Fakatupulaki Hoʻo Ngaahi Lotu Fakafoʻituituí

Ko e lotú ko ha fakatau folofola ia ki he ʻOtua ko e Tamai Taʻengata ʻa hotau laumālié—ʻo ʻikai kiate Ia, kae kiate Ia. ʻOkú Ne ʻofa haohaoa ʻiate kitautolu taki taha, pea fonu ʻi he ʻaloʻofá mo e mahinó. ʻOkú Ne ʻafioʻi ʻa e meʻa kotoa pē kiate kitautolú. ʻOkú Ne ʻafioʻi ʻa e meʻa ʻoku tau fie maʻú, neongo ʻoku tau sio pē ki he meʻa ʻoku tau fie maʻú. ʻOkú ne maʻu ha mālohi mo e ivi ʻoku taʻe-fakangatangata ke poupouʻi hake mo tataki kitautolu. ʻOkú Ne hōifua maʻu pē ke fakamolemoleʻi kitautolu mo tokoniʻi kitautolu ʻi he meʻa kotoa pē.

Te tau lava ʻo fefolofolai mo e Tamai Hēvaní ʻaki hotau leʻó pe ʻi he ngaahi fakakaukau mo fakahā mei hotau ʻatamaí mo e lotó. ʻOku totonu ke molumalu ʻa e ngaahi lotu fakafoʻituituí, pea hoko ko ha ngaahi fakahā toputapu ʻo e fakafetaʻi mo e houngaʻiá, tautapa fakamātoato mei he lotó koeʻuhi ko ha ngaahi fie maʻu mo e ngaahi holi, anga fakatōkilalo, vete e ngaahi angahalá ʻi he loto fakatomala mo kole ke fakamaʻa ʻi he fakamolemole, tautapa ki ha fakafiemālie, fakahinohino mo maʻu fakahā. ʻOku faʻa fakatupu ʻe he ngaahi tautapa ko ʻení ʻa ʻetau fakahā hake hotau laumālié ki heʻetau Tamai Hēvani ʻofá.

ʻOku faʻa hoko ʻa e lotú ko ha fetuʻutaki nounou pē, pea ʻoku toe lava foki ke hoko ia ko ha fetalanoaʻaki ʻoku hokohoko atu taʻetuku ʻi he ʻahó mo e pō kotoa (vakai, ʻAlamā 34:27).

ʻOku kau ʻi he palani fakalangi ʻa e Tamai Hēvaní, ʻa e fie maʻu ke mavahe fakasino mo fakalaumālie mei Hono ʻaó. ʻOku ʻaonga pea ʻoku mahuʻinga e hoko ʻa e lotú ko ha fehokotakiʻanga fakalaumālie ʻi he ʻOtuá mo e tangatá. ʻOku ʻikai lava ha foki ki he Tamaí taʻe kau ai e lotú. Ka ʻikai fai ha lotu, ʻoku ʻikai lava ke maʻu ha tui feʻunga ke mahino mo tauhi e ngaahi fekaú. Ka ʻikai e lotú, he ʻikai ke maʻu ʻa e mālohi fakalaumālie ko ia ʻoku fie maʻu ke fakaʻehiʻehi ai mei he ʻahiʻahí pea ikunaʻi ʻa e ngaahi siví mo e faingataʻá. Ka ʻikai fai ha lotu, he ʻikai lava ke maʻu e fakatomalá, fakamolemolé mo e mālohi ʻo e Fakaleleí ke fakamaʻá. ʻOku lava ke fakahoko ʻa e meʻa kotoa pē ʻi he mālohi ʻo e lotu fakafoʻituituí.

ʻOku fakafaingamālieʻi ʻe he lotú ʻa e maʻu fakahā fakafoʻituituí mo e ngaahi meʻafoaki fakalaumālie mei he Laumālie Māʻoniʻoní. Ko e fetuʻutakiʻanga fakalaumālie ia ʻoku ʻomi ki he fānau kotoa ʻa e “ʻOtuá pea lava ke tau fetuʻutaki maʻu pē ki heʻetau Tamai Taʻengatá, mo Hono ʻAlo ʻOfaʻangá mo e Laumālie Māʻoniʻoní. Ko e lotú ko ha fakamoʻoni mālohi lahi ki hono moʻoni ʻo e ʻOtua ko e Tamai Taʻengatá. ʻOku mahuʻinga ʻaupito ʻa e lotu fakafoʻituituí ke mahino kiate kitautolu ʻa e ʻOtuá mo hotau tuʻunga fakalangí.

Naʻe fanauʻi mai homa foha fika nima ko Penisimaní ʻi he taʻu ʻe 20 siʻi kuo hilí. Naʻe ongoʻi ʻe hoku uaifí ʻoku ai ha meʻa ʻoku fehalaaki ʻi he mata ʻo Penisimaní. Naʻá ma talanoa ki hama kaumeʻa ofi mo e mataotao ki he matá ʻi homau uōtí, pea naʻá ne fakapapauʻi mai ʻoku moʻoni ʻa e meʻa naʻá ma hohaʻa ki aí, ʻo fakahā mai ʻoku maʻu ʻe Penisimaní ko e faʻahinga kanisā ia ʻo e matá ʻoku hāhāmolofia. Naʻe fakamamahi ʻaupito ʻa e ongoongó.

Naʻe ʻosi mei ai ha ngaahi uike siʻi, pea fai ʻa e ʻuluaki tafa ʻo e ngaahi tafa lahi naʻe fai ki hono matá. Naʻá ma talanoa mo e tangata faitafá ki muʻa pea toki fai ʻa e tafá, peá ma fakahā ange kiate ia ʻokú ma tui te ne ʻiloʻi ʻe lava ʻo fakamoʻui ʻa e mata ʻo Penisimaní, pea ʻoku ʻikai fie maʻu ke toʻo ia. Naʻe ʻaukai mo lotu ʻa e kau mēmipa kotoa ʻo homa fāmilí mo ha kāingalotu tokolahi koeʻuhi ko homa fohá, pea naʻa mau tui lahi ʻe fakamoʻui ʻa Penisimani.

Naʻe foki mai ʻa e toketā faitafá ʻi he ʻosi ha houa ʻe taha ʻo ne fakamahinoʻi mai kuo fakaʻauha ʻa e mata ʻo Penisimaní ʻe he ngaahi selo ʻo e foʻi ngungú, pea ʻoku ʻasi foki ʻi hono mata ʻe tahá ha ngaahi foʻi ngungu ʻoku fie maʻu ke fai leva hano faitoʻo. Naʻá ku fakalongolongo ʻo ʻikai toe lea. Naʻe fonu hoku lotó ʻi he mamahi mo e taʻetui, peá u hū atu mei he fale mahakí ki he hahau pongipongi ʻo Seni Felenisisikoú, pea kamata ke u lue ʻi he halá, mo tangi mamahi.

Ne u fai ʻa e meʻa kotoa pē naʻe akoʻi ke u faí. Naʻa mau lotu pea mau ongoʻi mālohi ke fili ʻa e toketā ko ʻení. Naʻa mau ʻaukai mo lotu pea mau ongoʻi fakapapau ʻe fakamoʻui homa foha kei valevalé ʻi he tui mo e mālohi ʻo e lakanga fakataulaʻeikí. Ka naʻe ʻikai tokoni mai ʻa e ʻEikí. Naʻe hangē ʻemau tuí ko ha ʻamanaki kuo taʻeʻaongá. Naʻe kamata ke u fehuʻia ʻa e meʻa kotoa pē naʻá ku tui ki aí. Naʻá ku ongoʻi kuo lavakiʻi au pea u ʻita. Naʻe lōmekina hoku lotó ʻi he mamahí.

ʻOku ʻikai te u pōlepole ʻi heʻeku talanoa mo e Tamai Hēvaní ʻi heʻeku lue atu mo tangi ʻi he pongipongi ko iá. Naʻe ʻosi ha taimi lahi, peá u toki lava ʻo mapukepuke hoku lotó. Ne u manatuʻi ha fakalea ʻo ha foʻi hiva ʻa e Palaimelí. “ʻE Tamai Hēvani, ʻokú ke ʻi hena? Pea ʻokú ke fanongo mo tali ʻa e lotu ʻa e fānau valevalé?” Koeʻuhí kuo ʻikai te ke fanongo mai kiate au pe mahalo ʻoku ʻikai te ke tokanga moʻoni mai kiate au mo hoku fohá. (“A Child’s Prayer,” Children’s Songbook, 12.)

Naʻe hoko mai he taimi ko iá ha ʻaloʻofa ongongofua kiate au. Naʻá ku ongoʻi ʻa e ngaahi lea ko ʻení ʻi hoku ʻatamaí mo hoku lotó: “ʻE Kēvini, ko hoku foha foki ia.” Naʻe ʻikai ha fakaveiveiua ʻi he ueʻi fakalaumālie ko iá. Naʻe mahino kiate au ʻi he mōmēniti ko iá, naʻe teʻeki ke mahino kiate au ʻa e taumuʻa ʻo e lotú. Naʻá ku pehē pē, koeʻuhi ʻoku ʻi ai haʻaku taumuʻa māʻoniʻoni, te u lava ʻo ngāue ʻaki ʻa e lakanga fakataulaʻeikí mo e ʻaukaí mo e lotú ke liliu e finangalo ʻo e ʻOtuá.

Ko ʻeku fuofua ʻiloʻi kakato ʻeni ʻi heʻeku moʻuí, ʻoku ʻikai ko au ʻoku pulé. Naʻá ku ʻiloʻi ʻoku fie maʻu ke u fakavaivai ki he finangalo ʻo e Tamaí. ʻE ʻikai te u lava ʻo maʻu ʻa e meʻa ʻoku ou fie maʻú, ʻi he taimi mo e founga ʻoku ou fie maʻu ai iá, koeʻuhi pē ko ʻeku tauhi ʻa e ngaahi fekaú. ʻOku ʻikai ko e taumuʻa ʻo e lotú ke fakahā ki he Tamai Hēvaní ʻa e meʻa ke faí, ka ko ha feinga ke ʻiloʻi ʻa e meʻa ʻokú Ne finangalo ke u faí mo ʻiloʻi. ʻOku fie maʻu ke fakatatau hoku lotó ki Hono finangaló.

Naʻe pau ke mau fekuki ʻi ha taʻu ʻe ono kehe mo e ngaahi faingataʻa lahi ʻi heʻemau fefaʻuhi mo e tuʻunga naʻe ʻi ai homa fohá, ke fakahaofi hono mata ʻe tahá pea mo ʻene moʻuí. Ka naʻá ku ʻiloʻi heni, naʻe ʻafioʻi ʻe he Tamai Hēvaní pea ko Ia ʻoku pulé. Pea neongo pe ko e hā ha meʻa ʻe hokó, ka kuó Ne ʻafio mai mo tali ʻeku lotú. ʻOku lolotonga ngāue fakafaifekau taimi kakato he taimí ni ʻi Sipeini homa foha ko ʻeni ne hoko ha mana ʻi heʻene moʻuí.

ʻOku ou maʻu ha fakamoʻoni fakapapau ʻi heʻeku moʻuí, ko e ʻOtuá ʻa ʻetau Tamai Hēvani ʻofá pea ʻokú Ne ʻafio mai mo tali ʻetau lotú. ʻI he hoko atu hoʻomou ako mo ʻiloʻi ʻa e tefitoʻi moʻoni ʻo e lotu fakafoʻituituí ʻo hangē ko hono akoʻi ia ʻe he Fakamoʻuí, ʻe hoko ai e lotú ko ha tupuʻanga ʻo e mālohi fakalaumālie lahi mo e fakahā ʻi hoʻo moʻuí.