Iren Mahsen en Presidensi Keieu, Oakos 2013
Kasawiada, Tamataman, oh Kaping Kalahngan
Koht kupwurki kitail en kaping kalahngan ohng Ih pwehki kapai sohte lipilipil kan me kitail kin ale sang Reh. E kin mengei ohng kitail en ahnla wia atail kapakap en kaping kalahngan, eri kin kalapw kapwurehieng soahngen koasoaikohte ahpw sohte uhdan loalehdi atail kaping kalahngan ohng Koht. Kitail en kin wia atail kaping ni pali Ngehn (tehk D&C 46:32) pwe kitail en kak mehlelki atail kalahnganki me Koht ketkihiong kitailehr.
Ia mwomwen atail pahn kak tamataman ekis kisehn dahme Koht ketin wiahieng kitailehr? Wahnpoaron Sohn kilelehdi dahme Sounkomouro padahkiong kitail me pid kisakis en mehn ketemen me pwildo sang kisakis en Ngehn Sarawi: “A Sounsawaso, Ngehn Sarawi, me Semei pahn poaronehdo ni edei, iei ih me pahn kawehwehiong kumwail mehkan koaros, oh katakatamankin kumwail mehkoaros me I ndaiongkumwailehr” (Sohn 14:26).
Ngehn Sarawi kin katamando dahme Koht ketin padahkiong kitailehr. Oh ehu ahl me Koht ketin kaskaskuhlihkinkitail iei Sapwellime kapai kan; eri, ma kitail pilada kitail en doadoahngki atail pwoson, Ngehn Sarawi pahn kapehmkin kitail sapwellimen Koht kapai kan.
Kumwail kak kapakap oh rapahki wiepe wet rahn wet. Kumwail kak idawehn kehkehlik me mahsanih kumwail kapinga Kauno amwail Koht ni mehkoaros (tehk D&C 59:7).
President Ezra Taft Benson (1899–1994) mahsanih me kapakap kin elehda ansou mwahu en kaping kalahngan. E mweleki: “Ehu ansouo Soukohp Joseph mahsanih me ehu dihp kouwahlap me Souleng en Imwin Rahn akan pahn dipkihda iei dipen sohte kaping kalahngan. I mwelehki me pali tohtohn kitail sohte wiahki me dihp kouwahlap ehu met. Ahnepatail nan atail kapakap kan oh pekipek ngidingid kan ohng Kauno iei en kin peki kapai tohrohr kan. Aphw ekei ansou I pepehm me kitail anahne kalaudehla atail kapakap en kaping kalahngan pwehki kapai tohto me kitail alehier. Kitail me nsenamwahu.”1
Kumwail kak tungoaleniki pepehm me pid kisakis en Ngehn Sarawi rahn wet. Kumwail kak wia pein amwail kapakap en kaping kalahngan. Kumwail kak tepda wadek uwen tohtohn kapai kan me kumwail alehier eri uhdi ekis ansou. Ma kumwail pwoson, sang ni kisakis en Ngehn Sarawi, kumwail pahn tamanda uwen tohtohn kapai kan me kumwail alehier. Ma kumwail pahn kaping kalahnganki ehuehu kapai kan, amwail kapakap pahn kak ekis reirei sang mahs. Mehn ketemen, oh kaping kalangan pahn kehlailla.
Kumwail kak wia soahng wet ni amwail pahn ntingih nan noumwail pwuhk en ketemen. Ngehn Sarawio pil sewesehier aramas ki mehn ketemen wet sangete tepin kawa. Pwuhk en Moses koasoia me ehu pwuhk en ketemen mie ni en Adam eh lokaia, pwe poangok kohieng irail sohte lipilipil me kin likweriong Koht en nting sang ni ngehn en marain (tehk Moses 6:5).
President Spencer W. Kimball (1895–1985) kawehweh duwen wiepen nting ni ngehn en marain: “Irail kan me kin kolokol pwuhk en ketemen kin kalapw tamataman Kauno nan arail mourkan rahn koaros. Pwuhk en ketemen wia ehu elen atail pahn kak wadekada atail pai kan oh kihdi ketemenpen kapai pwukat ohng kadaudokatail kan.”2
Ni amwail tepda nting, kumwail kak peidek rehmwail, “Ia mwomwen Koht kapaiehda oh irail kan me I poakepoake rahnwet?” Ma kumwail pahn pwoson oh kalapw wia met, kumwail pahn diar me kumwail pahn kak tamanda kapai tohto. Oh ekei ansou kumail pahn kak tamanda kapai tohto me kumwail sohte tehk mwahu mwowe ahpw kumwail pahn esehla oh kehn wasa me Koht ketin sair nan amwail mour.
I kapakapki me kitail pahn wenla mwowe ni pwoson oh kasawiada, tamanda, oh kaping kalahnganki dahme Samatail Nanleng oh atail Sounkomour ketin wiahier oh wiewia pwehn ritingada ahl pwe kitail en kak pwurala Rehra.
© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/12. Kamanaman ong kawehwe: 6/12. Kawehwehpen First Presidency Message, August 2013. Pohnpeian. 10668 885