Parau poro‘i na te mau tuahine hahaere, Setepa 2013
Faarava‘iraa ia’na iho
A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.reliefsociety.lds.org
Te Faaroo, Te Utuafare, Te Totauturu
Te faarava‘iraa ia‘na iho, o te aravihi ïa, te fafauraa ia’na iho e te tutavaraa hoʻi ia faafanaʻo i te maitai pae varua e te maitai pae tino ia tatou iho e i to tatou utuafare.1
Ia haapii tatou e ia faaohipa tatou i te mau parau tumu no te faarava‘iraa ia‘na iho i roto i to tatou fare e i rotopu i te huiraatira, e farii mai tatou i te mau rave‘a no te aupuru i tei vĕvĕ e tei nava‘i ore e no te tauturu ia vetahi ê ia faaravaʻi ia ratou iho ia nehenehe ia ratou ia faaoroma‘i i te mau taime ati.
E faufaa taa ê to tatou e e hopoi‘a atoa hoʻi ia faaohipa i to tatou ti‘amâraa no te ma‘iti ia faaravaʻi ia tatou iho i te pae varua e i te pae tino. No ni‘a i te faarava‘iraa ia‘na iho i te pae varua e no ni‘a i te turuʻiraa i ni‘a i te Metua i te Ao ra, ua haapii o Elder Robert D. Hales no te Pŭpŭ no te Tino Ahuru Ma Piti Aposetolo : « E faafariuhia tatou e e riro mai tatou ei feia navaʻi i te pae varua ia ora ana‘e tatou i ta tatou mau fafauraa na roto i te pure—na roto i te amuraa ma te ti‘amâ i te oro‘a, ia ti‘amâ ana‘e tatou no te farii i te hoê parau faati‘a no te hiero, e ia faatusia ana‘e tatou no te taviniraa ia vetahi ê ».2
Ua aʻo mai Elder Hales ia faaravaʻi tatou ia tatou iho i te pae tino, « oia hoi te noaaraa te hoê haapiiraa tuarua aore râ te haapiipiiraa toro‘a, te haapiiraa i te rave i te ohipa, te oraraa ia au i ta tatou faufaa. Na roto i te aperaa i te tarahu e te faaherehereraa i te moni i teie nei, ua ineine ïa tatou no te tavini-rave-tamau-raa i te Ekalesia i te tau i mua nei. Te tumu no te faarava‘iraa ia’na iho i te pae tino e te pae varua o te ti‘araa ïa i te hoê vahi e nehenehe ai tatou e tauturu i te feia i roto i te ati ».3
No roto mai i te mau papa‘iraa mo‘a
Mataio 25:1–13 ; 1 Timoteo 5:8 ; Alama 34:27–28 ; Te Parau Haapiiraa e te Mau Parau Fafau 44:6 ; 58:26–29 ; 88:118
No roto mai i to tatou aamu
I muri mai i to te Feia Mo‘a i te Mau Mahana Hopea Nei haaputuraa i roto i te afaa no Roto Miti, e medebara noa hoʻi, ua hinaaro te peresideni Brigham Young ia faaʻuʻa ratou e ia faati‘a papû mai i to ratou mau fare nohoraa. Te auraa ra, ua ti‘a roa ïa i te Feia Mo‘a ia haapii i te aravihi ia nehenehe ia ratou ia faaravaʻi ia ratou iho. E i roto i taua tautooraa ra, ua ti‘aturi rahi te peresideni Young i ni‘a i te mau rave‘a, i te mau taleni, i te haapa‘o maitai e i te hinaaro o te mau vahine, e ua faaitoito oia ia ratou i roto i te tahi mau hopoi‘a taa ê i te pae tino nei. Noa’tu â ua taa ê rii te mau hopoi‘a a te Sotaiete Tauturu i teie mahana, ua vai noa râ taua mau parau tumu ra :
-
A haapii i te here i te ohipa e a haapae i te faaea-noa-raa.
-
A titau i te hoê varua no te faatusiaraa ia oe iho.
-
A farii i ta oe iho hopoi‘a no te ea, [no te] haapiiraa, [no te] ohipa, [no te] moni, [no te] maa e no te tahi atu mau mea no te oraraa.
-
A pure no te faaroo e te itoito no te faaruru i te mau fifi e tae mai.
-
A haapuai ia vetahi ê e hinaaro ra i te tauturu.4
© 2013 by Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/12. Parau faati‘a no te iritiraa : 6/12 Iritiraa no Visiting Teaching Message, September 2013. Tahitian. 10666 895
Eaha ta’u e nehenehe e rave ?
-
Nahea vau i te tautururaa i te mau tuahine ta’u e haapa‘o nei ia ite mai i te mau rave‘a no to ratou mau hinaaro pae tino e pae varua ?
-
Te faarahi ra anei au i te faarava‘iraa ia’u iho i te pae varua na roto i te faaineineraa no te oro‘a mo‘a e na roto atoa i te faatusiaraa no te tavini atu ?