Ngaahi Fakahinohino Mālohi ʻo e Laumālié

Naʻá ku ʻalu ki Palemaila, ʻi Niu ʻIoke ʻi heʻeku kei talavoú ʻi ha efiafi ʻo e faʻahitaʻu māfana ʻe taha. Naʻá ku nofo toko taha ai ʻi he Vao ʻAkau Tapú. Naʻá ku tūʻulutui ai ʻo lotu ki he Tamai Hēvaní, ke fakahā mai kiate au ha fakamoʻoni pe ko ha fakaʻilonga ki he meʻa kuó u ʻosi ʻiloʻi fakapapau naʻe hoko ʻi he potutoputapu ko iá. Naʻá ku lotu fuoloa ʻaupito ʻi he loto fakamātoato moʻoni, mo e loto-ʻapasia. Pea naʻe ʻikai te u maʻu ha tali pe ko ha ueʻi fakalaumālie mei he Laumālie Māʻoniʻoní. Naʻe ʻikai fakahā mai ha meʻa. Naʻe faifai pea tuku ʻeku feingá, pea u foki loto-mamahi mo pehē, “Ko e hā e meʻa naʻe ʻikai tonu ʻeku faí? “Ko e hā hono ʻuhingá?” Ko e hā ha meʻa naʻá ku toe fie maʻú?” Naʻe hangē kiate au naʻe ʻikai ke ʻi ai ha feituʻu lelei ange mei he feituʻu ko iá ke maʻu ai ha tali ki ha lotu pehē.

Naʻá ku ako mei he meʻa ko iá, ʻe ʻikai te tau lava ʻo ʻekeʻi ha meʻa pē mei he ʻOtuá. ʻE ʻikai te tau lava ke pehē ange, “Kuo pau ke ke tali mai ʻi he founga ko ʻení, ʻi he taimí ni pē.” Ko Ia pē te ne fokotuʻu ʻa e founga mo e taimi mo e meʻa te Ne fakahā mai kiate kitautolú. Ko hotau fatongiá pē ke tau ʻi he tuʻunga totonú ke tau maʻu ʻa e ueʻi pe ngaahi fanafana ʻe fai maí, ʻa ia ko e fakahā mo e fakahinohino ʻa e Laumālié. Ko Ia te Ne fokotuʻu mai ʻa e foungá mo e taimí.

Ko e meʻa ko ia naʻá ku fekumi ki ai ʻi he taimi ko iá—ʻa ia naʻe ʻikai fakahā maí—naʻe fakahā moʻoni mai ia kiate au ʻi he ʻosi ha uike ʻe nima pe ono mei ai. Naʻá ku ʻi ʻapi ʻo lau e Tohi ʻa Molomoná. Naʻe ʻikai te u kole, ka naʻá ku maʻu ha ueʻi mālohi, ko ha ongo naʻe hū mai ki hoku lotó, ʻa ia ko ha fetuʻutaki mei he Laumālie Māʻoniʻoní ʻo fakapapauʻi mai kiate au ʻeku tuí mo ʻeku fakamoʻoní.

Ko ha fetuʻutaki mālohi ia, pea naʻá ne ngaohi au ke u tangi. Naʻe hoko foki ia ko ha fetuʻutaki haohaoa, he naʻe ʻikai fie maʻu ke toe lea ʻaki ha meʻa. ʻOku ʻikai fie maʻu ke fakangatangata ʻa e Laumālié ki he leá; ka ʻokú Ne fetuʻutaki ʻi he Laumālie ki he laumālie ʻi he lea ʻoku ʻikai taʻemahino, koeʻuhí he ʻoku ʻikai ha lea ia ʻe lea ʻaki. Ko e fetuʻutaki ia ʻo e ʻilo haohaoa mo ha fakamatala mei he Laumālié, pea kuó u ʻiloʻi ko e founga lelei taha ia ke te maʻu ai ʻa e ʻiló. ʻOku mālohi mo tolonga fuoloa ange ia ʻi he alá mo e sió, he te tau lava ke tālaʻa ʻi he ngaahi ongo fakasinó, ka ʻe ʻikai te tau tālaʻa ʻi he taimi ʻoku lea mai ai e Laumālié kiate kitautolú. Ko e fakamoʻoni moʻoni tahá ia. Ko e ʻuhinga ia ʻoku hoko ai ko e angahala ʻoku ʻikai fakamolemoleá, ʻa hono fakaʻikaiʻi ʻo e Laumālie Māʻoniʻoní pe ko e fakamoʻoni ʻa e Laumālie Māʻoniʻoní.

ʻOku ou fiefia ʻi he moʻoni naʻe ʻikai tali mai ʻe he ʻEikí ʻeku lotu ʻi he Vao ʻAkau Tapú, koeʻuhí he naʻá ku mei fakakaukau, kuo pau ke ʻalu ha taha ki Palemaila koeʻuhí ke ne toki lava ai ʻo maʻu ha fakamoʻoni ki he Palōfita ko Siosefa Sāmitá. ʻOku ou ʻiloʻi he taimí ni te ke lava ʻo maʻu ia ʻi ha feituʻu pē. ʻOku ʻikai fie maʻu ke ke ʻalu ki Selūsalema ke ke maʻu ai haʻo fakamoʻoni ki he ʻEiki ko Sīsū Kalaisí. ʻOku lava ʻe ha taha pē ke maʻu ha fakamoʻoni, ʻi ha feituʻu pē ʻokú ne ʻi ai, koeʻuhí he ʻoku ʻafioʻi lelei kitautolu kotoa pē ʻe heʻetau Tamai Hēvaní mo e Laumālie Māʻoniʻoní. ʻOkú Na ʻafioʻi ʻa e feituʻu ʻoku tau ʻi aí, mo e founga ke na kumi ai ʻa kitautolú. Pea ʻoku ʻikai te Na fie maʻu ha visa. ʻOkú Na ʻafioʻi ʻa e māmaní kotoa! Kuó Na ʻosi ʻafioʻi ia.

ʻOku ou palōmesi kiate kimoutolu ʻa e kakai kei talavoú, kapau te mou fai atu ʻi he tui faivelengá, mo kole ki he ʻEikí, te Ne ʻoatu kiate kimoutolu ʻa e tali tatau, mo e fakamoʻoni tatau, mo e fakapapau tatau mo ia kuó Ne fai mai kiate aú, he ʻoku ou ʻiloʻi ʻokú Ne ʻofa ʻiate kimoutolu kotoa pē ʻo hangē ko ʻEne ʻofa ʻiate aú, pe ko Palesiteni Tōmasi S. Monisoní, pe ko ha taha pē ʻo ʻEne fānaú.

ʻOku maʻá e kakai kotoa pē e ʻofa ʻa e ʻOtuá, pea ʻoku ʻikai fakangatangata ia. ʻOkú Ne afioʻi ʻa e founga ke Ne fetuʻutaki ai ki he toko taha kotoa pē. ʻOkú Ne ʻafioʻi ʻa e feituʻu ʻoku mou ʻi aí mo e founga ke Ne fetuʻutaki atu ai ki homou lotó mo homou laumālié ʻi he Laumālie Māʻoniʻoní. ʻOua naʻa tuku hoʻomou lotú. ʻOua naʻa tuku hoʻomou kolé. ʻOua naʻa tuku hoʻomou talangofua ki he ngaahi fekaú. ʻE hokosia ʻa e taimi, kapau ʻoku teʻeki hoko ia, te mou maʻu ai ha fakamoʻoni mālohi. Pea ʻe ʻikai tuʻo taha pē ʻene hokó. Ka ʻe lava ke toutou hoko ia ʻi hoʻomou moʻuí tuʻunga ʻi he ʻaloʻofa ʻa e ʻEikí.

Naʻe hoko pehē mai ia kiate au. Naʻe lolotonga ʻeku ngāue fakafaifekau ʻi Tukamani ʻi ʻĀsenitina,naʻá ku akoʻi ai ha fāmili peá u fakamoʻoniʻi kiate kinautolu ʻa e ʻUluaki Mata Meʻa-Hā-Mai ʻa e Palōfita ko Siosefa Sāmitá. Naʻe ʻikai tui ki ai ʻa e fāmilí. Neongo iá, ʻi he taimi ne fai ai ʻeku fakamoʻoní, ne u toe maʻu ha fakapapauʻi moʻoni ʻo ʻeku fakamoʻoní. Naʻe folofola mai ʻa e Laumālié, “ʻOku moʻoni ʻa hoʻo fakamoʻoní.” Naʻá Ne fakamoʻoniʻi mai kiate au ʻeku fakamoʻoní.

Te ke toutou maʻu ʻi hoʻo moʻui ha fakapapauʻi moʻoni ʻoku ʻi ai e ʻOtuá, ko ʻetau Tamai Hēvaní Ia, pea ʻokú Ne moʻui, pea naʻá Ne ui e Palōfita ko Siosefa Sāmitá ke ne hoko ko e Palōfita ʻo Hono Toe Fakafoki Mai ʻo e Ongoongoleleí, ʻoku moʻui Hono ʻAló, pea ʻoku feʻunga ʻEne ʻaloʻofá ke fakahaofi kitautolu, fakamaʻa kitautolu, mo fakamolemoleʻi kotoa kitautolu. ʻOku toutou hoko mai ʻa e fakamoʻoni ko iá ʻi heʻetau moʻuí kotoa.

ʻOku ou ʻiloʻi ʻoku moʻoni ʻa e ngaahi meʻa ni. Ko ha fakamoʻoni makehe au ki hono moʻoní. ʻOku ou ʻiloʻi ʻoku moʻui hotau ʻEikí, pea kuó Ne toe tuʻu moʻoni, pea ʻokú Ne tataki mo ʻulu ki he Siasí ni ʻoku ui ʻaki Hono huafá, pea ko Hono Siasí ia pea ko ʻEne fanga sipi ʻa kimoutolu.