Ako Nag-ampo alang Kaninyo

Bag-ohay lang na-late ko og gamay sa pagsimba ug nagdali-daling misulod atol sa pangbukas nga himno. Sa akong pagsulod sa chapel, mas daghang tawo kaysa kasagaran. Samtang nagtan-aw ko sa daghang bisita, nakaamgo ko og duha ka butang: programa sa Primary sa among ward karon, ug may naglingkod na sa akong naandan nga pwesto.

Nagdali ko og lingkod sa unang laray sa ekstrang mga lingkuranan dihang nakakita ko og batan-ong inahan nga miabut guyod ang iyang dos anyos nga anak ug nagkugos sa unom ka bulan nga anak. Akong namatikdan nga ang iyang bana wala mosunod. Sa dihang mitan-aw ko sa palibut sa simbahan, ako siyang nakita sa atubangan, nga naglingkod sa may piano—siya ang tigduyog sa Primary.

Tungod kay dili ko minyo, kasagaran molingkod ko tapad sa usa ka higala. Apan nianang adlawa ang akong higala mibiyahe. Naghunahuna ko nga maayong molingkod tapad sa batan-ong inahan ug sa iyang mga anak, busa mihangyo ko kon makatapad ba ko nila. Ang inahan misugot. Tibuok miting nalingaw ko sa pagtabang sa batang lalaki ug sa pagpaminaw sa mga bata sa Primary.

Sa pagtapos sa miting sa sakrament, ang mama mipaduol ug miingon nga siya nag-ampo para nako nianang buntaga. Nagpaabut ko nga iyang ipasabut pa. Miingon siya nga nag-ampo siya nga makasimba ko ug motupad ug motabang niya. Siya naghunahuna nga basin dili niya mahuman ang miting sa sakrament nga siya-siya lang. Nalipay ko kaayo nga akong natubag ang iyang simple nga pag-ampo, nga gibuhat niana lang buntaga.

Ako nasayud nga ang Ginoo mas nahigugma nato kay sa atong masabtan. Ang pagkasaksi og tubag sa usa ka simple nga hangyo nakatudlo nako og gamhanang leksyon, ug sigurado ko nga ang kasinatian nakatudlo sab niining inahan. Sa dihang mihangyo ko kon makatapad niining sister, wala ko maghunahuna nga tubag ko sa pag-ampo—gibuhat lang nako ang gusto nakong buhaton sa usa ka tawo kon ako anaa sa iyang sitwasyon.

Tinuoray ang Langitnong Amahan maminaw ug motubag sa atong mga pag-ampo, bisan sa daw mga gagmayng butang.