Ko Hono Tokoniʻi ʻa Kinautolu ‘oku Faingataʻaʻia Fakaesinó

‘I he taimi naʻe ui ai ‘a Lini Pāsoni ko e tokotaha mataotao ki he ngaahi faingataʻaʻia fakaesino ‘i he Siteiki Heesi Tekisisí, naʻá ne loto ke ne fakahoko hono fatongiá ʻi ha founga ‘e tāpuekina ai ‘a e moʻui ‘a e kāingalotu ‘o hono siteikí, kae tautautefito ki he kāingalotu ‘oku ‘i ai haʻanau ngaahi faingataʻaʻia fakaesinó mo honau fāmilí.

Ko e taha ‘o e ngaahi ‘uluaki meʻa naʻe fai ‘e Liní, ko ‘ene lau ‘a e ngaahi fakamatala fekauʻaki mo hono fatongiá ‘i he LDS.org (lds.org/callings/disability-specialist), pea naʻá ne ngāue ʻaki mo e Tohi Tuʻutuʻuni Fika 2: Ko Hono Puleʻi ʻo e Siasí ke mahino kiate ia ‘a e ngaahi tuʻutuʻuni ‘a e Siasí ‘o fekauʻaki mo kinautolu ‘oku ai haʻa nau ngaahi faingataʻaʻia fakaesinó. Naʻe hoko foki ʻa e uepisaiti The Disability Resources [Ko e Ngaahi Maʻuʻanga Tokoni ki he Ngaahi Faingataʻaʻia Fakaesinó] (lds.org/disability) ko ha maʻuʻanga tokoni. Naʻe tokoni ke mahino kiate ia ʻa e ngaahi faʻahinga kehekehe ‘o e faingataʻaʻia fakaesinó, pea hoko ia ko ha maʻuʻanga tokoni ke ne vahevahe mo e kau mēmipa ‘o hono siteikí.

‘Oku pehē ‘i he Tohi Tuʻutuʻuni Fika 2, “ʻE lava ke ui ‘e he kau pīsopelikí pe kau palesitenisī fakasiteikí ha mataotao fakauooti pe fakasiteiki ki he faingataʻaʻia fakaesinó, ke tokoni ki he fakafoʻituituí mo e ngaahi fāmilí.”‘Oku toe ‘omi foki ‘e he¹ LDS.org ha fakamatala lahi ange ‘o kau ki he fatongia ko ‘ení, pea fakamatalaʻi ai ‘o pehē, ko e “fatongia ‘o e tokotaha mataotao ki he faingataʻaʻia fakaesinó ko e tokoni ki hono fakafaingamālieʻi ke lahi ange ‘a e kau mo hono fakakau mai ‘o e kāingalotu ‘oku ‘iai haʻanau ngaahi faingataʻaʻia fakaesinó.²

Naʻe pehē ʻe Lini ‘i heʻene maʻu ‘a e mahino ko ‘ení ‘okú ne fie “tokoni ki he kau takí ke fakahoko honau ngaahi fatongiá, ‘aki ‘enau maʻu ‘a e ngaahi meʻangāue ‘oku nau fie maʻu ke nau tokoni ai ki he kakai ‘oku ‘i ai honau faingataʻaʻia fakaesinó.”

Naʻe maʻu foki ‘e Lini ha fakamatala mei he koló mo e ngaahi maʻuʻanga tokoni fakafonuá, ko e ‘Initanetí, mo e kāingalotu ‘o e uōtí mo e siteikí kuo nau taukei he ngāue mo e kakai ‘oku faingataʻaʻia fakaesinó. Naʻe ngāue ʻaki ‘e Lini ‘a e ngaahi maʻuʻanga tokoni ko ‘ení ‘i heʻene kumi ki ha ngaahi founga ke fakaleleiʻi ‘aki ha ngaahi faingataʻa ‘oku fehangahangai mo e kau takí mo e fāmili ‘i hono siteikí. Naʻe ‘ikai te ne ‘iloʻi maʻu pē ‘a e feituʻu ke ne maʻu mei ai ha fakamatala pe tokoni, ka naʻá ne pehē, “kapau te ke fekumi fakamātoato ‘i he lotu ke maʻu ha tali, ‘e ueʻi hake koe ke ke ʻiloʻi ‘a e feituʻu ke ke maʻu ai ha talí.”