Kuó Ke Toʻo Atu Hoku Mamahí

Naʻe ʻi ai ha taimi naʻá ku fai mālohi ai hono fai e hisitōlia fakafāmilí mo e ngāue fakatemipalé. Ka ʻi he fai atu ʻeku fekumí, naʻá ku ʻiloʻi ʻe faingataʻa haʻaku maʻu ha fakamatala fekauʻaki mo ha toko taha—ko ʻeku kuitangatá ʻi he tafaʻaki ʻo ʻeku faʻeé.

Naʻe ʻikai tupu hake ʻeku faʻeé mo ʻene tamaí, pea ʻikai haʻane toe fetuʻutaki mo ia, hono ngaahi tokouá mo e ngaahi tuongaʻané, mo e kāinga kotoa ʻo ʻene tamaí. Naʻe ʻikai te ne maʻu ha meʻa ke fakamoʻoniʻi ʻaki hono ʻaho fāʻeleʻí pe feituʻu naʻe fāʻeleʻi aí, pea ʻikai te ne ʻiloʻi fakapapau ʻa e feituʻu pe taimi naʻá ne mate aí. Naʻá ku fakakaukau pe te u lava nai ʻo maʻu ʻa e fakamatala ʻoku fie maʻú.

Naʻá ku lau ʻa e tohinoa ʻa ʻeku faʻeé ʻi ha ʻaho ʻe taha peá u sio ai ʻi ha tā ʻo ʻeku kuitangatá. Naʻá ku fulihi hake ʻa e taá, peá u ʻiloʻi ai naʻá ne fakamoʻoni hingoa ʻi he tuʻa taá pea fokotuʻu ai mo e ʻaho ʻo e taá, peá ne fakamahinoʻi ai hono taʻu motuʻa ʻi he taimi ko iá. Ne u maʻu ai ha fakafuofua ki hono ʻaho fāʻeleʻí! Naʻá ku fekumi fiefia ai ki hono hingoá mo e ngaahi ʻahó ʻi he FamilySearch. Naʻá ku ʻohovale lahi ʻi heʻeku ʻiloʻi kuo ʻosi fakahoko hono ngaahi ouaú. Ko hai ia naʻá ne fai ʻa e ngāue fakatemipale ʻo ʻeku kuitangatá?

Naʻe ʻikai fuoloa kuó u ʻiloʻi ko e toko taha naʻá ne fai ʻa e ngāué, ko e taha ia ʻo ʻeku ngaahi faʻē tangatá kuo fuʻu fuoloa haʻaku taʻe sio ki ai. Naʻá ku kumi ki ha fakamatala ke u fetuʻutaki ai kiate iá, pea u maʻu hono fika telefoní.

Naʻá ku manavasiʻi ʻi he ʻamanaki ke u telefoni kiate iá, koeʻuhí he naʻá ma feʻiloaki ʻi he taʻu ʻe 30 kuo hilí--ʻi heʻeku taʻu tahá. Naʻe ʻikai te u ʻilo pe ko e hā ha meʻa te ne faí.

Ka naʻá ku kei fakapapau pē ke u telefoni kiate ia. Naʻá ne tali mai ʻa e telefoní, pea u fakamatalaʻi ange ʻa e anga ʻo ʻeku maʻu ʻa e fakamatala ki heʻeku kuitangatá—ʻa ia ko ʻene tamaí—peá u talaange ko hono fakafotu au.

Te u manatuʻi maʻu pē ʻene talí: “He ʻikai te ke ʻiloʻi ʻeku loto mamahí ʻi he ʻikai te u toe lava ʻo fetuʻutaki mo hoʻo faʻeé. Kuó ke toʻo atu ʻa e mamahi ko iá meiate au he taimí ni!”

Naʻá ma ʻiloʻi neongo e mavahevahe hono fāmilí mo hoku fāmilí, ka naʻa nau papitaiso pea hilifakinima kinautolu ʻo hoko ko e kau memipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he meimei taimi tatau, pea ʻoku tuʻu maʻu ʻi he ongoongoleleí ʻa e ongo fāmilí fakatouʻosi. Ko ha taimi fakafiefia fakaeloto ia kiate kimautolu.

Naʻe ʻosi mahino kiate au ʻoku lava ʻe he ngāue ki he hisitōlia fakafāmilí mo e ngāue fakatemipalé ʻo fakafehokotaki kitautolu ki heʻetau ngaahi kui kuo pekiá, ka naʻe ʻikai haʻaku fakakaukau te ne fakafehokotaki kitautolu ki hotau ngaahi kāinga ʻoku nau kei moʻuí. ʻOku ou fakamālō koeʻuhi ko ʻeku lava ʻo tokoni ki hono fakatahaʻi homau fāmilí ʻi he hisitōlia fakafāmilí—ʻo ʻikai ʻi he maama fakalaumālié pē ka ʻi he lolotonga foki ʻo ʻemau moʻui ʻi he māmaní.