Kina, Uringa, ao Anga te Kakaitau

E tuangira te Atua bwa ti na anga ara kaitau Nakoina ibukin aekakin kakabwaia are ti karekea mai irouna. E bon bebete nakoira bwa ti na riki n akea ara namakin i nanon ara tataro ni kakaitau, n taainako ni kaokioka te taeka ae titebo ma akea te nano n anga te kaitau bwa ana bwaintituaraoi te nano nakon te Atua. Ti na bon “anga kaitau … inanon te Tamnei” (taraaD&C 46:32) bwa ti aonga n namakina te kakaitau ae koaua ibukin are e a tia n anganira te Atua.

Ti na uringnga te mwakoro ni kabane are e a tia ni karaoia te Atua ibukiira? Te Abotoro Ioane e rekootina e anga reirei nakoira iai are te Tia Kamaiu ibukin te bwaintituaraoi n ururing are e roko man ana bwaintituaraoi te Tamnei ae Raoiroi: “Ao te Tia Ibuobuoki, are te Tamnei are Raoiroi, are e na kanakomaia te Tama n arau, E na reireingkami bwaai ni kabane, ao e na kaururing i nanomi bwaai ni kabane ake I atongi nakoimi” (Ioane 14:26).

Te Tamnei ae Raoiroi e na uoti ururing rikaki man bwaai ake e a tia n reireiniira. Ao teuana man ana kawai te Atua e a tia n reireiniira bon Ana kakabwaia; ao ai ngaia, ngkana ti rinea ni kammwakura te onimaki, te Tamnei ae Raoiroi e na karokoa ana akoi te Atua nakon ara ururing.

Ko kona ni kata anne i nanon te tataro n te bong aio. Ko kona n iira te tua are e taekinna bwa ko riai ni kaitaua te Uea Atuam ni bwaai ni kabane (taraa D&C 59:7).

Beretitenti Ezra Taft Benson (1899–1994) e karioa bwa te tataro e karika te tai ni karaoa anne. E taku: “Te Burabeti Iotebwa e taku n te taina bwa teuana te bure ae rangi ni korakora are te Aomata ae Itiaki ni Boong aika Kaitira are e na kairua iai bon bure n aki kakaitau. I kakoaua bwa angiia mai ibuakora a tuai n iangoia bwa anne bon te bure ae korakora. Bon iai kantaninga ae korakora ibukira n ara tataro ao i nanon ara bubuti nakon te Uea ni bubuti ibukin kakabwaia riki. Ma n tabetai I namakina ae ti kainnanoia ni kabanea riki ara tai n ara tataro ni kaota ara kakaitau ao ni karabwarabwa ibukin kakabwaia ake ti a tia ni karekei. Ti rangi ni kimareirei.”¹

Ko kona ni karekea te aekaki n taneiai aio ma ana bwaintituaraoi te Tamnei ae Raoiroi n te bong aio. Ko kona ni moana oin am tataro ma te kaitau. Ko kona n moana ni wareka am kakabwaia ao ngkanne toki ibukin te tai ae uarereke. Ngkana ko kammwakura te onimaki ma te bwaintituaraoi mai iroun te Tamnei ae Raoiroi, ko na kunea bwa ururing man kakabwaia ake tabeua a na roko ni kaona am iango. Ngkana ko moanna ni kaota am kakaitau ibukiia ni kabane, am tataro e kona n ae e na maan riki teutana nakon are ko tataneiai. Te ururing e na roko, ao ai aron naba te kakaitau.

Ko kona ni karaoa naba anne ngkai ko koroboki inanon am tienoro. Te Tamnei ae Raoiroi e a tia ni buokia aomata n anne man moan waakin te tai. Ko uringnga bwa n ana boki Moses e taekinna bwa te boki ni kauring e kawakinaki n ana taetae Atam ao inanon te boki anne e koreaki bwa te aomata are e wetea aran te Atua bwa e aonga ni koreia man te tamnei n anainano e butimwaeaki ana bubuti, (taraaMoses 6:5).

Beretitenti Spencer W. Kimball (1895–1985) e kabwarabwa te kawai anne n te koroboki ae anainano: “Naake a kawakina te boki ni kauring a na taraa riki ni ururinga te Uea inanon maiuia. Taian tienoro bon kawai ni wareki ara kakabwaia ao katukan warebwai ni kakabwaia akanne (ibukiia ara kariki bwa a na warekia) ibukin maiuraoira.”²

Ngkai ko waaki ni korei, ko kona n titirakiniko, “E kanga te Atua ni kakabwaiai ma naake I tangiriia n te bong aei?” Ngkana ko kakaraoa anne n tainako ma te onimaki, ko na n uringii kakabwaia. Ao n tabetai ko na kaoka am ururing nakon bwaintangira ake koa tia ni karekei ake ko aki kona n uringi inanon te bong ma ko na ataia imwiin ana mwakuri te Atua inanon maium.

I tataro bwa ko na reitinako ni karaoa te mwakuri inanon te onimaki ni kina, uringa, ao n anga te kakaitau ibukin are e a tia ni karaoia Tamara are I Karawa ao ara Tia Kamaiu are a karaoia ni kauka te kawai nakon te mweenga nakoia.