Ang mga Lider sa Simbahan Naghisgot sa “Pagpadali sa Trabaho”

Taliwala sa mga kausaban nga gikinahanglan sa mga tin-edyer nga Santos sa Ulahing mga Adlaw sa pag-apil sa pagpangandam sa misyonaryo, buhat sa family history ug templo, ug pagtudlo panahon sa Dominggo, ang mga lider miingon nga ang kabatan-onan sa Simbahan “gitawag sa paglihok” ug gisugo sa “pagtindog ug pagpakita” (D&P 115:5).

Ang mga kausaban nakapaklaro sa usa ka butang: “Ang Ginoo adunay usa ka butang nga Iyang gustong buhaton,” miingon si Elder Paul B. Pieper sa Seventy.

Si Elder Pieper, Executive Director sa Priesthood Department, bag-ohay lang nga miapil sa usa ka Church News roundtable nga diskusyon mahitungod sa mga kausaban nga makaepekto sa kabatan-onan sa daghang mga bahin. Miapil usab sa roundtable nga diskusyon mao si Elder Allan F. Packer sa Seventy ug Executive Director sa Family History Department, si Elder William R. Walker sa Seventy ug Executive Director sa Temple Department, si Elder W. Craig Zwick sa Seventy ug Assistant Executive Director sa Missionary Department, si Elder Paul V. Johnson sa Seventy ug Commissioner sa Church Education; si Elder Dennis C. Brimhall, usa ka Area Seventy ug tigdumalang direktor sa Family History Department, ug si Linda K. Burton, kinatibuk-ang presidente sa Relief Society.

Nagpasabut sa pagpakunhod sa edad sa sa batan-ong mga lalaki ug babaye nga makasugod sa misyonaryo nga pagserbisyo, ngadto sa bag-ong kurikulum sa kabatan-onan, ug Sulat sa Unang Kapangulohan naghangyo nga ang kabatan-onan sa pag-apil sa pagsiksik sa family history ug sa pagdala og mga pangalan sa pamilya ngadto sa templo, si Elder Pieper miingon nga siya wala makamatikod sa “tulo ka laing-laing mga kausaban nga mahitabo” sa dili pa ang komperensya. Nakahinumdom ko nga miadto sa komperensya … ug nangutana sa akong kaugalingon, ‘Giunsa man pagkahan-ay niining tanan?’ Klaro kaayo nga ang Ginoo ang nagpahigayon niini.”

Si Elder Zwick miingon nga ang mga pulong sa Ginoo klaro: “Ako modali sa akong buluhaton diha sa iyang angay nga panahon” (D&P 88:73). “Ang Ginoo Mismo mao ang nagdumala niini,” siya midugang. “Wala gayuy henerasyon sa kabatan-onan nga giandam alang sa kurikulum sama [sa kabatan-onan] karon. Wala gyuy laing grupo sa kabatan-onan nga nakahimo og daghang mga bunyag o dugang mga ordinansa alang sa mga patay … [o] nga nahiduol sa buhat sa templo ug sa tanang aspeto niini kay niini nga grupo. Ug sigurado kining tanan … nakaandam nila alang sa misyonaryo nga pagserbisyo ug nagtukod og sigurado nga pundasyon alang sa dugang nga mga responsibilidad pagkahuman sa ilang misyon.”

Kini gamhanan kaayo nga mensahe nga ang Dios misalig sa Iyang kabatan-onan, miingon si Elder Brimhall.

“Kon ang Ginoo mobuhat og bisan unsa, ang tanang butang mahimutang sa iyang lugar sa eksakto nga panahon, ug mao kana ang nahitabo niini,” miingon si Elder Johnson, nga kadtong nagtrabaho sa bag-ong kurikulum sa kabatan-onan wala makahibalo nga adunay kausaban sa edad nga makasugod na ang mga misyonaryo sa pagserbisyo.

Si Elder Walker naghisot sa mga sulat sa Unang Kapangulohan nag-awhag sa kabatan-onan sa pagkompleto sa ilang family history ug dad-on kadto nga mga pangalan sa templo. “Ang kabatan-onan makahimo sa pagkuha sa ilang kaugalingong may kinutuban nga gamit nga rekomend … usa na ka talagsaong butang,” siya miingon. “Ang kabatan-onan [ma] tinguhaon nga moapil sa paghimo sa buhat sa templo ug pagsabut sa doktrina. … Makatabang gayud kana sa pag-andam nila sa espirituhanong paagi alang niining tanang talagsaong butang nga giandam alang kanila.”

Si Elder Packer miingon nga bag-ohay lang siya nakadungog sa usa ka batan-ong babaye nga mibarug ug mipakigbahin sa iyang pagpamatuod mahitungod sa buhat sa family history. “Mas makalingaw kaayo kini kay sa unsay gisulti sa tigulang,” siya miingon.

“Mao kana ang Espiritu ni Elijah,” miingon si Elder Walker. “Mao kana ang pagpabalik sa mga kasingkasing sa mga bata ngadto sa mga amahan ug mga amahan ngadto sa mga bata.”

Ang buhat sa family history, midugang si Elder Packer, makapausab kon sa unsang paagi ang kabatan-onan mohimo sa mga desisyon ug sa unsay ilang bation niini nga mga hagit. Miingon siya nga tingali sila maghunahuna, “Kon si Lolo mihimo niini, ako makahimo usab niini.”

Miingon siya nga ang presidente sa templo mireport nga kon ang kabatan-on mobarug isip proxy sa mga bunyag alang ni bisan kinsa, mopahiyum sila, apan “kon sila mopahigayon niini alang sa ilang katigulangan, magluha ang ilang mga mata. Mobati sila og mas lawom; mobati sila og dugang pa.”

Pagtabang sa kabatan-onan nga makabaton og panglantaw mao ang usa ka tumong sa kurikulum sa kabatan-onan— diin ang mga kapanguhaan sa pagkat-on mipuli sa mga manwal sa leksyon, miingon si Elder Pieper. Ang kurikulum motugot sa mga magtutudlo sa kabatan-onan sa pagtino unsay ilang gikinahanglan aron sa paghimo og kasinatian sa Dominggo nga makapaandam sa kabatan-onan alang sa buhat family history ug pagserbisyo og misyon.

“Ang bag-ong MTC mao ang panimalay,” miingon si Elder Packer. “Ang bag-o nga mga sentro sa family history mao ang panimalay. Ang bag-ong kurikulum motabang sa kabatan-onan ug mga ginikanan niana nga tahas.”

Ang mensahe sa mga ginikanan mao nga “ang mga lider sa Simbahan mosalig kaninyo isip mga ginikanan ug mosalig niining batan-ong mga lalaki ug babaye nga gipadako sa inyong mga panimalay,” miingon si Elder Zwick.

Ang tanang mga kausaban mogiya sa “Simbahan diin kini gikinahanglan nga anaa, nga gipanagna nga asa kini,” miingon si Elder Johnson. “Ang Ginoo nasayud unsa ang umaabut, ug … kini mao lang ang usa sa daghang mga butang nga Iyang nahimo sa pagpadayon sa gingharian, sa pagtabang niini nga mokaylap.”

Miingon si Elder Pieper, sa dihang namalandong sa tanan nga nahitabo atol sa kinatibuk-ang komperensya sa Oktubre, siya nakakita sa “usa ka propeta nga dunay mga yawe, miabli sa pultahan ug miingon, ‘Sulod na mo.’ Giimbitar namo kamo sa pagduol ug sa pag-apil niini nga buhat. Karon ang panahon sa Ginoo. Nasayud kitang tanan niini. Gibati kini natong tanan. Gibati kini sa Simbahan. Siyempre kini dunay epekto.”