Ang Magbalantay sa Karnero ug ang Nawala nga Karnero

Si Jesus mitudlo sa mga tawo pinaagi sa pagsaysay kanila og mga istorya. Usa ka adlaw Siya misaysay og istorya mahitungod sa usa ka magbalantay sa karnero nga dunay 100 ka mga karnero. Ang magbalantay sa karnero buotan ug mabination. Panalipdan niya ang iyang mga karnero gikan sa bangis nga mga hayop. Bantayan niya kini sa gabii.

Usa ka adlaw niana usa sa mga karnero nawala. Ang magbalantay sa karnero mibilin sa iyang 99 ka karnero sa usa ka luwas nga lugar ug gipangita ang nawala. Nangita siya didto sa kinatumyan sa bukid ug didto sa kamingawan.

Sa dihang sa katapusan iyang nakit-an ang iyang karnero, nagmaya ang magbalantay sa karnero. Gipas-an niya ang karnero ug miuli.

Ang magbalantay sa karnero mitawag sa iyang mga higala ug misulti kanila kon sa unsang paagi nga iyang nakit-an ang iyang karnero. Nagsaulog silang tanan.

Si Jesukristo sama sa mga magbalantay sa karnero sa istorya, ug kita sama sa mga karnero. Nagbantay si Jesus nato ug nagtabang sa pagpanalipod nato gikan sa kakuyaw. Dili Siya mobiya kanato bisan kon kita masayop. Ug Siya malipay kon kita maghinulsol ug mobalik ngadto sa Iyang ebanghelyo. Mao nga ang mga kasulatan motawag Kaniya og Maayong Magbalantay.