Naʻá Ku Lotua Koe

Naʻá ku kiʻi tōmui atu ki he lotú ki muí ni peá u hū fakatoʻotoʻo ki fale lotu lolotonga e fua hivá, Naʻá ku fakatokangaʻi ʻi heʻeku hū atu ki he fale lotú, ʻoku fonu ange ʻa e fale lotú ʻi he tuʻunga angamahení. ʻI heʻeku sio holo ʻi he kau ʻaʻahí, naʻá ku fakatokangaʻi ai ha meʻa ʻe ua: ko e polokalama Palaimeli ʻeni ʻa homau uōtí, pea kuo nofo ha taha ia ʻi hoku nofoʻanga mahení.

Naʻá ku fakatoʻotoʻo atu ʻo nofo ʻi ha sea he ʻotu muʻá, peá u sio ki ha faʻe kei talavou ʻokú ne taki mai hono kiʻi foha taʻu uá mo fuofua mai hono kiʻi ʻofefine māhina onó. Naʻá ku fakatokangaʻi ʻoku ʻikai haʻu mo hono husepānití. ʻI heʻeku sio takai holo ʻi he fale lotú, ne u sio atu ʻoku tangutu mai ia ʻi muʻa ʻi he pianó—he ko ia te ne tā e pianó maʻá e Palaimelí.

ʻOku ou faʻa tangutu fakataha maʻu pē mo haku kaumeʻa, he ʻoku ou kei taautaha. Ka naʻe ʻalu hoku kaumeʻá ʻi he ʻaho ko iá ki ha feituʻu kehe. Naʻá ku pehē ʻe lelei kapau te u nofo fakataha mo e faʻē kei talavoú mo ʻene fānaú, ko ia naʻá ku kole ange ke u nofo fakataha mo kinautolu. Naʻe loto ki ai e faʻeé. Naʻá ku fiefia ʻi hono tokoniʻi e kiʻi tamasiʻí ke lotú, mo fanongo ki he fānau Palaimelí.

Hili e houalotu sākalamēnití, naʻe punou mai e faʻeé ʻo ne talamai, naʻá ne lotua au ʻi he pongipongi ko iá. Naʻá ku tatali ke ne fakamahinoʻi mai ʻene ʻuhingá. Naʻá ne pehē naʻá ne lotua ke u ʻalu ange ki he lotú peá u tangutu fakataha mo ia ke u tokoni ange kiate ia. Naʻá ne fakakaukau he ʻikai te ne lava ʻo nofo toko taha pē lolotonga ʻa e houalotu sākalamēnití. Naʻe lōmekina hoku lotó ʻi heʻeku hoko ko e tali ki heʻene lotu naʻe fai he pongipongi ko iá.

ʻOku ou ʻiloʻi ʻoku ʻikai mahino moʻoni kiate kitautolu ʻa e ʻofa lahi ange ʻa e ʻEikí ʻiate kitautolú. Naʻe akoʻi mai kiate au ha lēsoni mālohi ʻi heʻeku ʻilo naʻe tali ha kole faingofua, pea ʻoku ou ʻiloʻi pau naʻe akoʻi foki ʻe he meʻá ni ʻa e faʻeé. Naʻe ʻikai te u fakakaukau ʻi heʻeku kole ange ke u tangutu fakataha mo e fefine ko ʻení, te u hoko ko e tali ki ha lotu—naʻá ku fai pē ʻa e meʻa te u loto ke fai mai ʻe ha taha kiate au, kapau te u ʻi hono tūkungá.

Ko e moʻoni, ʻoku ʻafio mai ʻa e Tamai Hēvaní mo tali ʻetau ngaahi lotú, neongo ʻene hā ngali siʻisiʻí.