“Boya Epai na Ngai”

Nazali na botondi mpo na kozala elongo na bino na likita oyo ya Eklezia ya Yesu Klisto ya Basantu ba Mikolo mya Nsuka. Oyo ezali Eklezia na Ye. Tozwaka nkombo na Ye likolo na biso ntango tokoti na bokonzi na Ye. Azali Nzambe, Mokeli, mpe abongi nie. Tozali bakufi mpe tokonzami na liwa mpe lisumu. Nzokande na bolingo na Ye mpo na biso mpe mabota na biso, Ye abengisi biso tozala penepene na Ye. Oyo ezali maloba na Ye: “Belema mpembeni na ngai mpe nakobelema mpembeni na yo; luka ngai na etingia mpe okomona ngai; senga mpe okozwa; beta, mpe ekofungolama yo.”¹

Na eleko ya Pasika oyo bakundoli biso kotala mpo na nini tolingaka Ye mpe mpo na oyo etali elaka Ye apesi mpo na bayekoli na Ye ya botongono ya kokoma baninga na Ye ya bolingo. Mobikisi apesaki elaka wana mpe alobaki na biso lolenge nini, na mosala na biso mpo na Ye, Ye ayaka epai na biso. Ndakisa moko ezwami kati na bobimisi epai ya Oliver Cowdery ntango azalaki kosalela Nkolo elongo na Profeta Joseph Smith na bobongoli ya Buku ya Mormon: “Tala, ozali Oliver, mpe nalobi na yo mpo na bamposa na yo, yango wana bomba maloba oyo na motema na yo. Zala na botongono mpe etingia na kobatelaka mitindo ya Nzambe, mpe nakolinga yo na maboko ya bolingo na ngai.”²

Nayokaki esengo ya kobelema penepene ya Mobikisi mpe ya boyei na Ye mpembeni na ngai mbala mingi mpenza na nzela ya misala ya pete ya botosi na mitindo na Ye.

Osili koyoka makambo ya lolenge boye. Ekokaki kozala ntango oponaki kokende na liyangani ya elambo. Ezalaki mpo na ngai na Saba ntango nazalaki elenge mpenza. Na mikolo wana tozalaki kozwa elambo na liyangani moko ya mpokwa. Likundoli ya mokolo moko mibu 65 mileki, ntango nabatelaki motindo ya kosangana elongo na libota na ngai mpe elongo na basantu, ezali se komema ngai mpembeni ya Mobikisi.

Libanda ezalaki molili mpe malili. Namikundoli koyokaka pole mpe moto na ndako ya losambo mpokwa wana elongo na baboti na ngai. Toliaki elambo oyo epesamaki na bamemi ya Bonganganzambe ya Alona, kosalaka liyokani elongo na Tata na biso na Lola mpo na komikundola ntango nyonso Mwana na Ye mpe kobatelaka mitindo na Ye.

Na nsuka ya likita toyembaki loyembo “Abide with Me; ’Tis Eventide,” na maloba kati na yango “O Mobikisi, tikala mpokwa oyo elongo na ngai.”³

Nayokaki bolingo mpe kobelema na Mobikisi mpokwa wana. Mpe nayokaki bolendisi ya Molimo Mosantu.

Nalingaki mbala moko lisusu kozongisa makasi mayoki ya bolingo na ngai epai ya Mobikisi mpe penepene na Ye oyo nayokaki na likita wana ya elambo na bolenge na ngai. Yango wana kala mingi te nabatelaki motindo mosusu. Nalukaki kati na makomi. Kati na yango, nayebaki ete nakokaki kozonga lisusu kozwa Molimo Mosantu mpo ete atika ngai koyoka maye bayekoli ya Nkolo mosekwi bayokaki ntango Andimaki libiangi na bango ya koya na ndako na bango mpe mpo na kofanda elongo na bango.

Natangi na ntina ya mokolo ya misato nsima ya Bobakami na ekulusu mpe bokundami na Ye. Basi ya botongono mpe basusu bakutaki libanga ya kolongwa uta na lilita mpe bamonaki ete nzoto na Ye ezalaki kuna te. Bayaki na bolingo mpo na Ye kopakola mafuta na nzoto na Ye.

Banzelu mibale batelemaki mpembeni mpe batunaki mpo na nini bazalaki kobanga, kolobaka:

“Mpo na nini bozali koluka moto na bomoi kati na bakufi?

“Azali awa te kasi asekwi. Kanisa lokola elobaki ye na bino wana ezalaki ye naino na Galilai,

“Ete esengeli Mwana na moto apesama na maboko na bato na masumu mpe abakasama na ekulusu mpe na mokolo ya misato akosekwa.”⁴

Nsango malamu ya Malako ebakisi bokambi uta na moko ya banzelu: “Nde bokenda, boyebisa bayekoli na ye mpe Petelo ete azali kokenda liboso na bino kino Galilai. Bokomona ye kuna, pelamoko elobi ye na bino.”⁵

Bapostolo mpe bayekoli basanganaki na Yelusaleme. Lokola tokokaki kozala, babangaki mpe bakamwaki wana ezalaki bango koloba elongo na ntina ya nini liwa mpe mbando ya kosekwisama na Ye elingaki koloba mpo na bango.

Mibale ya bayekoli batambolaki nsima ya nzanga wana uta Yelusaleme na nzela ya kokende na Emau. Klisto mosekwi abimelaki bango na nzela mpe atambolaki elongo na bango. Nkolo ayaki epai na bango.

Buku ya Luka epesi biso nzela ya kotambola elongo na bango:

“Ejalaki bango kosolana mpe kotunana, Yesu ye mpenja abilemaki bango mpe atambolaki na bango njela moko.

“Nde miso na bango mapekisamaki ete bayeba ye.

“Alobaki na bango ete, Oyo makambo nini majali bino kosolana awa na mobembo, mpe mpo na nini bozali na mawa?

“Bongo moko na bango, nkombo na ye Keleopa, alobaki na ye ete, Bobele yo moko ojali mopaya na Yelusaleme, oyo ayebi makambo mabimi wana na mikolo oyo te?”⁶

Balobaki na Ye na ntina ya mawa na bango ete Yesu akufaki ntango balikiaka ete Ye alingaki kozala Mosikoli ya Yisalaele.

Esengelaki kozala na boboto na mongongo ya Nkolo mosekwi wana ezalaki Ye koloba na bayekoli mibale ya mawa mpe matanga:

“Boye alobaki na bango ete, bino bajoba! Bato na goigoi na mitema mpo na kondima makambo yonso malobaki basakoli:

“Esengelaki Klisto koyoka mpasi oyo mpe kokota na nkembo na ye te?

“Mpe abandaki na mikanda na Mose na basakoli yonso, mpe alimbolaki mpo na bango makambo na ntina na ye mpenja na kati na makomi yonso.”⁷

Nsima ekomaki ntango oyo ekomisaki motema na ngai moto moto uta nazalaki elenge mobali:

“Mpe babelemaki na mboka kuna ejalaki bango kokenda, mpe ye asalaki lokola alingaki koleka na ye.

“Nde bandimisaki ye makasi ete, Tikala awa na biso mpo ete moi etiki mpe butu elingi kokufa. Akotaki na ndako mpo na kotikala na bango elongo.”⁸

Mobikisi andimaki butu wana libiangi ya kokota na ndako ya bayekoli na Ye mpembeni ya mboka Emau.

Afandaki na mesa elongo na bango. Azwaki limpa, apambolaki yango, akataki, mpe apesaki yango epai na bango. Miso na bango efongwamaki mpo ete bayebaki Ye. Nsima Alimwaki na miso na bango. Luka akomaki mpo na biso mayoki ya bayekoli oyo bapambolama: “Balobanaki ete, Wana ejalaki ye kosolola na biso na njela mpe kofungola makomi mpo na biso, mitema na biso mijalaki na moto kati na biso te?”⁹

Na ntango se moko wana, bayekoli mibale yango bakendeki mbangu na Yelusaleme mpo na koloba na Bapostolo zomi na moko oyo ekomelaki bango. Na ntango wana Mobikisi abimelaki bango lisusu.

Ye azongelaki masakoli ya etinda na Ye ya komikaba mpo na masumu ya bana banso ya Tata na Ye mpe mpo na kobuka basinga ya liwa.

“Mpe alobaki na bango ete, Esili kokomama boye ete Klisto akojua mpasi, mpe akosekwa na bakufi na mokolo na misato:

“Mpe ete kobongolama na motema na kolimbisama na masumu, ekosalema na nkombo na ye na mabota yonso, kobanda Yelusaleme.

“Bino bojali batatoli na makambo oyo.”¹⁰

Maloba ya Mobikisi ezali solo mpo na biso lokola mpe ezalaki mpo na bayekoli na Ye ya ntango wana. Tozali banzeneneke ya makambo oyo. Mpe mokumba ya nkembo tondimaki ntango tobatisamaki kati na Eklezia ya Yesu Klisto ya Basantu ba Mikolo mya Nsuka ekomamaki polele mpo na biso na profeta Alma bikeke bileka na mai ya Mormon:

“Mpe esalamaki ete alobaki epai ya bango: Botala, awa ezali mai ma Mormon (mpo bazalaki kobenga yango boye) mpe sikawa, lokola bozali na mposa ya kokota na kati ya etonga ya Nzambe, mpe kobiangema bato ba ye, mpe bozali kondima komema mikumba na bino moko na mosusu, ete mikoka kozala pepele;

“Iyo, mpe bozali kondima kolela elongo na baye bazali kolela; iyo, mpe kolendisa baye batelemi na mposa ya bolendisi, mpe kotelemaka lokola banzeneneke ya Nzambe ntango inso mpe na makambo manso, mpe na bisika binso ekoki bino kozala, kutu kino liwa, ete bokoka kosikolama na Nzambe, mpe kotangama elongo na baye ba bosekwi ya yambo, ete bokoka kozwa bomoi bwa seko—

“Sikawa nakoloba epai ya bino, soki oyo ezali mposa ya mitema na bino, nini ekopekisa bino bobatisama na nkombo ya Nkolo, lokola litatoli liboso na ye ete bokoti kati na liyokani na ye, ete bokosalela ye mpe bokobatela mitindo mya ye, ete akoka kosopa libanda molimo mwa ye mingi koleka likolo na bino?

“Mpe sikawa eyokaki bato maloba maye, babetaki maboko ma bango mpo ya bosepeli, mpe bagangaki: Oyo ezali mposa ya mitema na biso.”¹¹

Tozali na nse ya mayokani mpo na kotombola baye bazali kokelela mpe kozala banzeneneke ya Mobikisi ntango nyonso tozali na bomoi.

Tokokoka kosala yango na kozangaka bokweyi kaka soki tozali koyoka bolingo mpo na Mobikisi mpe bolingo na Ye mpo na biso. Wana ezali biso na botongono na bilaka tosali, tokoyoka bolingo na biso mpo na Ye. Bolingo yango ekobakisama mpamba te tokoyoka nguya na Ye mpe bobelemi na Ye pene na biso na mosala na Ye.

Mbala na mbala Mokambi Thomas S. Monson akundolisi biso na ntina ya elaka ya Nkolo epai ya bayekoli na Ye ya botongono: “mpe nyonso oyo ayambi yo, kuna nakozala lisusu, mpe nakotambola liboso ya elongi na yo. Ngai nakozala na loboko na bino ya mobali mpe na loboko na bino ya mwasi, mpe Molimo na ngai ekozala kati na mitema na bino, mpe banzelu na ngai zingazinga na bino, mpo na kotombola bino.”¹²

Ezali na nzela mosusu bino mpe ngai toyoki Ye kobelema mpembeni na biso koleka. Ntango tozali komipesa na mosala na Ye, Ye abelemaka mpembeni mingi koleka ya baye tolingaka na mabota na biso. Ntango nyonso nabiangemaki na mosala ya Nkolo mpo na kokende mobembo to kotika libota na ngai, nasili komona ete Nkolo azalaki kopambola mwasi na ngai mpe bana na ngai. Ye alengelaki basali na Ye ya bolingo mpe mabaku ya kobelemisa libota na ngai mpembeni na Ye koleka.

Boyokaki mapamboli se moko wana na bomoi na bino. Mingi kati na bino bazali na balingami na bango oyo bazali kowayawaya mosika na nzela ya bomoi ya seko. Bozali komitunanini lisusu bokoki kosala mpo na kozongisa bango. Bokoki kotalela Nkolo mpo na kobelema mpembeni koleka na bango wana ezali bino kosalela Ye na bondimi.

Bomikundola elaka ya Nkolo epai ya Joseph Smith mpe Sidney Rigdon ntango bazalaki mosika ya mabota na bango likolo ya bitinda na Ye: “Baninga na ngai Sidney mpe Joseph, mabota na bino mazali malamu; mazali na maboko na ngai, mpe nakosala na mango lokola ekomona ngai malamu; mpo kati na ngai ezali na nguya nyonso.”¹³

Lokola Alma mpe Mokonzi Moziya, boko baboti ya botongono basaleli Nkolo mingi mpe malamu kasi bazali na bana oyo bazalaki kowayawaya atako komibonza ya baboti na bango mpo na Nkolo. Basili kosala nyonso oyo ekokaki bango kosala kasi emonani kaka mpamba, ata kutu na lisalisi uta na baninga ya bolingo mpe ya botongono.

Alma mpe Basantu ya ntango na ye basambelaki mpo na mwana na ye ya mobali mpe bana ya mibali ya Mokonzi Moziya. Anzelu moko ayaki. Nsambo na bino mpe ya baoyo basalelaka bondimi na bango ekomema basali ya Nkolo kosalisa bato ya libota na bino. Bakosalisa bango bapona nzela ya kozonga ndako epai ya Nzambe, kutu ntango babundisami na Satana mpe balandi na ye, oyo ya ye ntina ezali kobebisa mabota na bomoi oyo mpe na boseko.

Bomikundola maloba elobamaki na anzelu epai ya Alma Elenge mpe bana babali ya Moziya na botomboki na bango: “Mpe lisusu , anzelu alobaki: Tala, Nkolo ayokaki nsambo ya bato na ye, mpe lisusu nsambo ya mowumbo na ye, Alma, oyo azali tata na yo; mpo asambelaki na bondimi boike mpo na oyo etali yo ete okoka komemama na boyebi ya bosolo; yango wana mpo na mwango moye nayei mpo na kondimisa yo nguya mpe likoki ya Nzambe, ete nsambo ya bawumbo na ye ikoka koyanolama engebene na bondimi na bango.”¹⁴

Elaka na ngai epai na bino oyo bozali kosambela mpe kosalela Nkolo ekoki te kozala ete bokozwa mapomboli manso bokoki kolinga mpo na binomei mpe libota na bino. Kasi nakoki kolaka bino ete Mobikisi akobelema mpembeni na bino mpe akopambola bino mpe libota na bino na oyo ezali malamu mingi koleka. Bokozwa bolendisi ya bolingo na Ye mpe bokoyoka eyano ya bobelemi na Ye mpembeni ntango bokosembola maboko na bino mpo na kopesaka lisalisi na basusu. Wana ezali bino kokangisa bampota ya baye kati na mposa mpe kopesa bopetoli ya Bomikabi na Ye na baoyo bayokisami mawa na masumu, nguya ya Nkolo ekosunga bino. Maboko na Ye makosembolama elongo na maye ya bino mpo na kosalisa mpe kopambola bana ya Tata na biso na Lola, kotangaka mpe baoyo bazali na libota na bino.

Ezali na mobembo ya bozongi ndako ya nkembo oyo elengelami mpo na biso. Yango wana tokomona kokokisama ya elaka ya Nkolo oyo tolingaki. Ezali Ye nde ayambi biso na bomoi ya seko elongo na Ye mpe Tata na biso na Lola. Yesu Klisto alimbolaki yango na lolenge oyo:

“Boluka komema mpe kotia Siona na ngai. Bobatela mibeko na ngai na makambo manso.

“Mpe, soki bobateli mitindo na ngai mpe boyiki mpiko kino na nsuka bokozwa bomoi ya seko, oyo likabo eleki monene na makabo nyonso ya Nzambe.”¹⁵

“Mpo bango oyo bakozala na bomoi bakosangola libula ya mabele, mpe baoyo bakufi bakozwa kimia uta na misala na bango nyonso, mpe misala na bango mikolanda bango; mpe bakozwa motole na bandako minene ya Tata na ngai, oyo nalengeli mpo na bango.”¹⁶

Natatoli ete tokoki na nzela ya Molimo kolanda libengisi ya Tata na Lola: “Oyo azali Mwana na Ngai wa Bolingo. Yokela Ye! ”¹⁷

Na maloba na Ye mpe ndakisa na Ye, Klisto alakisi biso boniboni kobelema penepene na Ye. Mwana nyonso ya Tata na lola oyo aponi kokota na ekuke ya libatisi kati na Eklezia akozwa libaku na bomoi oyo ya koteyama nsango malamu na Ye mpe koyoka uta na bawumbo na Ye babiangami libengisi na Ye, “Boya liboso na ngai.”¹⁸

Mowumbo ya liyokani nyonso na Ye o ntei ya bokonzi na Ye na mabele na mokili ya molimo akozwa toli na Ye na nzela ya Molimo wana ezali bango kopambola mpe kosalisa basusu mpo na Ye. Mpe bakoyoka bolingo na Ye mpe bakozwa esengo na kozalaka ya kobelema penepene na Ye.

Nazali nzeneneke ya Bosekwi ya Nkolo solo mpenza lokola soki nazalaki wana na mpokwa elongo na bayekoli mibale na ndako yango na nzela ya Emau. Nayebi ete Ye azali solo mpenza na bomoi lokola eyebaki Joseph Smith ntango amonaki Tata mpe Mwana na pole ya ntongo moko ya kongenga na zamba ya banzete na Palmyra.

Oyo ezali Eklezia ya solo ya Yesu Klisto. Kaka na bafungola ya bonganganzambe oyo esimbami na Mokambi Thomas S. Monson nde nguya ezali mpo na biso ya kokangisama na mabota mpe kozala na bomoi seko na seko elongo na Tata na biso ya Lola mpe Yesu Klisto. Tokotelema na Mokolo ya Bosambisi liboso ya Mobikisi, miso na miso. Ekozala ntango ya esengo mpo na baoyo babelemaki penepene na Ye na mosala na Ye na bomoi oyo. Ekozala esengo ya koyoka maloba: “Malamu, mowumbo malamu mpe ya sembo.”¹⁹ Natatoli boye lokola nzeneneke ya Mobikisi mosekwi mpe mosikoli na biso na nkombo ya Yesu Klisto, amene.