Feia apî
Ua roaa ia’u ia vaiiho i to’u oto
No Taiwan mai te taata papa‘i.
I te taime ua bapetizohia to’u na hoa, te taea‘e Chen raua ta’na vahine, i roto i ta matou paroisa, e oaoa faito ore to’u. Hoê matahiti i muri mai to raua bapetizoraa, ua taatihia raua i roto i te hiero, e ua taati-atoa-hia ta raua tamaiti tei pohe na muaʻe raua a tomo mai ai i roto i te Ekalesia. Faahiahia roa te hi‘oraa i te utuafare Chen i te tupuraa i roto i te evanelia.
Tera râ, pohe atura te taea‘e Chen i roto i te hoê ati pereoo i te matahiti i muri iho. E i muri mai i taua ati ra, e au e, ua vai noa to’na pohe i roto i to’u feruriraa e pinepine te reira i te faaara noa ia’u i te pô. E ara noa vau ma te taʻi e ma te uiui noa, « No te aha hoʻi ? No te aha ua faati‘a te Fatu ia tupu teie huru ati rahi ? No te aha hoʻi i tupu ai teie ohipa i ni‘a i teie utuafare nehenehe mau ? » I te hoê mahana, te aehuehu noa ra to’u mana‘o i teie mau uiraa, ua rave a‘era vau i te hoê buka haapiiraa e ua tai‘o atura i te mau parau a te peresideni Spencer W. Kimball (1895–1985).
« Mai te mea e, e hi‘o tatou i te oraraa tahuti nei mai te taato‘araa o te oraraa, e riro ïa te mauiui, te oto, te manuïa ore e te oraraa poto ei ati rahi. Mai te mea râ e, e hi‘o tatou i te oraraa mai te hoê mea mure ore tei haamata i roto i te oraraa hou teie nei oraraa, e o te taahuri atu i ô mai i te pohe, i reira te mau mea atoa e vai ai i roto i to ratou ra ti‘araa mau…
« Aita anei tatou i tuuhia i mua i te mau faahemaraa no te tamatamata i to tatou paari, i mua i te ma‘i ia ti‘a ia tatou ia haapii i te faaoroma‘i, i mua i te pohe ia ti‘a ia tatou ia riro mai ei mea tahuti ore e te faahanahanahia ? »1
I tera ra taime, ua faaoti au e vaiiho i to’u oto ma te fariu atu i te ananahi i fafauhia mai. Ua ite a‘era vau i te taea‘e Chen i te mata o to’u feruriraa, ua tahoê e to’na utuafare ma te oaoa. Ua tae mai te hau no tera hi‘oraa. Ua ite au e, e horo‘a mai te Metua i te Ao ra ia tatou i te paari e te itoito no te faaruru i te mau ati.