Pagkamasulundon Ang Timailhan sa Hugot nga Pagtuo
Unta maningkamot kita nga magmasulundon sa mga sugo, mosunod sa balaang giya gikan sa pinili nga mga sulugoon sa Ginoo ug modawat sa Iyang gisaad nga mga panalangin.
Ang pagkamasulundon sa mga balaod ug mga sugo sa Dios kanunay mahinungdanon niadtong nagtinguha nga makadawat sa gisaad nga mga panalangin sa Manluluwas.
Niadtong Mayo 1833 si Propeta Joseph Smith nakadawat og pagpadayag diin ang Ginoo nag-ingon:
“Ang kamatuoran mao ang kahibalo sa mga butang ingon nga mao sila karon, ug ingon nga sila mao kaniadto, ug ingon nga sila mao sa umaabut. …
“Ug walay tawo nga makadawat sa usa ka kahingpitan hangtud siya maghupot sa mga sugo sa [Dios].
“Siya nga maghupot sa iyang mga sugo makadawat og kamatuoran ug kahayag, hangtud siya pagahimayaon diha sa kamatuoran ug masayud sa tanan nga mga butang” (D&P 93:24, 27–28; emphasis gidugang).
Pinaagi sa pagtuon ug pagsunod sa mga kamatuoran nga anaa sa mga balaod ug mga ordinansa sa ebanghelyo, atong masayran ug madawat ang gisaad nga mga panalangin sa ebanghelyo. Sumala sa kaalam ug tayming sa Langitnong Amahan, ang kamatuoran nga naggiya sa mga Santos sa Ulahing mga Adlaw anaa na alang sa tanang anak sa Dios. Kay, Siya mideklarar, “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Ang atong minahal nga propeta, si Presidente Thomas S. Monson, mitambag: “Sunda ang mga balaod sa Dios. Gihatag kini sa mapinanggaong Langitnong Amahan. Kon kini gisunod, malampuson ang atong kinabuhi, minus ang kalisud. Ang mga hagit ug problema mas sayon pas-anon. Madawat nato ang gisaad sa Ginoo nga mga panalangin. Miingon Siya, ‘Ang Ginoo nagkinahanglan sa kasingkasing ug sa usa ka andam nga hunahuna; ug ang andam ug masulundon mokaon sa kaayo sa yuta sa Zion niining katapusan nga mga adlaw.’”1
Ang mga pulong ni Presidente Monson nahitabo sa unang panahon, dihang si Nephi miingon sa iyang amahan, “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).
Ang usa ka himno para sa mga bata mopahinumdom nato sa atong katungdanan ug direksyon:
Moadto’g buhaton ko ang sugo sa Dios.
Siya mohatag paaging matuman ko kini.2
Kon atong hinumduman ang tambag sa atong propeta nga matinud-anong mosunod sa mga sugo ug atong hinumduman ang tubag ni Nephi sa iyang amahan, kita mapanalanginan.
Nagsunod sa direksyon gikan ni anghel Moroni, si Propeta Joseph Smith misulti sa iyang yutan-ong amahan kon unsay nahitabo. Ang amahan ni Joseph Smith, sa pagkasayud nga gisalig sa iyang anak ang mga palid nga bulawan, miingon “nga kini gikan sa Dios, ug misulti kanako sa pagpadayon ug sa pagbuhat sumala sa gimando sa sinugo” (Joseph Smith—Kasaysayan 1:50). Ang bisan unsang pagkulang sa pagkamasulundon sa tambag nga nadawat ni Joseph gikan sa langit ug yuta makapausab unta sa kasaysayan.
Kanus-a Kami Mabunyagan?
Ang atong mga misyonaryo nag-ampo ug miadto ug mibuhat, misalig nga ang Ginoo dili mohatag og sugo nila gawas kon Siya moandam og paagi aron sila molampus pinaagi sa ilang pagkamasulundon ug kaandam sa pagserbisyo. Misalig sila sa Iyang saad: “Kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
Daghan indibidwal kinsa nangita sa kamatuoran andam nga mosunod sa gitudlo sa atong mga misyonaryo. Kasagaran, kadtong gusto nga malakip sa mga tumutuo may tinguha na nga mahimong masulundon nga mga sumusunod sa kamatuoran. Sila andam usab nga moadto ug mobuhat.
Kini ang nahitabo sa 42 ka indibidwal nga mitambong sa komperensya sa district sa Kananga, Democratic Republic sa Congo. Andam sila nga miadto tungod kay ilang nabasa ug nadungog ang kamatuoran bahin sa Pagpahiuli, nagsugod sila pagsunod sa mga baruganan, ug sila nagtinguha nga mamiyembro sa Ang Simbahan ni Jesukristo sa mga Santos sa Ulahing mga Adlaw.3
Masulundon sa aghat sa Espiritu ug uban sa hugot nga pagtuo sa matag lakang, naglakaw sila og unom ka adlaw aron motambong sa komperensya. Ang ilang unang pangutana sa presiding authority sa pag-abut mao, “Kanus-a kami mabunyagan?”
Nakasabut sila nga sa dili madugay ang Ginoo mopahimong posible sa mga misyonaryo nga motudlo kanila sa ilang balay ug magdala sa kamatuoran nga dugay na nilang gipangita. Adunay mga 200 pa nga wala makaapil sa unom ka adlaw nga lakaw nga naghulat nga sa dili madugay ang mga misyonaryo moadto nila.
Usa ka Pag-ampo inubanan sa Hugot nga Pagtuo
Sa nasud sa Angola, ang oposisyon mihulga sa pagsumpo sa tinguha sa matinud-anon ug masulundong mga Santos nga makitang maestablisar ang ebanghelyo sa ilang dapit. Gipadala sa Ginoo ang Iyang mga sulugoon sa pag-abli sa ganghaan alang sa misyonaryo nga buhat, apan sa gabii sa ilang nakaiskedyul nga biyahe, wala pa gihapon sila mahatagi og visa. Dihang ang mga representante sa Simbahan mibisita sa mga opisyal sa immigration bahin sa kalangay, gibalibaran sila.
Uban sa pagtugot sa Unang Kapangulohan aron sa pagpahinungod sa Angola alang sa misyonaryo nga buhat, si Elder D. Todd Christofferson sa Korum sa Napulog Duha ka mga Apostoles ug ang uban pa naghulat og balita didto sa Johannesburg, South Africa. Sa samang higayon, ang matinud-anong miyembro nga si Paulina Lassalete da Cunha Gonçalves misulay pag-abli sa daw sirado na nga pultahan. Naglaum siya nga makabaton og sulat sa pagdapit nga mohatag og pagtugot alang sa grupo sa taga-Simbahan nga mosulod sa Angola. Sa higayon nga naa na, makakuha na dayon sila sa gikinahanglang visa.
Pipila ka minuto sa dili pa manira ang mga opisina sa gobyerno sa Angola, nagtigum silang Elder Christofferson uban niadtong naghulat sa mga buhatan sa Africa Southeast Area. Dayon, nangluhod sa pag-ampo, mihangyo siya sa Langitnong Amahan nga motabang. Nianang samang oras, human dayon sa iyang pag-ampo inubanan sa hugot nga pagtuo, gipirmahan ang mga sulat sa pagdapit. Ang mahigugmaong Amahan sa Langit miandam og paagi alang sa adlaw sa pagpahinungod. Sa hangyo ni Elder Christofferson, usa ka mapainubsanong pag-ampo sa pasalamat ang gihalad alang sa gihatag nga milagro.4
Ang mga pulong sa awit sa Primary daw nindot kaayo ug dili masaypan:
Langitnong Amahan, anaa ba gyud ka diha?
Ug ikaw ba maminaw ug motubag sa matag ampo sa bata?5
Oo, anaa Siya, ug oo, Iyang tubagon ang mga pag-ampo sa Iyang masulundon nga mga anak.
Ang pagkamasulundon nahimo nang timailhan sa mga propeta, ug kining tinubdan sa espirituhanong kalig-on maanaa sa tanan nga matinud-anong nagsunod sa mga sulugoon sa Dios. Si Presidente Monson mipahimangno sa mga Santos sa panginahanglan sa pagsunod sa mga sugo, kay “niini malinawon; ug luwas kita.”6
Unta maningkamot kita nga magmasulundon sa mga sugo, mosunod sa balaang giya sa pinili nga mga sulugoon sa Ginoo ug modawat sa Iyang gisaad nga mga panalangin.