Mwekid ki Pwoson

I sohte pahn kak manokehla ahi alialu nan Winter Quarters, Nebraska, USA, wasa me paionihr kan kousoan ie sounpar kei samwalahr. Pwehl en wasao sarawi, likamwete I mih nan tehnpas sarawih ehu.

Pwoaren mesei kan direkihla pihl karotongala dahme I kak kilang. I kilangda ehu sansal ahpw sohte kak kasawiada mwohmwehkan. Ahnsou me I irisasang pilen meseikan, I kilangada ohl emen oh lih emen meserahkan nsensuwed. Ni ahi kadehde mwahu, I kilangada kisin serihmen wonohn nan sousou ehu limwahn nehrahkan.

Dahme I kilang kadireihekihla pepehm tohto: nsensuwed, lingeringer, kalahngan oh peren. I men kihsang medek me Soulengko kekehn, ahpw ahnsouohte I pil kalahnganki dahme re tohmeteikilahr pwehki rongamwahuo.

Dahme I alehsang Winter Quarters elehiong ie ien diarada me Sahm Nanleng kin ketkihdo rongamwahuo ong Sapwellime kan oh mweidong irail saledek en pilada me re pahn wiahiong. Pahpa oh nohnohn serio kak pilada ira en wia mehkot me mengei. Ideidawehn soukohpo oh momourki rongamwahuo kahreiong paionihr kan en kin wenla mwowe mehnda ma re anahne saripidi neira serio. Ahpw ira pilada en ale rongamwahuo ong nan ara mour oh pwekada ara toutoukan. I diarada me ahn Souleng kan loaloapwoat ong rongamwahuo oh ngidingid en wenla mwowe kohsang arail pwoson oh koapwoaroapwoar—koapwoaroapwoar ki popohl me pahn kohdo mwuhr oh pwoson me Kauno mwahngi irail oh pahn katikala arail weirek.