talento sa musika. Kinahanglan gyud kanunay og daghang pagpraktis aron makat-on sa tono sa usa ka kanta.

Ang akong mama walay daghang gisulti apan miingon ra nako nga kinahanglang magpadayon ko sa pagpatudlo hangtud makapatukar na ko sa mga himno. Human sa daghang pagbagulbol sa akong bahin ug tumang pag-awhag sa akong mga ginikanan, nakahukom ko nga dili moundang.

Paglabay sa daghang mga katuigan ug liboan ka mga milya sa usa ka chapel sa kabukiran sa tunga-tungang Guatemala. Isip usa ka misyonaryo, nagtambong ko og usa ka komperensya sa district. Sayo kong miabut ug nakakita og piano didto, mao nga milingkod ko ug nagsugod sa pagpatukar og mga himno. Kadaghanan sa mga ward ug branch adunay gagmay nga mga electric keyboard nga lisud patukaron, mao nga nadasig kaayo ko nga mopatukar sa tinuod nga piano. Gihangyo na hinoon ko nga moduyog sa kongregasyon alang sa komperensya.

Unsay nakapausab sa akong kinaiya tali sa akong pagkabata ug panahon sa akong pagkamisyonaryo? Akong gibati ang gahum sa Espiritu pinaagi sa musika.

Samtang nagserbisyo sa misyon, duna koy daghang mga oportunidad sa paggamit sa mga kahanas sa musika nga akong nakat-unan. Ganahan ko sa daghang mga oportunidad sa pagkanta ug pagpatukar sa piano ug nakapatukar hapit kada Dominggo sa sakrament miting. Mahinumduman gyud nako kanunay nga naminaw niadtong matinud-anong mga miyembro sa Guatemala nga nagkanta sa mga himno. Akong gitudloan ang mga miyembro og bag-ong mga himno nga dili nila pamilyar. Nagtudlo ko og mga leksyon sa piano. Ang akong kompanyon ug ako mokanta ngadto sa mga tawo nga among gitudloan. Bisan og mayabag mi, ang Espiritu anaa kanunay sa pagtandog sa mga kasingkasing sa mga tawo.

Akong nakat-unan nga bisan unsa ang inyong mga talento, makakat-on gihapon kamo sa pagpalambo og mga abilidad sa musika. Dili gyud ko mahimong world-class nga piyanista, ug daghang mga miyembro sa Guatemala dili gayud makasulod sa Tabernacle Choir. Pero dili kana igsapayan. Matagamtam gihapon namo ang pagbati sa Espiritu pinaagi sa musika. Mapasalamaton kaayo ko nga ang akong mga ginikanan miawhag nako sa pagpadayon sa pagpatudlo og piano, ug ako mapasalamaton nga nagpadayon ko og praktis.