Pagpamatuod pinaagi sa Seminary

Imahe

Ang akong mama mitudlo nako sa ebanghelyo sa gamay pa ko, tungod kay ang akong amahan dili miyembro sa Simbahan, naghunahuna ko pirme kon naa ba ko sa saktong dalan. Wala gayud ako makasabut nganong ang akong amahan wala gayud magpamiyembro sa Simbahan kon kini tinuod. Sa gihapon, ako ganahan nga moadto sa Primary ug magkanta sa mga himno. Malingaw usab ako kon ang akong inahan mobasa sa mga kasulatan ngari nako, ug hinay-hinay ako nakapalambo sa akong kaugalingong pagpamatuod.

Sa dihang namiyembro ko sa Young Women, usa sa unang mga tumong nga akong gihimo mao ang pagpakigbahin sa akong pagpamatuod matag Dominggo sa puasa. Ang pagpakigbahin sa akong pagpamatuod usa na ka naandan nako ug milig-on sa akong tinguha sa pagpalambo sa akong kahibalo sa dihang nagpalista ko sa seminary.

Ang akong unang klase sa seminary naghisgot sa Daang Tugon. Nianang tuiga ako wala lamang modayeg ug mohatag og bili sa Daang Tugon, apan nasayud usab ko sa kaimportante sa templo ug sa genealogy.

Nakig-uban ko sa ubang mga estudyante gikan sa akong ward ug miapil sa buhat sa family history. Nakakuha [extracted] mi og gatusan ka mga pangalan ug nakapalambo og dako nga gugma sa mga tawo nga wala namo mailhi—ilang mga ngalan lamang ug sa ubang limitado nga datos. Bisan tuod nasayud ko nga ang trabaho nga among gibuhat importante, usahay ako mibati nga nawad-an sa kadasig ug nahigawad. Ako nagtrabaho aron ang mga ordinansa mapahigayon alang sa mga tawo nga wala nako mailhi, apan dili nako matabangan ang akong kaugalingong amahan. Dili siya makasabut sa kaimportante sa unsay akong gibuhat. Nagpadayon ko sa pag-ampo ug nagpuasa nga siya matandog.

Pagkasunod tuig sa seminary kami nagtuon sa Bag-ong Tugon. Usa ka buntag sa akong pagmata, misugod ko sa pagbasa kabahin sa Manluluwas didto sa Getsemani. Nakahilak ko sa dihang akong naamguhan nga ang mga tinulo sa dugo nga Iyang gipaagas alang kanako. Naglaum gyud unta ko nga dili makasala! Ang mga pulong ni Isaias nga akong gitun-an sa miaging tuig misulod sa akong hunahuna: “Siya ginasamaran tungod sa atong mga kalapasan, siya napangos tungod sa atong mga kasal-anan: ang silot sa atong pakigdait diha sa ibabaw niya” (Isaias 53:5). Samtang nagbasa ko kabahin sa Paglansang ug Pagkabanhaw, ang akong mama misulod sa akong kwarto. Akong gipakigbahin kaniya ang akong mga pagbati, akong pagpamatuod, ug sa akong tinguha nga ang akong amahan masayud kon unsa ang akong nakat-unan sa seminary.

Ang akong pagpamatuod nagpadayon sa pagtubo sa pagka sunod tuig samtang kami nagbasa sa Doktrina ug mga Pakigsaad. Ako nakabaton og pagpamatuod nga si Joseph Smith usa ka propeta. Nakahukom usab ako sa pagsunod sa iyang ehemplo ug mangutana sa Dios kon ang Simbahan tinuod ba. Bisan og ako adunay kombiksyon sa akong kasingkasing, usa ka hapon ako nag-inusara ug sinserong nag-ampo. Samtang gibuhat ko kini, ako nakaamgo nga ang pagpamatuod nga akong gipangayo naglambo samtang nagtuon ko sa mga kasulatan ug nagtambong sa seminary.

Giablihan sa Ginoo ang akong hunahuna ug kasingkasing nianang tuiga, ug akong nasabtan ang Doktrina ug mga Pakigsaad nga wala pa nako masabti kaniadto. Nahibaloan usab nako ang dakong bili sa mga kalag (tan-awa sa D&P 18:10–16) ug misugod sa pagpakigbahin sa akong nagtubo nga pagpamatuod niadtong kinsa wala masayud kabahin sa ebanghelyo, lakip na ang akong amahan.

Nasayud ako nga ang pagtuon sa Basahon ni Mormon sa akong katapusang tuig sa seminary mopalig-on usab sa akong pagpamatuod. Samtang tinud-anay akong magtuon, akong gibati ang gugma sa Langitnong Amahan alang kanako. Ang mga istorya nakapadasig nako sa punto nga ang gusto nakong buhaton mao lang ang pagbasa sa Basahon ni Mormon. Ako misugod sa pagdala sa Basahon ni Mormon ngadto sa eskwelahan ug magbasa niini kon walay buhaton. Gisugdan usab nako sa paghisgot kon unsay akong gibasa uban sa akong amahan.

Usa ka adlaw human sa usa ka taas nga pag-istoryahanay uban sa akong amahan mahitungod sa ebanghelyo, ako mihagit kaniya sa pagbasa sa tanan sa Basahon ni Mormon. Ako mipamatuod nga, sama kanako, siya makadawat og pagpamatuod.

Malipayon ko nga moingon nga ang akong amahan nagbasa sa Basahon ni Mormon. Sa dihang iya kining gibuhat, siya nasayud nga ang Simbahan tinuod ug sa kaulahian nabunyagan! Ang akong pamilya karon nangandam nga mabugkos sa templo. Nasayud ko nga ang pagtambong sa seminary ug sa pagbasa sa kasulatan nakatabang nako sa pagpalambo sa akong kaugalingong pagpamatuod, ug ako nasayud nga kini mopanalangin sa mga pamilya.