2013
Kamwakidada
March 2013

Iren Mahsen en Padahk en Pas, Mahs 2013

Kamwakidada

Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour. Pwehn alehdi iren kapehse kapatapat, tehk reliefsociety.lds.org.

Pwoson, Peneinei, Sawas

Atail soukohp, President Thomas S. Monson, kangoangehier kitail en “kahpahwei sawas oh doarehla irail akan me anahne atail sawas oh pwokada irail pohn ahl ileile oh mwahu. … Met iei sapwellimen Kauno doadoahk, oh ni ansou me kitail kapwkapwaiada poahngok en Kauno, … kitail ahniki pwuhng en alehdi sapwellimen Kauno sawas.”1

Sounpar tohto samwalahro LaVene Call oh ienge sounpadahk en pas pwarek emen lih me sohte kin kalap iang sarawi. Ira letelet ni wenihmwo oh diarada emen nohno pwulopwul. E mesen soumwahu, ahpw ira mwadangete diarada me ah kahpwal iei sakau en wai. Sounpadahk en pas ko mwohndi oh koasoaiaong nohno pwulopwulo me patopato nan kahpwal.

Mwurin ara kohkohla, ira nda, “Ih emen sapwellimen Koht. Kitail ahniki pwukoa en apwalih ih.” Eri ira kin kalap pwarek liho. Ehuehu ansou, ira kin kilang oh pehm me mie kekeirda. Ira peki liho en iang towehda Pwihn en Sawas en Lih. E sohte nohn men kohla, ahpw e kedkedeo iangada sarawi. Mwurin kangoang, liho, ah pwoudo oh neira serepeino kin kohla sarawi. Ohlo pehm Ngehn Sarawio. E nda, “I pahn kapwaiada en pisopo ah kaweid.” Met irail kin pwersekieng Sarawi oh katengtengehr nan tehnpas sarawi.2

Sang Pwuhk Sarawi Kan

3 Nephi 18:32; Doctrine and Covenants 84:106; 138:56

Sang Atail Poadoapoad

Sewsewese irail akan me kin pwupila en pwurodohng nan rongamwahu en Sises Krais wia kisehn mour en Souleng en Imwin Rahn men oh tohn Pwihn en Sawas en Lih. President Brigham Young (1801–77) mahsanih, “Kitail limpoak pene, … oh mweidehng irail akan me kak kilang en kahluwa me maskun kan lao irail kak kilangki pein mesarail ahlo.”3

Eliza R. Snow, sounsawas keriau nan presidensi lap en Pwihn en Sawas en Lih, alehda ni kaping kalahngahn sawas kan en lih akan nan Ogden, Utah, USA, pwehn kakehlailih emenemen. “I wehweki me kisakis laud kin kohda [ni me pid papah] me sohte kin lellahng nan pwuken [rekohd kan],” liho mahsanih. Ahpw pwehki rekohd en nanleng kin wie ntinnting duwen ahn serepein kan ahr doadoak, ni arail kin kapahwei pehrail ong irail me mohngiongirail lemwlemwurlahr, e mahsanih: “President Joseph Smith mahsanih me pwihn wet kokouda pwehn doarehla aramas akan. … Pil ehu pwuhk kin audaudkihda duwen amwail pwoson, sapan, doadoahk mwahu kan, oh koasoi kan. … Sohte mehkot kin salongala.”4

© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/12. Kamanaman ong kawehwe: 6/12. Kawehwehpen Visiting Teaching Message, March 2013. Pohnpeian. 10663 885

Iren sawas akan

  1. Thomas S. Monson, “The Sacred Call of Service,” Liahona, Mei 2005, 55, 56.

  2. Kisin likou ong presidensi lap en Pwihn en Sawas en Lih sang nein LaVene Call serepein.

  3. Brigham Young, nan Daughters in My Kingdom: The History and Work of Relief Society (2011), 107.

  4. Eliza R. Snow, nan Daughters in My Kingdom, 83.

Dahme I Kak Wia?

  1. I koapwoaroapwoariki me I kak luke emen towe me sohte kin kalapw sarawi en iang ie towehda ehu mihting en Pwihn en Sawas en Lih?

  2. Riei lih kan me I kin apwalih ahniki koapwoaroapwoar me re kak peidek rehi duwen me pid rongamwahuo?