Sampah Anahne Paionihr Rahnwet

Ong me tohto, seilok en paionihr nan 1847 sohte tepida Nauvoo, Kirtland, Far West, de New York ahpw e tepsang wasa doh me raseng Inglen, Skotlen, Skandineipia de Sehmen. Seri tikitik kan sohte kak wehwehki soangen pwoson da me kak kamwakidada arail pahpa nohnokan en mweselda sang arail peneineikan, kempokeparailkan, soanarail oh epwelmwahuparail.

Emen me tikitik mwein kak idek, “Ino, dahme kitail mwesmweselki? Kitail pahn kohla ia?”

“Kohdo nei seri kesemwpwal; kitail kohkohlahng Saion, kahnihmw en atail Koht.”

Ahpw me irepeseng arail wasahn kousoan akan oh Saion iei pihl me engmah, keper oh kalaimwun me iei sehd en Atlantic. Ihs me kak kosoaia uwen kamasepwehk me kin kadirehla mohngiong en aramas ni ansou me re kin kotehdo madau kepero? Sang ni ngihl tikitik en Ngehno, patehng pwoson kehlail, Souleng paionihr kan likih Koht oh padokada arail serek kan oh doula nan arail seiloak.

Re lella Nauvoo ahpw re pil pwurehng mweselda oh loieng kahpwal tohto nan arail seiloako. Tuhke oh takai me kilelehdi sousou kan pohn elen seiloako sang Nauvoo lel kahnihmw en Salt Lake. Iei mwomwen tohnmetei me loieng ekei irail paionihr kan. Paliwararail kan neknekdi ni meleilei, ahpw ederail kan pahn wie momour kohkohlahte.

Kou kan wie wawai kowei, kurumahkan ngiringirsek, ohlakan doadoahk laud, ngilen mahwin wie sekesek oh kidi en wel kan wie weriwer. Ahpw irail paionihr pwoson kan me kin mwekidki kahpwal kan wenlahte mwowe. Re kin kalapw koulki:

Paionihr pwukat tamataman mahsen en Kauno ni eh mahsanih me Sapwellime kan uhdahn pahn ale kasongosong ni mehkoaros, pwe ren kak ale klohri me E kounopada ong irail, iei kilohri en Saion.²

Sohralahn ahnsou kin katikala atail iren ketemen oh kaping ong irail kan me alu nan ahl kamedek pwoatet me direkihla pilen mas akan oh sousou kan. Ahpw dahme wia atail kahpwal rahn wet? Solahr ahl me takaite en keid loalle, dohl mwangaingai en daur, wahu loal en kote, ahl kapw en wiawihda, de pillap pwehn kote? De mie anahnepen ineng me kamwakid paionihr kan en kahluwai kitail sang kahpwal kan me pahn kapilkitaildier oh kaluwai kitail ong Saion wasahn keiru?

Nan irair en sounpar kan mwurin Mahwen Keriau en Sampah, koasoandi en mour wie susuwedla. Dihp toutoukan wie kohkohda; mwahu oh mwakelekel wie kohkohdi. Aramas tohto patohier nan likahs en kahpwal toutou, riperipahki dahme pahn mwahuehng irail met oh tohnmeteikilahr peren soutuk. Kitail eri mendakilahr meleilei.

Kitail manokehlahr en mehn Krihs oh mehn Rohm kan arail kalowehdi sampah oh duwen arail sohrala—duwen soukautih oh soh nsenoh eh poweiraldi lao arail pwupwila. Ni imwilao, re sohte itariki en ahniki saledek, irail pil anahne meleilei oh mour mwahu; ahpw re luhs sang mehkoaros—nsenamwahu oh meleilei oh saledek.

Dehr dukiong en Sehdan kasongosong kan, ahpw, uhki mehlel. Ineng loal en pali ngehn sohte pahn kak alahldi sang ni atail sohte uhdihsang riperipahki litepw en wiewia keper oh suwed. Me suwed sohte kin elehda me mwahu. Kailok sohte kin uhki limpoak. Masepwehk sohte kin wiahda eimah. Peikasal sohte kin kapikada pwoson.

E kin apwal ohng ekei en kanengamahiong kapailok oh kosoai loamwaumw en aramas pweipwei me kin kasohwe mwakelekel, mehlel, oh peikiong kosonned en Koht akan. Ahpw sampah ansou koaros kin katikala peikiong me mwahu. Ansou me Noah alehdi ilek en wiahda warihmwo, irail me pweipwei kan kilang me sohte depwek oh irail eri kepweikangih oh kouruhrki—lao keteu mweredi.

Kitail anahne en pwurehng kasukuhlki soangen kahpwal pwukat? Ansou kin wekidek, ahpw mehlelo kin poatoapoat. Ansou me kitail sohte kin ale kaweid sang atail wiewia sapwung en mahs kan, kitail pahn uhdahn pwurehng wia sapwung pwuko me wa medek, lokolok oh pahtou. Kitail sohte wehwehki me kitail anahne peikiong Ih me mwahngi sang ni tapio lel ni imwih—atail Kauno, me ketkihda pilahn en komour—ahpw kaiden sineik, me kasohwe lingan en pilahno?

Diksenari kawehwe paionihr duwen “mehmen me kin kohla mwowe oh koakoada pohn ahlo pwe ekei en kak idawehn.”³ Kitail kak wiahla aramas eimah oh loaloapwoat duwehte mwohmwen paionihr kan en ehu dihen mwoweo? Komwi oh ngehi, ni mehlel, kak wia paionihr?

I ese me kitail kak. Oh, ia uwen en sampah anahne paionihr kan rahn wet!