Ko ha Puha ʻo ha Ngaahi Tā

Naʻá ku lolotonga fakahifo ʻi he ngaahi taʻu kuo hilí ha uta ki ha lingiʻanga veve fakafeituʻu feʻunga mo ʻeku fakatokangaʻi atu hono toʻo hake ʻe ha taha ʻo e kau fefine naʻe ngāue aí ha puha ke faʻo ki he loto mīsini tutú. Naʻe fakafokifā pē kuo mahae ʻa e puhá pea ngangana mei ai ha ngaahi tā.

Naʻá ku maʻu ha ongo mālohi ʻi heʻeku sio atú, ke u ʻalu ʻo ʻomi ʻa e puha taá. Naʻá ku hopo leva ki tuʻa mei he kaá ʻo tokoni ke tufi ʻa e ngaahi taá. Naʻá ku fakatou ongoʻi mo e fefiné naʻe fehālaaki hono laku ʻo e ngaahi taá, peá u fakalotoʻi ai ia ke ne tuku ke u ʻave ʻa e ngaahi taá mo feinga ke ʻilo ha taha te ne fie maʻu.

Naʻá ku maʻu ʻi heʻeku vakili ʻa e ngaahi tā ʻe laungeau he loto puhá, ha sila naʻe fakatuʻasila ki ha taha ʻi Uoapeki, ʻAlapeta ʻi Kānata. Naʻá ku fai ha ngaahi tohi ʻi he ngaahi taʻu hono hokó ki ha kakai naʻe hingoa fakafāmili tatau, ka naʻe ʻikai ke u maʻu ha tali.

Naʻá ku ʻilo ʻi he hili e maʻu ʻe hoku fāmilí ʻa e ʻInitanetí, naʻe ʻi ai ha sōsaieti hisitōlia ʻi Uoapeki. Naʻá ku ʻeke pe ʻoku ʻi ai ha taha naʻe ngāue ai ʻokú ne fakatokangaʻi ʻa e ngaahi hingoa naʻá ku ʻilo he tuʻa ʻo e ngaahi taá.

ʻOsi ha māhina ʻe taha mei ai kuo mau maʻu ha telefoni mei ha tangata naʻe fetuʻutaki ki ai ʻa e sōsaieti hisitōliá. Naʻá ne pehē ʻoku nofo hono tuofēfiné ʻo ofi mai kiate kimautolu, pea kole mai pē ʻe lava hono tuofefiné ʻo vakaiʻi e ngaahi taá. Naʻá ma talaange ʻio.

ʻI he ʻaho hono hokó, ne ō mai ʻa Foloiti mo Pefi Hoafoni (Floyd & Beth Hawthorn), ʻokú na fakatou Siasí fakatouʻosi, ke mamata ʻi he ngaahi taá. ʻI he taimi ne u fakaava ai ʻa e puhá, ne pehē mai leva ʻa Misa Hoafoni, “Siʻi, ko ʻena,” mo tuhu ki he tā ʻi ʻolungá. Ko ha tā ʻo e kuitangata ʻa Sisitā Hoafoní.

Naʻe fakamatala mai ʻe Misa mo Misi Hoafoni ha ngaahi talanoa ʻi heʻena toʻo fakalautelau hake ʻa e ngaahi taá, fekauʻaki mo e kakai ʻi he taá takitaha. Naʻe ʻikai tui ʻa e fāmili Hoafoní ʻoku nau kāinga mo e taha naʻá ne laku ʻa e ngaahi taá, pea naʻe ʻikai ke na ʻilo pe ko e hā e ʻuhinga naʻe iku ai ʻa e ngaahi taá ki he lakuʻanga vevé.

ʻOku ou ongoʻi moʻoni naʻe tokoniʻi au ʻe he Tamai Hēvaní ke u fakafoki ʻa e ʻū taá ki he fāmili Hoafoní. ʻOku ou fakamoʻoni ko e ngāue hisitōlia fakafāmilí ko e taha ia ʻo e ngaahi ngāue mahuʻinga taha ke fakahoko. Kapau ʻoku tau fie ngāue, ʻe tokoniʻi kitautolu ʻe he ʻEikí ke tau fakahoko ia.