Meleilei, Dehr Mwekid

Ehu rahno sounparkei samwalahr, mwurin ei apwalihala pwukoa kan nan ohpiso, I ahniki pepehm kehlail ien pwarek emen lihodi mahlahr me kin mih nan imwen apwalih me mah nan Salt Lake City. I inenlahte wasao.

Ni ahi lella ni ah pereo, sohte towe. I peidek rehn emen tohn doadoahk ma iaih oh alehdi kaweid en kohla nan perehn mwomwohdo. Wasao I diarada lihodi kaselel menet koasoakoasoaiong rie serepein men oh emen kempoakepah. Se koasoakoasoaipene inenen mwahu.

Ni aht wie koasoakoasoai, ohl emen kohdo ni wenihmw en pereo pwehn alehda oapwoat saida sang nan wasahn netiki saida. E kilengdohngie oh dene, “Okoi, komwi Tom Monson.”

“Ei,” I sapengki. “Oh komwi mesehn emen Hemingway.”

Ohlo sapengki me ih Stephen Hemingway, nein Alfred Eugene Hemingway, me mahs wia emen nei konselor ni ansou me I wia pisop pahr tohto samwalahr oh me I kin ekerki Gene. Stephen ndahiengie me ah pahpao pil mih wasao oh pahn kereniongehr mehla. Gene kin liklikuwerih edei, oh peneineio men tuhwengie ahpw sohte kak diar nei nempehn delepwohn.

Ansouohte I iangada Stephen kohdalahng nan peren nei konselor en mahso, wasa me ekei nah serihko pil wie pokpokon ie, ah pwoudo mehlahr pahrkei mwowe. Tohn peneineio wiahki me ahn ngehi Stephen aht tuhpene nan perehn mwomwohdo wia pasapeng sang Samatail Nanleng pwehki arail inangih ien kilang arail pahpao mwohn e mehla oh sapeng eh likuwer kan. I pil kamehlele met, pwe ma Stephen sohte pidolong nan pereo wasa me I koasoakoasoaieng lihoko ni ansouo, I sohte douluhl pahn pil ese me Gene iang mih wasao.

Se kihong ih kapakap en kapai. Pepehm en popohl kipehdi wasao. Se ahniki ansou mwahu pene, ngehi eri kohkohla.

Manda nimensengo I alehdi kair me Gene Hemingway mehla—minit 20 mwurin eh alehdi kapakap en kapai sang nah pwutako oh ngehi.

I kapingkihieng Sahm Nanleng nan mohngiongi pwehki Sapwelliime kaweid, me elehieng ehi pwarek imwen apwalih aramas mah me pil elehieng ehi tuhwengdi kempoakepai Alfred Eugene Hemingway.

I pereniki medewe me ahn Gene Hemingway ah madamadau kan ni soutiko—ni aht pepehm lingen Ngehno, kapakap ni karakarahk, oh patohwanohng kapai en priesthood—duwehte lepin mahsen kan sang nan koul en sarawi “Master, the Tempest Is Raging”:

I poakong koul en sarawio oh men kadehde duwen kaloalamwahu me e kin kihda:

Ni pilen mahs akan oh kahpwal kan, nan me kamasepwehk oh kainsensuwed kan, erein mohngiong weirek oh loaloaid en luhsang kempoakepah kan, mie mehn kamehlel me mour kin poatoapoat. Atail Kaun oh Sounkomour iei soun kadehde ieias me met iei mehlel.² Sapwellime mahsen nan pwuhk sarawi kan pil itar en kadehde: “Kumwail katokehdi amwail mahwen kan oh esehla me ngehi, iei Koht” (Melkahka Kan 46:10). I kadehde duwen mehlel wet.