Tīkoni Foʻou ʻAupito

Naʻe tuʻu ʻa Penisī ʻi muʻa he sioʻatá, fakatonutonu hono hēkesí. Naʻe hao lelei hono sote hinehiná mo hono talausese lanu pulū fakapōpōʻulí. Naʻe ʻosi helu hono louʻulú. Naʻe ʻasi mateuteu moʻoni ke fakanofo ko ha tīkoni. Ko e hā leva ʻoku ongoʻi tailiili aí?

Naʻe toʻo ʻe Penisī ʻene ngaahi folofolá pea mavahe mei he lokí. Naʻe feinga ke ʻoua ʻe fakakaukau ki he kehe ʻo e ngaahi meʻa ʻi he lotú he ʻaho ní. Pea ʻoku ʻi ai mo e fatongia foʻou he lakanga fakataulaʻeikí naʻe tailiili ai ʻi he taimi kotoa pē naʻe fakakaukau ai ki aí: ko hono tufa ʻo e sākalamēnití. Fēfē kapau te ne fai ha fehālaaki ʻi heʻene fuofua fakahoko ia he uike kahaʻú? Naʻe feinga ke ne fakangaloki mo ia foki ʻi heʻene mavahe mei falé.

Naʻe lele tatau pē houalotu sākalamēnití ʻo hangē ko hono angamahení. Ka ʻi heʻene ʻosí, naʻe lue atu leva ʻa Penisī mo hono fāmilí ki he ʻōfisi ʻo Pīsope Salasā (Salazar). Naʻe mātuʻaki kehe ʻaupito ʻeni. Ko e angamahení, ne tonu ke u ʻi he polokalama fakaava ʻo e Palaimelí he taimí ni.

Naʻe tangutu ʻa Penisī ʻi he hilifaki ʻe he Tangataʻeikí, pīsopé, palesiteni ʻo e Kau Talavoú, mo e ongo tokoni ʻi he kau pīsopelikí honau nimá ki hono ʻulú. Naʻe foaki ki ai ʻe he Tangataʻeikí ʻa e Lakanga Taulaʻeiki Faka-ʻĒloné. ʻI he lolotonga ʻo e tāpuakí, ne mole atu e manavasiʻí ʻia Penisī. Naʻá ne ongoʻi nonga mo fiefia.

Naʻe tuʻu hake ʻa Penisī ʻo lulululu mo e taha kotoa. Pea fāʻofua leva ki heʻene Fineʻeikí mo hono tokoua ko Seí, mo hono kiʻi tuofefine ko Milasoló.

Hili ia pea ʻalu leva ki he Lautohi Faka-Sāpaté. Neongo naʻe ʻikai ke tatau ʻa e ngaahi kalasi foʻoú mo e Palaimelí, ka naʻa nau ongo maheni pē. Ko e lēsoní naʻe fekauʻaki mo e lotú. Naʻá ne ʻosi maʻu ha ngaahi lēsoni lahi kau ki he lotú ki muʻa ʻi he Palaimelí. Ne fakatau leva ʻe Penisī ʻene mānavá. Mahalo he ʻikai fuʻu faingataʻa fēfē ʻete hoko ko e tīkoní.

Ne talaange ʻe Sei kia Penisī ʻi he tuku ʻa e lotú, “ʻE lelei pē ia. Te u tāpuakiʻi ʻa e sākalamēnití, peá ke tufa ʻe koe.”

Naʻe toe foki kotoa mai ʻa e tailiilí. Naʻá ne talaange leʻo siʻi ai, “ʻIo, ta ʻoku sai.” Ko hono tufa ʻo e sākalamēnití ʻa e meʻa naʻe manavasiʻi taha ʻa Penisī ki aí!

Ne fakatokangaʻi ʻe Penisī ki mui ange he pō ko iá ʻoku lautohi ʻa e Tangataʻeikí he sea moluú. Naʻá ne fehuʻi ange leva, “ʻE fēfē kapau teu hiki fakalaka ʻi ha taha ʻo ʻikai ke ne maʻu ʻa e sākalamēnití? Fēfē kapau te u humu?” Naʻe sioloto ʻi heʻene fakakaukaú, ʻo hā mahino hangē ha ʻahó, ʻa e haʻulu ʻa e laulaú ki he falikí pea movete ʻa e ngaahi ipu vaí ki he tafaʻakí.

Ne kuku mai ʻe he Tangataʻeikí e uma ʻo Penisií. “ʻOku ou manatuʻi ʻa e fuofua taimi naʻá ku tufa ai ʻa e sākalamēnití. Mahalo naʻá ku tailiili lahi ange au ʻia koe he taimí ni.”

Naʻe pete ʻa Penisī ʻi heʻene ʻohovalé. “ʻA koe? ʻOku ʻikai ke ke ilifia koe ʻi ha meʻá!”

Naʻe kata e tangataʻeikí. “Kuo tātuʻo lahi ʻeku ilifiá. Ka ʻokú ke ʻilo e meʻa naʻe tokoni ke u ikunaʻi ʻeku manavasiʻí?”

Ne kiʻi fakakaukau taimi nounou ʻa Penisī. “Ko e lotú?”

Naʻe malimali e tangataʻeikí. “ʻOku tonu ia. Ko e lotú. Pea naʻe tāpuakiʻi au ʻe heʻeku tamaí. Te ke loto ke u tāpuakiʻi koe?”

Naʻe kamo vave ʻa Penisī. “ʻIo! ʻOku ou fie maʻu lahi ia.”

Naʻe fakatahataha ʻa e fāmilí ʻi he loki talitalí. Naʻe hili ʻe he Tangataʻeikí hono ongo nimá ki he ʻulu ʻo Penisií. ʻI he taimi naʻe kamata ke lea ai ʻa e Tangataʻeikí, ne ongoʻi ʻe Penisī ʻoku kamata fakatē-loʻimata. Naʻe pehē ʻe he Tangataʻeikí ʻi he tāpuakí, “Manatuʻi, kuó ke ʻosi maʻu e lakanga fakataulaʻeikí ʻi ha ouau toputapu. ʻOku foaki mai ʻe he Tamai Hēvaní kiate kitautolu e lakanga fakataulaʻeikí koeʻuhí ke tau lava ʻo tokoni ki he kakai kehé. Kapau te ke lava ʻo fai ʻeni ʻi he loto tōnunga kakato, ʻe tāpuekina koe he meʻá ni pea ʻi he meʻa kotoa pē.”

Naʻe lotu ʻa Penisī ʻi he uiké kotoa ke maʻu ha tokoni. ʻI he Sāpate hokó, ne kau fakataha mo e kau tīkoní ʻi muʻa he falelotú. Naʻe fakafanongo lelei ʻi hono fai ʻe Sei e tāpuaki ʻo e maá.

Fakafokifā pē kuó ne toe ongoʻi loto hohaʻa. Te ne lava moʻoni nai ʻo fai ʻeni? Naʻe mātuʻaki mahuʻinga! Naʻá ne manatuʻi leva e ngaahi talaʻofa mei he tāpuaki ʻa e Tangataʻeikí. Naʻe mahuʻi atu ʻene loto hohaʻá ʻi hono nofoʻia ia ʻe he Laumālié.

Naʻá ne toʻo ʻa e laulaú pea lue lotolahi atu ki he ngaahi ʻotu naʻe vahe ki aí. Naʻá ne mono fakalelei ange ʻa e laulaú ki ha fefine ʻi he ʻotu ʻuluakí.

Naʻe malimali ange ki ai. Pea malimali atu ʻa Penisī ki ai, ʻi heʻene ʻilo ʻoku ngāue ki he ʻEikí.