Dili Nako Moadto og Lain pang Sayaw

Sa among komunidad sa Chicago, Illinois, USA, dili kaabut og 20 ka mga batan-on nga Santos sa Ulahing mga Adlaw nag-eskwela og high school sa eskwelahan nga may mga 4,400 ka estudyante sa duha ka managlahi nga campus. Kami nahimuot sa edukasyon sa among anak nga lalaki, ug daghang mga pamilya nga may taas nga mga sumbanan nagpuyo sa among dapit.

Sa tingpamulak sa junior year sa among anak, gidapit siya og sayaw sa eskwelahan. Iyang ka-date nagsul-ob og nindot, tarung nga sinina, ug naghinam-hinam mi nga masayud kon kumusta ilang gabii. Sa iyang pag-abut, siya miingon, “Dili nako moadto og lain pang sayaw sa eskwelahan!” Miingon siya nga ang mga estudyante misayaw og binastos, nga gipasagdan lang sa administrasyon. Nadismaya ko.

Usa ko ka part-time nga empleyado niining school district, ug duha ka adlaw human sa sayaw nangita ko sa vice principal. Siya usa ka tawo nga may integridad, ug akong gibati nga siya maminaw sa akong kabalaka. Misugyot siya nga mosulat ko sa mga high school principal.

Mainampoon nakong gikonsiderar unsa ang isulti ug mihukom sa pagsulti kanila nga nasagmuyo ko sa dili angay nga sinayawan ug nga gipasagdan lang kini. Taas ang sumbanan alang sa akademik, nganong dili sa tanang mga kalihokan?

Pipila ka bulan ang milabay, ug nagtuo ko nga ang akong sulat gibaliwala lang. Apan usa ka adlaw, atol sa pagparehistro sa pagbalik sa eskwela, usa ka vice principal nangutana nako, “Ikaw ba ang inahan nga misulat kabahin sa sayaw sa eskwelahan?”

“Oo,” mitubag ko.

“Gusto nakong ipahibalo nimo nga ang sulat nakapagubot og gamay!” siya miingon.

Akong nasayran nga usa sa mga principal wala makombinser nga may kinahanglang usabon hangtud nangutana siya og pipila ka estudyante sa ilang mga opinyon. Ang tanan adunay sama nga tubag: “Dili na mi moadto pag-usab sa sayaw sa eskwelahan! Bati gyud kaayo!”

Ang administrasyon miimplementar dayon og mga lagda sa pamatasan sa sayaw, nga ipatuman atol sa usa ka umaabut nga homecoming dance. Ang principal mipahibalo sa mga estudyante nga sila papaulion kon dili mosunod sa mga lagda.

Naghinam-hinam kong makauli akong anak gikan sa homecoming dance. Sa dihang miabut siya, siya miingon nga ang mga estudyante nga wala usaba ang ilang batasan gipapauli. Siya miingon nga kini mao ang labing maayo nga sayaw nga iyang natambungan.

Ako misulat sa administrasyon, nagpasalamat sa paghimo sa labing maayo nga sayaw sa eskwelahan sa dugay nga panahon. Ang vice principal nga akong kaila mitubag: “Salamat sa paghisgot niini sa miaging tingpamulak. Kon wala ang imong ideya walay kausaban nga mahitabo.”

Akong nasayran nga kadaghanan sa mga eskwelahan sa among distrito [county] migamit niining bag-ong lagda sa sayaw, busa liboan na karon ka mga estudyante ang nalingaw sa mga sayaw sa eskwelahan.

Ako nag-ampo nga ang Ginoo mopanalangin kanato nga makakaplag og kaisug sa pagsulti ug pagbarug sa atong gituohan. Akong nakat-unan nga ang usa ka tawo makahimo og kalainan.