Serbisyohan Nako ang Dios sa Tibuok Nakong Kasingkasing, Gahum, Hunahuna ug Kusog

Usa ka adlaw sa recess, si Madison nakakita og usa ka batang babaye nga naghilak tungod kay dunay misulti niya og dili maayo. Nalooy si Madison sa batang babaye ug iyang giduol aron am-aman. “Gusto ka bang makigdula kanako?” nangutana siya sa batang babaye.

Nianang adlawa, si Madison nagserbisyo sa kinasingkasing. Misunod siya sa ehemplo ni Jesukristo ug nagpakita og gugma ngadto sa tawo nga nanginahanglan. Makapakita kita sa atong gugma sa Langitnong Amahan pinaagi sa pagserbisyo uban sa atong kasingkasing, sa atong gahum, sa atong hunahuna ug sa atong kusog. Makaserbisyo kita sa atong tibuok kaugalingon!

Sa unsang paagi kita makaserbisyo uban sa atong kasingkasing? Makaserbisyo kita sa atong mga kasingkasing pinaagi sa pagpakita og gugma ug pagkamabination sa uban. Maghunahuna kita sa gikinahanglan sa uban. Kon moserbisyo kita nga malipayon, nagserbisyo kita uban sa atong kasingkasing.

Sa unsang paagi makaserbisyo kita uban sa atong hunahuna? Makaserbisyo kita uban sa atong hunahuna pinaagi sa paghunahuna og mga paagi sa pagtabang sa uban.Kon makakita kita sa mga panginahanglan niadtong anaa sa atong palibut ug maghunahuna unsay atong matabang, nagserbisyo kita uban sa atong mga hunahuna.

Sa unsang paagi kita makaserbisyo uban sa atong gahum ug kusog? Ang pagserbisyo uban sa atong gahum ug kusog mao ang pagbuhat sa buluhaton sa balay ug pagtrabaho sa pagtabang sa uban. Kasagaran makapanalangin ug makaserbisyo kita sa tigulang nga mga tawo pinaagi sa pagbuhat sa mga butang nga lisud nilang buhaton.