Imong Gihupay Akong Kasub-anan

Taud-taud na aktibo ko sa family history ug sa buhat sa templo. Samtang naglambo ko sa akong pagsiksik, hinoon, ako nasayud nga ako adunay problema sa pagpangita og impormasyon kabahin sa usa ka tawo—ang amahan sa akong inahan.

Ang akong inahan wala magtubo sa iyang amahan ug wala nay kontak niya, sa iyang mga igsoon, ug mga paryente sa iyang amahan. Siya walay impormasyon aron sa pagsiguro sa petsa sa pagkatawo o dapit nga natawhan sa iyang amahan, ug dili siya sigurado kon asa o kanus-a kini namatay. Naghunahuna ko kon makita ba gyud nako ang gikinahanglan nga impormasyon.

Usa ka adlaw samtang nagbasa-basa ko sa diary sa akong inahan, nakabantay ko og litrato sa akong lolo. Sa akong pagtan-aw sa luyo, akong nakita nga iya kining gipirmahan ug gipetsahan ug gibutang iyang edad sa dihang nagpalitrato siya. Karon aduna na koy bana-bana nga petsa sa iyang pagkatawo! Naghinam-hinam kong gipangita iyang ngalan ug mga petsa diha sa FamilySearch. Sa akong dako nga katingala, nakita nako nga ang iyang mga ordinansa napahigayon na. Kinsa man kaha ang mipahigayon niining buhat sa templo sa akong lolo?

Sa wala madugay akong nadiskobrehan nga ang buhat gipahigayon sa dugay nang wala igkita nga uyoan. Nangita ko sa iyang mga impormasyon aron makontak ug sa wala madugay nakit-an nako iyang numero sa telepono.

Gikulbaan ko nga motawag niya kay iya kong nakita mga 30 ka tuig na ang milabay—sa dihang usa pa lang ko ka tuig. Wala ko masayud kon unsay iyang reaksyon.

Gihapon, nakahukom kong motawag. Sa dihang siya mitubag, gipasabut nako kon sa unsang paagi akong nakit-an ang impormasyon kabahin sa akong lolo—iyang amahan—ug misulti nga iya kong pag-umangkon.

Dili gyud nako makalimtan iyang tubag: “Wala lang ka masayud sa kasubo nga akong gibati dihang dili na nako makontak imong inahan. Karon imong gihupay akong kasub-anan!”

Among nasayran nga ang iya ug akong pamilya, bisan nagkabulag, nabunyagan ug nakumpirmahan sa Ang Simbahan ni Jesukristo sa mga Santos sa Ulahing mga Adlaw sa mga susamang panahon, ug ang among duha ka pamilya pareho nga lig-on sa ebanghelyo. Kadto malipayon, emosyonal nga higayon alang kanamo.

Dugay na nakong nasabtan nga ang family history ug buhat sa templo makasumpay nato sa atong namatay na nga mga katigulangan, apan wala gyud ko maghunahuna nga kini makasumpay nato sa atong buhi nga mga paryente. Ako mapasalamaton nga ako nakatabang sa paghiusa sa among pamilya pinaagi sa family history—dili lang sa kalibutan sa espiritu apan atol usab sa atong kinabuhi dinhi.